AKP ភ្នំពេញ ថ្ងៃទី១០ ខែកុម្ភៈ ឆ្នាំ២០២៦ -- ក្រសួងការបរទេសម៉ិកស៊ីកូបាននិយាយកាលពីពេលថ្មីៗនេះថា ប្រទេសម៉ិកស៊ិកូបានបញ្ជូនជំនួយមនុស្សធម៌ជាង ៨០០តោនទៅកាន់ប្រទេសគុយបា ដោយបញ្ជាក់សារជាថ្មីនូវគោលនយោបាយសាមគ្គីភាពយូរអង្វែងរបស់ខ្លួនជាមួយប្រទេសក្នុងតំបន់អាម៉េរិកឡាទីនមួយនេះ។

នាវាជំនួយភស្តុភាររបស់កងទ័ពជើងទឹកម៉ិកស៊ិកូចំនួនពីរគ្រឿង គឺនាវាPapaloapan និងនាវា Isla Holbox បានចេញដំណើរពីកំពង់ផែវើរ៉ាគ្រូសដោយដឹកស្បៀងអាហារជាង ៨១៤តោនសម្រាប់ប្រជាជនគុយបា ដោយធ្វើតាមការណែនាំពីលោកប្រធានាធិបតី ក្លូឌៀ ស្សេនបាំ (Claudia Sheinbaum)។

នាវា Papaloapan កំពុងដឹកជញ្ជូនស្បៀងអាហារសំខាន់ៗចំនួន៥៣៦តោន ក៏ដូចជាផលិតផលអនាម័យ ខណៈដែលនាវា Isla Holbox កំពុងដឹកជញ្ជូនទឹកដោះគោម្សៅជាង ២៧៧តោន។

នាវាទាំងនេះត្រូវបានគេរំពឹងថានឹងទៅដល់ប្រទេសគុយបាក្នុងរយៈពេលបួនថ្ងៃ។

ក្រសួងការបរទេសបានបន្ថែមថា ទឹកដោះគោម្សៅ និងសណ្តែកជាង១.៥០០តោននៅតែត្រូវបានបញ្ជូនទៅ។

រដ្ឋាភិបាល​បាន​និយាយ​ថា «តាមរយៈ​សកម្មភាព​ទាំងនេះ រដ្ឋាភិបាល​ម៉ិកស៊ិកូ​បញ្ជាក់សារ​ជាថ្មី​អំពី​គោលការណ៍​មនុស្សធម៌ និង​ស្មារតី​សាមគ្គីភាព​ព្រមទាំង​ការប្តេជ្ញាចិត្ត​របស់ខ្លួន​ចំពោះ​កិច្ចសហប្រតិបត្តិការ​អន្តរជាតិ​ក្នុងចំណោម​ប្រជាជន ជាពិសេស​ជាមួយ​អ្នក​ដែល​ត្រូវការ​ជំនួយ​មនុស្សធម៌​ក្នុង​ស្ថានភាព​អាសន្ន និង​ងាយរងគ្រោះ។ គុយបា និង​ម៉ិកស៊ិកូ ​គឺជា​ប្រទេស​បងប្អូន​គ្នា ជា​អ្នកស្នងមរតក​នៃ​ប្រវត្តិសាស្ត្រ​ដ៏​យូរអង្វែង​នៃ​សាមគ្គីភាព​ដែល​យើង​គោរព​ដល់​សព្វថ្ងៃ»៕

ដោយ៖ យា ចិន្ដាខន្ដី (ប្រភព៖ AA-AKP)