AKP ភ្នំពេញ ថ្ងៃទី១០ ខែកុម្ភៈ ឆ្នាំ២០២៦ -- យោងតាមក្រសួងការបរទេសអង់គ្លេសបាននិយាយកាលពីថ្ងៃចន្ទថា ចក្រភពអង់គ្លេសបានថ្កោលទោសការសម្រេចចិត្តរបស់គណៈរដ្ឋមន្ត្រីសន្តិសុខអ៊ីស្រាអែលក្នុងការពង្រីកការគ្រប់គ្រងរបស់អ៊ីស្រាអែលលើតំបន់វែសប៊ែង។

ការិយាល័យបានដកស្រង់សម្តីអ្នកនាំពាក្យម្នាក់ដែលបាននិយាយនៅក្នុងសេចក្តីថ្លែងការណ៍មួយថា «ការផ្លាស់ប្តូរសំខាន់ៗចំពោះដីធ្លីការអនុវត្ត និងអំណាចរដ្ឋបាលដែលបានស្នើឡើងនៅក្នុងតំបន់វែសប៊ែង នឹងប៉ះពាល់ដល់កិច្ចខិតខំប្រឹងប្រែងដើម្បីជំរុញសន្តិភាព និងស្ថិរភាព»។

សេចក្តីថ្លែងការណ៍បានបន្តថា «ចក្រភពអង់គ្លេសបានបញ្ជាក់យ៉ាងច្បាស់ថា ការប៉ុនប៉ងឯកតោភាគីណាមួយដើម្បីផ្លាស់ប្តូរសមាសភាពភូមិសាស្ត្រ ឬប្រជាសាស្ត្ររបស់ប៉ាឡេស្ទីនគឺមិនអាចទទួលយកបានទាំងស្រុង ហើយនឹងមិនស៊ីសង្វាក់គ្នានឹងច្បាប់អន្តរជាតិ។ យើងសូមអំពាវនាវឱ្យអ៊ីស្រាអែលបញ្ច្រាសការសម្រេចចិត្តទាំងនេះជាបន្ទាន់»។

សេចក្តីថ្លែងការណ៍បានបន្ថែមថា «ដំណោះស្រាយរដ្ឋពីរនៅតែជាផ្លូវតែមួយគត់ដែលអាចសម្រេចបានឆ្ពោះទៅរកសន្តិភាពរយៈពេលវែងជាមួយនឹងអ៊ីស្រាអែលដែលមានសុវត្ថិភាព និងសុខស្រួលរស់នៅជាមួយប៉ាឡេស្ទីនដែលមានអធិបតេយ្យភាព»។

គណៈរដ្ឋមន្ត្រីសន្តិសុខអ៊ីស្រាអែលបានអនុម័តការសម្រេចចិត្តកាលពីថ្ងៃអាទិត្យដើម្បីធ្វើឱ្យការគ្រប់គ្រងរបស់អ៊ីស្រាអែលកាន់តែស៊ីជម្រៅលើតំបន់វែសប៊ែង ដែលកាន់កាប់ និងការពង្រីកការតាំងទីលំនៅរបស់ជនជាតិយូដានៅទីនោះ។ ការសម្រេចចិត្តនេះបានបង្កឱ្យមានការថ្កោលទោសពីប្រទេសអារ៉ាប់ និងអ៊ីស្លាមជាច្រើន ក៏ដូចជាសហភាពអឺរ៉ុបផងដែរ៕

ដោយ៖ មូល មិនា (ប្រភព៖ ភីបផលដេលី)