AKP ភ្នំពេញ ថ្ងៃទី០២ ខែកុម្ភៈ ឆ្នាំ២០២៦ -- យោងតាមសេចក្តីថ្លែងការណ៍របស់យោធា បានឱ្យដឹងថា កងកម្លាំងសន្តិសុខ និងភ្នាក់ងារអនុវត្តន៍ច្បាប់ប៉ាគីស្ថានបាន «ទប់ស្កាត់ផែនការអាក្រក់របស់ភេរវករដោយជោគជ័យ» ដោយបានសម្លាប់ភេរវករចំនួន ៩២នាក់នៅក្នុងខេត្តបាឡូជីស្ថាន ភាគនិរតីនៃប្រទេសកាលពីថ្ងៃសៅរ៍។

សេចក្តីថ្លែងការណ៍នេះបាននិយាយថា ភេរវករបានធ្វើសកម្មភាពភេរវកម្មជាច្រើននៅទូទាំងខេត្ត ដោយសេចក្តីថ្លែងការណ៍បន្ថែមថា ការវាយប្រហារទាំងនោះមានគោលបំណង «រំខានដល់ជីវិតរបស់ប្រជាជនក្នុងតំបន់ និងការអភិវឌ្ឍរបស់ខេត្តបាឡូជីស្ថាន»។

យោធាបាននិយាយថា ជនស៊ីវិលស្លូតត្រង់ចំនួន ១៨នាក់ត្រូវបានសម្លាប់នៅក្នុងស្រុកហ្គាដារ និងស្រុកខារ៉ាន់ ហើយក្នុងអំឡុងពេលប្រតិបត្តិការបោសសម្អាត និងការប្រឈមមុខដាក់គ្នាយ៉ាងខ្លាំង ដោយទាហានចំនួន ១៥នាក់ក៏បានបាត់បង់ជីវិតរបស់ពួកគេផងដែរ។

សេចក្តីថ្លែងការណ៍នេះបានបន្ថែមថា «ជាមួយនឹងប្រតិបត្តិការដ៏ជោគជ័យទាំងនេះក្នុងរយៈពេលពីរថ្ងៃចុងក្រោយនេះ ចំនួនសរុបនៃភេរវករដែលត្រូវបានសម្លាប់នៅក្នុងប្រតិបត្តិការដែលកំពុងបន្តនៅក្នុងខេត្តបាឡូជីស្ថានបានឈានដល់ ១៣៣នាក់» ដោយសេចក្តីថ្លែងការណ៍បានពន្យល់ថា ក្នុងចំណោមពួកគេចំនួន ៤១នាក់ត្រូវបានសម្លាប់កាលពីថ្ងៃសុក្រនៅក្នុងខេត្ត។

សេចក្តីថ្លែងការណ៍នេះបាននិយាយថា ប្រតិបត្តិការបោសសម្អាតនៅក្នុងតំបន់ទាំងនេះកំពុងត្រូវបានធ្វើឡើងជាបន្តបន្ទាប់ ហើយជនល្មើស និងអ្នកសម្របសម្រួលនៃសកម្មភាពភេរវកម្មទាំងនេះនឹងត្រូវនាំខ្លួនទៅកាត់ទោស។

យោធា​បាន​និយាយ​ថា របាយការណ៍​ស៊ើបការណ៍​សម្ងាត់​បាន​បញ្ជាក់​យ៉ាង​ច្បាស់​ថា ការ​វាយប្រហារ​ទាំងនេះ​ត្រូវ​បាន​រៀបចំ​ឡើង​ និង​ដឹកនាំ​ដោយ​មេដឹកនាំ​ក្រុម​ភេរវករ​ដែល​ធ្វើ​ប្រតិបត្តិការ​ពី​ខាងក្រៅ​ប្រទេស​ប៉ាគីស្ថាន៕

ដោយ៖ មូល មិនា (ប្រភព៖ ស៊ីនហួ)