AKP ភ្នំពេញ ថ្ងៃទី០២ ខែកុម្ភៈ ឆ្នាំ២០២៦ -- ប្រទេសម៉ាឡេស៊ី និងសិង្ហបុរី បានបញ្ជាក់សារជាថ្មីនូវតំបន់សេដ្ឋកិច្ចពិសេសចូហរ-សិង្ហបុរី (JS-SEZ) ដែលជាសសរស្តម្ភសំខាន់នៃទំនាក់ទំនងសេដ្ឋកិច្ចទ្វេភាគី ក្នុងអំឡុងពេលនៃកិច្ចប្រជុំរវាងរដ្ឋមន្ត្រីក្រសួងសេដ្ឋកិច្ចម៉ាឡេស៊ី លោក អាក់ម៉ាល់ ណាស្រ៊ុលឡា ម៉ូដ ណាសៀ (Akmal Nasrullah Mohd Nasir) និងរដ្ឋមន្ត្រីក្រសួងអភិវឌ្ឍន៍ជាតិសិង្ហបុរី លោក ជី ហុងតាត (Chee Hong Tat) កាលពីពេលថ្មីៗនេះ។

នៅក្នុងកិច្ចប្រជុំនោះ ភាគីទាំងពីរបានឯកភាពគ្នាថា កិច្ចសហប្រតិបត្តិការចូហរ-សិង្ហបុរី គឺជាភាពជាដៃគូរយៈពេលវែង ដែលមានមូលដ្ឋានលើការជឿទុកចិត្ត ការបន្តគោលនយោបាយ និងអត្ថប្រយោជន៍រួម។

ពួកគេស្វាគមន៍ចំពោះកិច្ចសហការជាបន្តបន្ទាប់ក្នុងការវិនិយោគដែលមានតម្លៃខ្ពស់ ឌីជីថលូបនីយកម្ម ការអភិវឌ្ឍប្រកបដោយចីរភាព និងការអភិវឌ្ឍទេពកោសល្យ ដែលទាំងអស់នេះគាំទ្រដល់ការអនុវត្តតំបន់សេដ្ឋកិច្ចពិសេស JS-SEZ។

រដ្ឋមន្ត្រីទាំងពីរបាននិយាយថា គំនិតផ្តួចផ្តើមនេះកំពុងផ្លាស់ប្តូរពីការធ្វើផែនការទៅជាការអនុវត្ត ដោយរួមបញ្ចូលគ្នានូវទំហំ និងធនធានរបស់ខេត្តចូហរជាមួយនឹងដើមទុន បច្ចេកវិទ្យា និងការតភ្ជាប់សកលលោករបស់ប្រទេសសិង្ហបុរី ដើម្បីទាក់ទាញការវិនិយោគដែលមានតម្លៃខ្ពស់ ពង្រឹងខ្សែសង្វាក់ផ្គត់ផ្គង់ និងបង្កើតការងារដែលមានគុណភាព។

រដ្ឋមន្ត្រីទាំងពីរ​ក៏បាន​ពិភាក្សាគ្នា​អំពី​ការពង្រឹង​គណៈកម្មាធិការ​រដ្ឋមន្ត្រី​សហប្រតិបត្តិការ​ចូហរ-សិង្ហបុរី (JSCMC) ដើម្បី​ផ្តល់​ការត្រួតពិនិត្យឱ្យ​កាន់តែច្បាស់ និង​ការផ្តោត​អារម្មណ៍​កាន់តែច្បាស់ទៅ​លើ​កិច្ចសហប្រតិបត្តិការ​សេដ្ឋកិច្ច ជាពិសេស​ក្រោម​របៀបវារៈ JS-SEZ។ រចនាសម្ព័ន្ធ​អភិបាលកិច្ច​ចុងក្រោយ​នឹង​ត្រូវ​បាន​បង្ហាញ​នៅក្នុង​កិច្ចប្រជុំ JSCMC បន្ទាប់ដែលនឹងធ្វើឡើង​នៅ​ក្នុងប្រទេស​សិង្ហបុរី៕

ដោយ៖ យា ចិន្ដាខន្ដី (ប្រភព៖ VNA)