AKP ភ្នំពេញ ថ្ងៃទី១១ ខែកុម្ភៈ ឆ្នាំ២០២៦ -- នៅក្នុងកិច្ចប្រជុំតុមូលកាលពីពេលថ្មីៗនេះ អគ្គនាយកទីភ្នាក់ងារសារព័ត៌មាន BTA របស់ប៊ុលហ្គារី លោកគីរីល វ៉ាល់ឆេវ (Kiril Valchev) បានសង្កត់ធ្ងន់ថា បញ្ញាសិប្បនិម្មិត (AI) គួរតែត្រូវបានទទួលយកជាឧបករណ៍មួយជាជាងការភ័យខ្លាច ដោយប្រៀបធៀបផលប៉ះពាល់របស់វាទៅនឹងការបង្កើតម៉ាស៊ីនបោះពុម្ព។ លោកបានអះអាងថា ខណៈដែល AI ផ្តល់ព័ត៌មានភ្លាមៗ វាមិនអាចជំនួសតួនាទីរបស់អ្នកសារព័ត៌មានក្នុងការរាយការណ៍នៅនឹងកន្លែង និងការត្រួតពិនិត្យការពិតបានទេ។ ទីភ្នាក់ងារសារព័ត៌មាន BTA មានគម្រោងក្លាយជាប្រព័ន្ធផ្សព្វផ្សាយដំបូងគេមួយ ដែលរួមបញ្ចូលច្បាប់សីលធម៌បញ្ញាសិប្បនិម្មិតជាផ្លូវការទៅក្នុងក្រមប្រតិបត្តិរបស់ខ្លួនចាប់ពីថ្ងៃទី១៦ ខែកុម្ភៈ ឆ្នាំ២០២៦។

ទីភ្នាក់ងារនេះកំពុងដាក់ឱ្យដំណើរការគំនិតផ្តួចផ្តើមជាក់ស្តែងជាច្រើនរួមទាំង «វិទ្យាស្ថាន BTA» និងកម្មវិធីណែនាំដែលបុគ្គលិកថ្នាក់ក្រោមក្នុងការបង្រៀនសហសេវិកជាន់ខ្ពស់អំពីជំនាញឌីជីថល និងការប្រើប្រាស់បញ្ញាសិប្បនិម្មិត។ លោក វ៉ាល់ឆេវ បានគូសបញ្ជាក់ពីគោលការណ៍វិចារណកថាយ៉ាងតឹងរ៉ឹង ដោយបញ្ញាសិប្បនិម្មិតនឹងត្រូវបានប្រើសម្រាប់តែកិច្ចការផ្លាស់ប្តូរនានា ដូចជាការសង្ខេប ការបកប្រែ និងការកែតម្រូវវេយ្យាករណ៍ប៉ុណ្ណោះ។ អ្វីដែលសំខាន់នោះ ទីភ្នាក់ងារសារព័ត៌មាន BTA ហាមឃាត់ការប្រើប្រាស់បញ្ញាសិប្បនិម្មិតដើម្បីបង្កើតខ្លឹមសារពីដំបូង ដោយធានាថាព័ត៌មាននីមួយៗត្រូវបានផ្ទៀងផ្ទាត់ដោយអ្នកកែសម្រួលជាមនុស្សមុនពេលបោះពុម្ពផ្សាយ ដើម្បីរក្សាភាពត្រឹមត្រូវ និងភាពមិនលំអៀង។

លោក វ៉ាល់ឆេវ ក៏បានបញ្ជាក់ពីភាពចាំបាច់នៃការវិនិយោគទៅលើ«បញ្ញាធម្មជាតិ» រួមជាមួយនឹងបច្ចេកវិទ្យាផងដែរ។ លោកបានកត់សម្គាល់ថាប្រាក់ខែទាបនៅក្នុងវិស័យប្រព័ន្ធផ្សព្វផ្សាយបណ្តាលឱ្យមានការហូរចេញពីខួរក្បាលទៅកាន់វិស័យផ្សេងៗទៀត ដោយបានអះអាងថា ការវិនិយោគហិរញ្ញវត្ថុទៅលើអ្នកសារព័ត៌មាន និងផ្នែកទំនើបៗ គឺជាតម្រូវការជាមុនសម្រាប់ការផ្លាស់ប្តូរបញ្ញាសិប្បនិម្មិតប្រកបដោយជោគជ័យ។ តាមរយៈវិទ្យាស្ថាន BTA ទីភ្នាក់ងារសារព័ត៌មាននេះមានគោលបំណងសហការជាមួយអង្គការវិទ្យាសាស្ត្រ ដើម្បីអភិវឌ្ឍន៍ និងចែករំលែកឧបករណ៍បញ្ញាសិប្បនិម្មិត ដែលគាំទ្រដល់ទេសភាពប្រព័ន្ធផ្សព្វផ្សាយប៊ុលហ្គារីទាំងមូល៕

ដោយ៖ យា ចិន្ដាខន្ដី (ប្រភព៖ BTA)