AKP ភ្នំពេញ ថ្ងៃទី១៣ ខែកុម្ភៈ ឆ្នាំ២០២៦ -- រដ្ឋមន្ត្រីការបរទេសចិន លោកវ៉ាង យី (Wang Yi) កាលពីថ្ងៃពុធ បានអំពាវនាវឱ្យប្រទេសចិន និងហុងគ្រីខិតខំប្រឹងប្រែងរួមគ្នាដើម្បីជំរុញទំនាក់ទំនងទ្វេភាគី។

លោក វ៉ាង ដែលជាសមាជិកនៃការិយាល័យនយោបាយនៃគណៈកម្មាធិការកណ្តាលបក្សកុម្មុយនិស្តចិន បានធ្វើការកត់សម្គាល់នេះខណៈពេលដែលលោក និងរដ្ឋមន្ត្រីការបរទេស និងពាណិជ្ជកម្មហុងគ្រីលោក ផេទឺ ហ្សីចចារតូ (Peter Szijjarto) បានជួបជាមួយសារព័ត៌មានបន្ទាប់ពីកិច្ចពិភាក្សារបស់ពួកគេនៅទីក្រុងប៊ូដាប៉េស រដ្ឋធានីហុងគ្រី។

ដោយកត់សម្គាល់ថា ភាគីទាំងពីរមានមិត្តភាពជាប្រពៃណី លោក វ៉ាងបាននិយាយថា ក្នុងរយៈពេលជាង ៧០ឆ្នាំចាប់តាំងពីការបង្កើតទំនាក់ទំនងការទូត ប្រទេសចិន និងហុងគ្រី បានប្រកាន់ខ្ជាប់ជានិច្ចនូវការគោរពគ្នាទៅវិញទៅមក សមភាព និងកិច្ចសហប្រតិបត្តិការឈ្នះ-ឈ្នះ ដោយកំណត់គំរូនៃទំនាក់ទំនងអន្តរជាតិប្រភេទថ្មី និងបង្កើតភាពជាដៃគូយុទ្ធសាស្ត្រគ្រប់ជ្រុងជ្រោយសម្រាប់យុគសម័យថ្មី។

លោក វ៉ាង បាននិយាយថា ដំណើរទស្សនកិច្ចរបស់លោកទៅកាន់ប្រទេសហុងគ្រី មានគោលបំណងពង្រឹងមិត្តភាព និងពង្រីកកិច្ចសហប្រតិបត្តិការ ដោយលោកបានបន្ថែមថា លោក និងលោក ហ្សីចចារតូ បានឈានដល់ការឯកភាពគ្នាយ៉ាងទូលំទូលាយក្នុងអំឡុងពេលនៃកិច្ចពិភាក្សារបស់ពួកគេ ហើយមានទំនុកចិត្តយ៉ាងពេញលេញអំពីការអភិវឌ្ឍទំនាក់ទំនងទ្វេភាគីនាពេលអនាគត។

លោកបានមានប្រសាសន៍ថា គំនិតផ្តួចផ្តើមអភិបាលកិច្ចសកលដែលស្នើឡើងដោយប្រធានាធិបតីចិន លោក ស៊ី ជីនពីង (Xi Jinping) គឺជាការឆ្លើយតបទៅនឹងសេចក្តីប្រាថ្នារួមរបស់សហគមន៍អន្តរជាតិសម្រាប់សន្តិភាពកិច្ចសហប្រតិបត្តិការ និងការអភិវឌ្ឍ។

ប្រទេសចិនត្រៀមខ្លួនជាស្រេចដើម្បីធ្វើការជាមួយប្រទេសហុងគ្រីនិងប្រទេសដែលមានគំនិតដូចគ្នាទាំងអស់ ដើម្បីអនុវត្តន៍តាមគោលបំណងនិងគោលការណ៍នៃធម្មនុញ្ញអង្គការសហប្រជាជាតិ និងរួមគ្នាកសាងប្រព័ន្ធអភិបាលកិច្ចសកលដែលយុត្តិធម៌ និងសមហេតុផលជាងមុន៕

ដោយ៖ មូល មិនា (ប្រភព៖ ភីបផលដេលី)