AKP ភ្នំពេញ ថ្ងៃទី០៩ ខែកុម្ភៈ ឆ្នាំ២០២៦ -- លោក ហាស៊ីម ឌីចូចូហាឌីគូស៊ូម៉ូ (Hashim Djojohadikusumo) បេសកជនពិសេសរបស់ប្រធានាធិបតីឥណ្ឌូណេស៊ីទទួលបន្ទុកផ្នែកថាមពល និងអាកាសធាតុ បាននិយាយថារដ្ឋាភិបាលកំពុងកំណត់គោលដៅសាងសង់រោងចក្រថាមពលនុយក្លេអ៊ែរ(PLTN) ជាបណ្តើរៗ ដែលមានសមត្ថភាពផលិតថាមពលបានកម្លាំង ៧ជីហ្គាវ៉ាត់ (GW) នៅត្រឹមឆ្នាំ២០៣៤ ដែលជាផ្នែកមួយនៃយុទ្ធសាស្ត្រផ្លាស់ប្តូរថាមពលជាតិរបស់ប្រទេស។

លោក ហាស៊ីម បាននិយាយថា គម្រោងនេះនឹងចាប់ផ្តើមជាមួយនឹងសមត្ថភាពដំបូងប្រហែល ៥០០មេហ្គាវ៉ាត់ ហើយនឹងត្រូវបានពង្រីកបន្តិចម្តងៗនៅក្នុងឆ្នាំបន្តបន្ទាប់។

លោកបានបន្ថែមថា គម្រោងនេះ គឺជាសមាសធាតុបន្ថែមនៃផែនទីបង្ហាញផ្លូវផ្លាស់ប្តូរថាមពលរបស់ប្រទេសឥណ្ឌូណេស៊ី ដែលបំពេញបន្ថែមការសាងសង់រោងចក្រថាមពលទ្រង់ទ្រាយធំ ដែលបានគូសបញ្ជាក់នៅក្នុងផែនការអាជីវកម្មផ្គត់ផ្គង់អគ្គិសនី (RUPTL)។

លោក ហាស៊ីម បានបញ្ជាក់ថា ក្នុងរយៈពេល ១០ឆ្នាំខាងមុខ រដ្ឋាភិបាលឥណ្ឌូណេស៊ីកំពុងកំណត់គោលដៅសាងសង់សមត្ថភាពផលិតថាមពលថ្មីចំនួន ៧០ជីហ្គាវ៉ាត់ ដោយផ្នែកភាគច្រើនបានមកពីប្រភពថាមពលថ្មី និងថាមពលកកើតឡើងវិញ។

គម្រោងទាំងនេះបានទាក់ទាញចំណាប់អារម្មណ៍យ៉ាងខ្លាំងពីវិនិយោគិន និងអ្នកផ្តល់បច្ចេកវិទ្យាជាច្រើននៅទូទាំងពិភពលោក ដែលបញ្ជាក់ពីការប្តេជ្ញាចិត្តកាន់តែច្បាស់លាស់របស់រដ្ឋាភិបាលឥណ្ឌូណេស៊ីចំពោះថាមពលបៃតង។

ក្រៅពីថាមពលកកើតឡើងវិញ និងថាមពលនុយក្លេអ៊ែរ មន្ត្រីរូបនេះក៏បានទាញការយកចិត្តទុកដាក់ចំពោះតួនាទីរបស់ឧស្ម័នធម្មជាតិ ដែលនៅតែជាឥន្ធនៈអន្តរកាលដើម្បីរក្សាភាពជឿជាក់នៃប្រព័ន្ធអគ្គិសនីជាតិក្នុងអំឡុងពេលអន្តរកាល។

លោក ហាស៊ីម បានសង្កត់ធ្ងន់ថា គោលនយោបាយថាមពលនេះបង្ហាញពីការប្តេជ្ញាចិត្តរបស់រដ្ឋាភិបាលក្នុងការធ្វើឱ្យមានតុល្យភាពរវាងតម្រូវការនៃកំណើនសេដ្ឋកិច្ច សន្តិសុខថាមពល និងការកាត់បន្ថយការបំភាយឧស្ម័នកាបូនប្រកបដោយចីរភាព។

លោកបានកត់សម្គាល់ថា ការសម្រេចចិត្តចាប់ផ្តើមរោងចក្រថាមពលនុយក្លេអ៊ែរក៏នាំមកនូវឱកាសវិនិយោគថ្មីៗផងដែរ ទាំងផ្នែកហិរញ្ញប្បទាន និងការផ្គត់ផ្គង់បច្ចេកវិទ្យា ខណៈដែលតម្រូវការអគ្គិសនីជាតិកើនឡើងសម្រាប់រយៈពេលវែង៕

ដោយ៖ យា ចិន្ដាខន្ដី (ប្រភព៖ VNA)