AKP ភ្នំពេញ ថ្ងៃទី១២ ខែកុម្ភៈ ឆ្នាំ២០២៦ -- ប្រធានាធិបតីតួកគីលោក រេសេប តាយយីប អឺដូហ្គែន (Recep Tayyip Erdogan) កាលពីថ្ងៃពុធ បានអំពាវនាវឱ្យមានស្ថិរភាព និងការផ្សះផ្សានៅក្នុងប្រទេសស៊ីរី ដោយជំរុញឱ្យគ្រប់ភាគីទាំងអស់ផ្តល់អាទិភាពដល់ឯកភាពជាតិ និងជៀសវាងសកម្មភាពដែលអាចធ្វើឱ្យខូចខាតដល់ទស្សនវិស័យសម្រាប់សន្តិភាពយូរអង្វែង។

លោក អឺដូហ្គែន បាននិយាយនៅក្នុងកិច្ចប្រជុំក្រុមសភាគណបក្សយុត្តិធម៌ និងអភិវឌ្ឍន៍ (AK) នៅរដ្ឋធានីអង់ការ៉ាថា «បំណងប្រាថ្នាដ៏ធំបំផុតរបស់យើងសម្រាប់ប្រទេសស៊ីរី គឺការសម្រេចបាននូវស្ថិរភាព និងសន្តិភាព។យើងចង់ឱ្យប្រជាជនស៊ីរីកសាងអនាគតរបស់ពួកគេរួមគ្នាដោយការឯកភាព»។

លោកក៏បានសង្កត់ធ្ងន់ទៅលើតម្រូវការសម្រាប់កិច្ចសហប្រតិបត្តិការក្នុងចំណោមសហគមន៍ចម្រុះរបស់ប្រទេសនេះបន្ទាប់ពីជម្លោះរាប់ទសវត្សរ៍ផងដែរ ដោយបានកត់សម្គាល់ថា គម្រោងនៃការដោះស្រាយរយៈពេលវែងកំពុងកាន់តែមានភាពច្បាស់លាស់ និងបានព្រមានដល់ភាគីនានាកុំឱ្យធ្វើកំហុសអតីតកាលម្តងទៀត។

លោក អឺដូហ្គែន បាននិយាយថា «ផែនទីបង្ហាញផ្លូវសម្រាប់សន្តិភាពយូរអង្វែងនៅក្នុងប្រទេសស៊ីរីត្រូវបានកំណត់។ ភាគីនានាត្រូវតែជៀសវាងការគណនាខុស ធ្វើកំហុសពីអតីតកាលម្តងទៀត ឬបំពុលដំណើរការជាមួយនឹងការទាមទារអតិបរមា»។

ដោយបញ្ជាក់ពីការចំណាយទៅលើមនុស្សជាតិនៃសង្គ្រាម លោក អឺដូហ្គែន បានបន្ថែមថា «រាល់ដំណក់ឈាមដែលហូរចេញធ្វើឱ្យបេះដូងរបស់យើងឈឺចាប់ ដោយមិនគិតពីថា តើពួកគេជាជនជាតិអារ៉ាប់ ជនជាតិតួកមេនជនជាតិឃឺដ ឬជនជាតិនូសាយរីនោះទេ។ រាល់ជីវិតដែលបានបាត់បង់នៅក្នុងប្រទេសស៊ីរី ធ្វើឱ្យមានអារម្មណ៍ថាដូចជាបាត់បង់ផ្នែកមួយរបស់យើង»។

លោកក៏បានអំពាវនាវផងដែរឱ្យមានការផ្លាស់ប្តូរឆ្ពោះទៅរកការកសាងនិងការស្តារសេដ្ឋកិច្ចឡើងវិញ។ លោកបាននិយាយថា «វាដល់ពេលហើយសម្រាប់ធនធាន និងទ្រព្យសម្បត្តិនៅលើដី និងនៅក្រោមដីរបស់ប្រទេសស៊ីរី ដែលត្រូវប្រើប្រាស់សម្រាប់វិបុលភាពនៃគ្រប់វិស័យនៃសង្គម មិនមែនសម្រាប់ការជីកផ្លូវរូងក្រោមដីនៅក្រោមទីក្រុងនោះទេ»។

ដោយលើកឡើងពីក្តីកង្វល់ក្នុងតំបន់ លោក អឺដូហ្គែន បានបដិសេធចំពោះការអះអាងថា ប្រទេសតួកគីកំពុងស្វែងរកឥទ្ធិពល ដោយបាននិយាយថា «ប្រទេសតួកគីមិនកំពុងស្វែងរកឥទ្ធិពលនៅក្នុងតំបន់នោះទេ ហើយក៏មិនមានបំណងចង់បង្កបញ្ហាជាមួយប្រទេសដទៃទៀតដែរ។ ផ្ទុយទៅវិញ យើងស្វែងរកការរួបរួមដោយស្មោះ»។

លោកក៏បានស្វាគមន៍ចំពោះអ្វីដែលលោកបានពិពណ៌នាថាជាភាពរសើបរួមគ្នាជាមួយប្រទេសអារ៉ាប៊ីសាអូឌីត អេហ្ស៊ីប និងហ្ស៊កដានី ទៅលើអនាគតរបស់ប្រទេសស៊ីរី ដោយបាននិយាយថា ប្រទេសតួកគីនឹងធ្វើការរួមគ្នាជាមួយប្រទេសទាំងនោះ ដើម្បីគាំទ្រដល់ស្ថិរភាពនៅក្នុងប្រទេសស៊ីរី៕

ដោយ៖ យា ចិន្ដាខន្ដី (ប្រភព៖ AA-AKP)