AKP ភ្នំពេញ ថ្ងៃទី១១ ខែកុម្ភៈ ឆ្នាំ២០២៦ -- ខួបលើកទី៨០ នៃទិវាសារព័ត៌មានជាតិឥណ្ឌូណេស៊ី ត្រូវបានប្រារព្ធឡើងនៅទីក្រុងសេរ៉ាង ខេត្តបាន់ទែន កាលពីថ្ងៃទី០៩ ខែកុម្ភៈ ឆ្នាំ២០២៦ ដើម្បីជាកិត្តិយសដល់តួនាទីរបស់សារព័ត៌មានក្នុងឆាកនយោបាយ និងសង្គមរបស់ប្រទេស ក៏ដូចជាដំណើរការប្រជាធិបតេយ្យរបស់ខ្លួន។

នៅក្នុងសុន្ទរកថារបស់លោក អាប់ឌុល មូហៃមីន អ៊ីស្កាន់ដារ (Abdul Muhaimin Iskandar) រដ្ឋមន្ត្រីក្រសួងសម្របសម្រួលការពង្រឹងសហគមន៍បាននិយាយថា វិស័យសារព័ត៌មាននឹងបន្តតួនាទីដើម្បីធានាគុណភាព រក្សាក្រមសីលធម៌ និងរក្សាភាពស្មោះត្រង់ចំពោះការពិត ខណៈដែលមានការរំខានពីខាងបច្ចេកវិទ្យាជាបន្តបន្ទាប់។

លោកបានបញ្ជាក់ថា សារព័ត៌មាន គឺជាសសរស្តម្ភសំខាន់មួយនៃលទ្ធិប្រជាធិបតេយ្យ ខណៈដែលអំពាវនាវដល់អង្គភាពប្រព័ន្ធផ្សព្វផ្សាយឱ្យរក្សាឯករាជ្យភាព វិជ្ជាជីវៈ និងការទទួលខុសត្រូវសង្គម ជាពិសេសក្នុងចំណោមការរីករាលដាលនៃព័ត៌មានមិនពិត និងព័ត៌មានក្លែងក្លាយដែលកំពុងកើនឡើងកាន់តែច្រើន។

លោក អាកម៉ាដ មូនៀរ (Akhmad Munir) ប្រធានសមាគមវ៉ាតាម៉ាន់ឥណ្ឌូណេស៊ី (PWI) បាននិយាយថា សេរីភាពសារព័ត៌មានត្រូវតែដើរទន្ទឹមគ្នាជាមួយនឹងវិជ្ជាជីវៈ ភាពត្រឹមត្រូវ និងភាពមិនលំអៀង ដោយឈរលើមូលដ្ឋាននៃការប្រកាន់ខ្ជាប់យ៉ាងតឹងរ៉ឹងចំពោះស្តង់ដារសីលធម៌វិជ្ជាជីវៈ។លោកបានបញ្ជាក់ថា ក្នុងចំណោមបរិយាកាសព័ត៌មានឌីជីថល ដែលមានការវិវត្តឥតឈប់ឈរ សារព័ត៌មានឥណ្ឌូណេស៊ីនឹងបន្តបម្រើជាសសរស្តម្ភនៃលទ្ធិប្រជាធិបតេយ្យ ខណៈដែលការពារផលប្រយោជន៍សាធារណៈ។

លោក បេននី ប៊ូតាប៊ូតា (Benny Butarbutar) ប្រធាន​នាយក​ទីភ្នាក់ងារ​ព័ត៌មាន​ជាតិ​ឥណ្ឌូណេស៊ីអាន់តារ៉ា បាន​ប្រាប់​ទីភ្នាក់ងារ​ព័ត៌មាន​វៀតណាម​ថា បញ្ញា​សិប្បនិម្មិត (AI) មិនអាចជំនួសមនុស្សក្នុងការបង្ហាញតម្លៃ និងអារម្មណ៍មនុស្សធម៌បានទេ ដែលជាធាតុផ្សំស្នូលនៃសារព័ត៌មាន។លោកបានសង្កត់ធ្ងន់ថា AI គួរតែត្រូវបានចាត់ទុកថាជាឧបករណ៍គាំទ្រតែប៉ុណ្ណោះ មិនមែនជាការជំនួសអ្នកសារព័ត៌មានទេ។

លោកក៏បានជំរុញឱ្យអ្នកសារព័ត៌មាន ជាពិសេសអ្នកសារព័ត៌មានវ័យក្មេងឱ្យពង្រីកទស្សនៈរបស់ពួកគេ និងបង្កើនជំនាញវិជ្ជាជីវៈជាបន្តបន្ទាប់ដើម្បីរក្សាតួនាទីរបស់ពួកគេក្នុងចំណោមការរីកចម្រើននៃវិស័យសារព័ត៌មាន ការកើនឡើងនៃព័ត៌មានក្លែងក្លាយ និងការអភិវឌ្ឍយ៉ាងឆាប់រហ័សនៃបច្ចេកវិទ្យា AI៕

ដោយ៖ យា ចិន្ដាខន្ដី (ប្រភព៖ VNA)