AKP ភ្នំពេញ ថ្ងៃទី០៤ ខែកុម្ភៈ ឆ្នាំ២០២៦ -- រដ្ឋបាលលោក ដូណាល់ ត្រាំ (Donald Trump) មានគម្រោងប្រើប្រាស់ថវិកាប្រមាណជិត ១២ប៊ីលានដុល្លារអាម៉េរិក ដើម្បីបង្កើតទុនបម្រុងជាយុទ្ធសាស្ត្រសម្រាប់សារធាតុរ៉ែកម្ររបស់ផែនដី ដែលជាឃ្លាំងស្តុកទុកដែលអាចទប់ទល់នឹងសមត្ថភាពរបស់ប្រទេសចិនក្នុងការប្រើប្រាស់ឥទ្ធិពលរបស់ខ្លួនលើលោហធាតុដែលពិបាកកែច្នៃទាំងនេះជាកម្លាំងចលករក្នុងកិច្ចចរចាពាណិជ្ជកម្ម។

ប្រធានាធិបតីសហរដ្ឋអាមេរិក លោក ដូណាល់ ត្រាំ កាលពីថ្ងៃចន្ទបានប្រកាសពីការចាប់ផ្តើមនៃគម្រោង «Project Vault» ដែលដំបូងឡើយនឹងត្រូវបានផ្តល់មូលនិធិដោយប្រាក់កម្ចីចំនួន ១០ប៊ីលានដុល្លារអាម៉េរិកពីធនាគារ Export-Import របស់សហរដ្ឋអាមេរិក និងដើមទុនឯកជនប្រមាណជិត ១,៦៧ប៊ីលានដុល្លារអាម៉េរិក។ សារធាតុរ៉ែដែលរក្សាទុកក្នុងទុនបម្រុងនេះនឹងជួយការពារក្រុមហ៊ុនផលិតរថយន្ត គ្រឿងអេឡិចត្រូនិច និងទំនិញផ្សេងៗទៀតពីការរំខានដល់ខ្សែសង្វាក់ផ្គត់ផ្គង់ណាមួយ។

ក្នុងអំឡុងពេលនៃកិច្ចចរចាពាណិជ្ជកម្មកាលពីឆ្នាំមុន ដែលជំរុញដោយការបង្កើនពន្ធគយរបស់លោក ត្រាំ រដ្ឋាភិបាលចិនបានរឹតត្បិតការនាំចេញធាតុរ៉ែផែនដីដ៏កម្រ ដែលត្រូវការសម្រាប់ការផលិតម៉ាស៊ីនយន្តហោះ ប្រព័ន្ធរ៉ាដា រថយន្តអគ្គិសនី កុំព្យូទ័រយួរដៃ និងទូរស័ព្ទ។

លោក ត្រាំ បាននិយាយដោយសំដៅទៅលើការប្រឈមមុខដាក់គ្នាជាមួយប្រទេសចិនថា «យើងមិនចង់ឆ្លងកាត់អ្វីដែលយើងបានឆ្លងកាត់កាលពីមួយឆ្នាំមុនទេ» ដោយលោកបានបន្ថែមថា នៅទីបំផុត វាពិតជាដំណើរការមែន។ លោកប្រធានាធិបតីបាននិយាយថា លោករំពឹងថារដ្ឋាភិបាលនឹងទទួលបានប្រាក់ចំណេញពីប្រាក់កម្ចី ដែលត្រូវបានប្រើប្រាស់ដើម្បីចាប់ផ្តើមទុនបម្រុងនេះ។

ប្រទេសចិនមានប្រហែល ៧០% នៃការជីកយករ៉ែដ៏កម្ររបស់ពិភពលោក និង ៩០% នៃការកែច្នៃរ៉ែដ៏កម្ររបស់ពិភពលោក ដែលវាបានផ្តល់ឱ្យប្រទេសចិននូវការគ្រប់គ្រងលើវិស័យដែលបានបណ្តាលឱ្យសហរដ្ឋអាមេរិកថែរក្សាប្រភពជំនួសនៃធាតុទាំងនោះ ដោយបង្កើតជាស្តុកស្រដៀងគ្នាទៅនឹងទុនបម្រុងជាតិសម្រាប់ប្រេងកាត។

ទុនបម្រុងយុទ្ធសាស្ត្រនេះត្រូវបានគេរំពឹងថានឹងក្លាយជាចំណុចលេចធ្លោនៃកិច្ចប្រជុំរដ្ឋមន្ត្រី ស្តីពីរ៉ែសំខាន់ៗ ដែលរដ្ឋមន្ត្រីការបរទេសអាម៉េរិក លោក ម៉ាកូ រូប៊ីអូ (Marco Rubio) នឹងធ្វើជាម្ចាស់ផ្ទះនៅក្រសួងការបរទេសនៅថ្ងៃពុធនេះ៕

ដោយ៖ យា ចិន្ដាខន្ដី (ប្រភព៖ កូរ៉េថាមស៍)