AKP ភ្នំពេញ ថ្ងៃទី១២ ខែកុម្ភៈ ឆ្នាំ២០២៦ -- ប្រធានាធិបតីសហរដ្ឋអាមេរិកលោក ដូណាល់ ត្រាំ (Donald Trump) បានបង្កការសង្ស័យទៅលើសក្តានុពលសម្រាប់រដ្ឋបាលរបស់លោកក្នុងការសម្រេចបានកិច្ចព្រមព្រៀងយូរអង្វែងជាមួយអ៊ីរ៉ង់ ដោយលោកបាននិយាយថា កិច្ចព្រមព្រៀងណាមួយក៏ដោយត្រូវតែគ្របដណ្តប់ទៅលើបញ្ហាជាច្រើនហួសពីកម្មវិធីនុយក្លេអ៊ែររបស់ទីក្រុងតេអេរ៉ង់។

នៅពេលដែលត្រូវបានសួរក្នុងអំឡុងពេលនៃបទសម្ភាសន៍ជាមួយសារព័ត៌មាន Fox Business ថា តើកិច្ចព្រមព្រៀងថ្មីជាមួយអ៊ីរ៉ង់នឹងនៅតែស្ថិតស្ថេរដែរឬទេ? លោកប្រធានាធិបតីបាននិយាយថា «ខ្ញុំមិនដឹងទេ។ ខ្ញុំដឹងតែរឿងមួយ ពួកគេចង់ធ្វើកិច្ចព្រមព្រៀង»។

លោក ត្រាំ បាននិយាយថា «ពួកគេមិននិយាយជាមួយអ្នកណាផ្សេងទេ ប៉ុន្តែពួកគេកំពុងនិយាយជាមួយខ្ញុំ។ ប៉ុន្តែ អ្នកដឹងទេ វាជាសំណួរល្អ។មនុស្សជាច្រើននិយាយថាទេ ហើយខ្ញុំចង់និយាយថា ខ្ញុំចង់ធ្វើកិច្ចព្រមព្រៀង។ វាត្រូវតែជាកិច្ចព្រមព្រៀងល្អ គ្មានអាវុធនុយក្លេអ៊ែរ គ្មានមីស៊ីលគ្មាននេះ គ្មាននោះ ទាំងអស់នៃរឿងផ្សេងៗគ្នាដែលអ្នកចង់បាន»។

លោក ត្រាំ បាននិយាយថា «ប៉ុន្តែមនុស្សមួយចំនួនមានការព្រួយបារម្ភថា ពួកគេបានប្រព្រឹត្តមិនស្មោះត្រង់ជាមួយយើងក្នុងរយៈពេលជាច្រើនឆ្នាំមកនេះ មែនទេ? លោក អូបាម៉ា និងលោក បៃដិន អ្វីដែលពួកគេបានធ្វើទាក់ទងនឹងការបង្កើតអ្វីដែលចម្លែកជាមួយអ៊ីរ៉ង់ គឺគួរឱ្យភ័យខ្លាច។ កិច្ចព្រមព្រៀងនុយក្លេអ៊ែរអ៊ីរ៉ង់នោះ គឺជាកិច្ចព្រមព្រៀងដ៏ល្ងង់ខ្លៅបំផុតមួយដែលខ្ញុំធ្លាប់បានឃើញ»។

អ៊ីរ៉ង់ និងសហរដ្ឋអាមេរិកកំពុងរៀបចំសម្រាប់កិច្ចចរចានុយក្លេអ៊ែរជុំបន្ទាប់ បន្ទាប់ពីកិច្ចចរចាលើកដំបូងបានធ្វើឡើងនៅប្រទេសអូម៉ង់កាលពីថ្ងៃសុក្រ ក្រោយពីការផ្អាកប្រមាណជិតប្រាំបីខែ បន្ទាប់ពីការវាយប្រហាររបស់លោក ត្រាំ ទៅលើរោងចក្រនុយក្លេអ៊ែររបស់អ៊ីរ៉ង់។

ភាពតានតឹងបានកើនឡើងរវាងទីក្រុងវ៉ាស៊ីនតោន និងទីក្រុងតេអេរ៉ង់ដែលជំរុញដោយការកសាងយោធារបស់អាម៉េរិកនៅឈូងសមុទ្រពែរ្ស និងការគំរាមកំហែងម្តងហើយម្តងទៀតនៃសកម្មភាពយោធាដោយលោក ត្រាំ៕

ដោយ៖ យា ចិន្ដាខន្ដី (ប្រភព៖ AA-AKP)