AKP ភ្នំពេញ ថ្ងៃទី០២ ខែកុម្ភៈ ឆ្នាំ២០២៦ -- កីឡាករវាយកូនបាល់ដ៏មានទេពកោសល្យជនជាតិប៊ុលហ្គារី កីឡាករ ឌីមីតារ គីស៊ីម៉ូវ (Dimitar Kisimov) បានឈ្នះពានរង្វាន់ Grand Slam កម្រិតយុវជនលើកដំបូងរបស់ខ្លួននៅក្នុងការប្រកួតវាយកូនបាល់ជាគូបុរស Australian Open កាលពីថ្ងៃសៅរ៍សប្តាហ៍មុន។ កីឡាករ គីស៊ីម៉ូវ និងកីឡាករ ខុនណូរ ដូអ៊ីក (Connor Doig) មកពីអាហ្វ្រិកខាងត្បូង បានឈ្នះវគ្គផ្តាច់ព្រ័ត្រក្នុងលទ្ធផល ៦-៣ និង ៦-៣ លើក្រុមអូស្ត្រាលី កីឡាករ អ៊ីមើរ៉ាលី អ៊ីប្រៃមី (Ymerali Ibraimi) និងកីឡាករ ឃូភើរ កូស (Cooper Kose)។

កីឡាករ គីស៊ីម៉ូវ អាយុ ១៧ឆ្នាំរូបនេះ បានឈ្នះពានរង្វាន់នេះនៅក្នុងការប្រកួត Grand Slam កម្រិតយុវជនលើកដំបូងរបស់ខ្លួន។

នេះ គឺជាការឈ្នះពានរង្វាន់ Grand Slam កម្រិតយុវជនលើកទីបីជាប់ៗគ្នាហើយរបស់ប៊ុលហ្គារីបន្ទាប់ពីកីឡាករ អ៊ីវ៉ាន់ អ៊ីវ៉ាណូវ (Ivan Ivanov)បានឈ្នះពានរង្វាន់ឯកត្តជននៅ Wimbledon និង US Open កាលពីរដូវកាលមុន។

កីឡាករ គីស៊ីម៉ូវ បាននាំយកពានរង្វាន់ Grand Slam កម្រិតយុវជនលើកទី១១ របស់ខ្លួនមកប្រទេសប៊ុលហ្គារី ដោយសរសេរឈ្មោះរបស់លោកនៅក្នុងសៀវភៅប្រវត្តិសាស្ត្រនៅក្បែរឈ្មោះរបស់កីឡាករ ម៉ានូអ៊ែលឡា ម៉ាលីវ៉ា (Manuela Maleeva) កីឡាករ ម៉ាកដាឡេណា ម៉ាលីវ៉ា (Magdalena Maleeva) កីឡាករ សេស៊ីល ការ៉ាទែនសេវ៉ា (Sesil Karatanceva) កីឡាករ ហ្រ្គីហ្គោរ ឌីមីត្រូវ (Grigor Dimitrov) កីឡាករ អេឌ្រាន អេនឌ្រីវ (Adrian Andreev) និងកីឡាករ អ៊ីវ៉ាន់ អ៊ីវ៉ាណូវ (Ivan Ivanov)៕

ដោយ៖ យា ចិន្ដាខន្ដី (ប្រភព៖ BTA)