AKP ភ្នំពេញ ថ្ងៃទី០២ ខែកុម្ភៈ ឆ្នាំ២០២៦ -- លោក អាបាស់ អារ៉ាកជី (Abbas Araghchi) រដ្ឋមន្ត្រីការបរទេសអ៊ីរ៉ង់ បាននិយាយកាលពីថ្ងៃអាទិត្យថា ទីក្រុងតេអេរ៉ង់ និងទីក្រុងវ៉ាស៊ីនតោន អាចសម្រេចបានកិច្ចព្រមព្រៀងនុយក្លេអ៊ែរដ៏ស្មើភាពមួយក្នុងពេលឆាប់ៗនេះ ដោយឱកាសដើម្បីឈានដល់កិច្ចព្រមព្រៀងបែបនេះមិនគួរត្រូវបានខកខានឡើយ។

កាលពីថ្ងៃសៅរ៍សប្តាហ៍មុន លោក អាលី ឡារីចានី (Ali Larijani) លេខាធិការក្រុមប្រឹក្សាសន្តិសុខជាតិកំពូលអ៊ីរ៉ង់ បាននិយាយថា ការបង្កើតរចនាសម្ព័ន្ធសម្រាប់កិច្ចចរចានុយក្លេអ៊ែររវាងទីក្រុងតេអេរ៉ង់ និងទីក្រុងវ៉ាស៊ីនតោន កំពុងមានការរីកចម្រើន បើទោះបីជាមានសង្គ្រាមប្រព័ន្ធផ្សព្វផ្សាយដែលបានរៀបចំទុកជាមុនក៏ដោយ។

លោក អារ៉ាកជី បានប្រាប់អ្នកសារព័ត៌មានថា «ចូរកុំនិយាយអំពីរឿងដែលមិនអាចទៅរួច។ ហើយកុំបោះបង់ឱកាសដើម្បីសម្រេចបាននូវកិច្ចព្រមព្រៀងនុយក្លេអ៊ែរដោយស្មើភាពមួយ និងសមធម៌ ដើម្បីធានាថាគ្មានអាវុធនុយក្លេអ៊ែរ។ ដូចដែលខ្ញុំបាននិយាយហើយ គឺអាចសម្រេចបានសូម្បីតែក្នុងរយៈពេលខ្លីខាងមុខក៏ដោយ»។

កាលពីខែមករា ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) បាននិយាយថា «កងនាវាដ៏ធំមួយ» កំពុងធ្វើដំណើរឆ្ពោះទៅកាន់ប្រទេសអ៊ីរ៉ង់ ដោយបន្ថែមថា លោកសង្ឃឹមថា ទីក្រុងតេអេរ៉ង់នឹងយល់ព្រមចរចា និងចុះហត្ថលេខាលើកិច្ចព្រមព្រៀង «ដោយស្មើភាព និងសមធម៌» ដែលពាក់ព័ន្ធនឹងការបោះបង់ចោលអាវុធនុយក្លេអ៊ែរទាំងស្រុង។ លោកប្រធានាធិបតីបានព្រមានថា ប្រសិនបើមិនមានកិច្ចព្រមព្រៀង ស្តីពីកម្មវិធីនុយក្លេអ៊ែររបស់អ៊ីរ៉ង់ ត្រូវបានសម្រេចទេ ការវាយប្រហារណាមួយរបស់សហរដ្ឋអាមេរិកនាពេលអនាគតទៅលើប្រទេសនេះនឹង «អាក្រក់ជាង» ការវាយប្រហារមុនៗទៅទៀត៕

ដោយ៖ យា ចិន្ដាខន្ដី (ប្រភព៖ ស្ពុតនីក)