AKP ភ្នំពេញ ថ្ងៃទី១១ ខែកុម្ភៈ ឆ្នាំ២០២៦ -- យោងតាមការលើកឡើងរបស់លោក ឆុង វ៉ាដេ (Cheong Wa Dae) កាលពីថ្ងៃអង្គារ បានឱ្យដឹងថា ប្រធានាធិបតីកូរ៉េខាងត្បូង លោក លី ជេម្យុង (Lee Jae Myung) និងលោក ម៉ាក រូតតេ (Mark Rutte) អគ្គលេខាធិការអង្គការសន្ធិសញ្ញាអាត្លង់ទិកខាងជើង (NATO) បានពិភាក្សាអំពីវិធីពង្រីកកិច្ចសហប្រតិបត្តិការក្នុងវិស័យការពារជាតិក្នុងអំឡុងពេលនៃការសន្ទនាតាមទូរស័ព្ទ។

នៅក្នុងរបាយការណ៍សង្ខេបជាលាយលក្ខណ៍អក្សរមួយ អ្នកនាំពាក្យប្រធានាធិបតីកូរ៉េខាងត្បូង លោក គីម ណាមជុន (Kim Nam-jun) បាននិយាយថា ការសន្ទនានេះ គឺជាលើកទីពីររវាងមេដឹកនាំទាំងពីរក្នុងរយៈពេលប្រាំពីរខែត្រូវបានធ្វើឡើងតាមការស្នើសុំរបស់លោក រួតតេ។

ក្នុងអំឡុងពេលនៃការសន្ទនា មេដឹកនាំទាំងពីរបានចែករំលែកពីតម្រូវការក្នុងការរក្សាភាពជាដៃគូរបស់ពួកគេ និងបន្តពិគ្រោះយោបល់យ៉ាងជិតស្និទ្ធ ដើម្បីដោះស្រាយបញ្ហាប្រឈមសន្តិសុខសកល រួមទាំងសង្គ្រាមនៅអ៊ុយក្រែន និងបញ្ហាសន្តិសុខនៅលើឧបទ្វីបកូរ៉េ។

លោក លី បានបញ្ជាក់ពីសមត្ថភាពរបស់ក្រុមហ៊ុនការពារជាតិកូរ៉េ និងបានស្នើឱ្យមានកិច្ចសហប្រតិបត្តិការជាក់ស្តែងបន្ថែមទៀតតាមរយៈស្ថាប័នប្រឹក្សាយោបល់កម្រិតការងារដែលបានបង្កើតឡើងកាលពីឆ្នាំមុន។ លោករូតតេ បានយល់ព្រមដោយសន្យាថានឹងគាំទ្រកិច្ចសហប្រតិបត្តិការកាន់តែប្រសើរឡើង។ លើសពីនេះ ភាគីទាំងពីរបានសន្យាថានឹងបន្តកិច្ចសហការកម្រិតខ្ពស់នៅក្នុងវិស័យផ្សេងទៀត ដូចជាលំហ និងការចែករំលែកព័ត៌មាន៕

ដោយ៖ មូល មិនា (ប្រភព៖ យ៉ុនហាប់)