AKP ភ្នំពេញ ថ្ងៃទី៣០ ខែមករា ឆ្នាំ២០២៦ -- នៅលើផ្លូវ Oxford ក្នុងទីក្រុងឡុងដ៍ ដែលជាតំបន់ទិញទំនិញដ៏មមាញឹកបំផុតមួយនៅក្នុងចក្រភពអង់គ្លេសអ្នកថ្មើរជើងតែងតែឈប់សម្រាកដើម្បីថតរូបជាមួយទូរសព្ទឆ្លាតវៃរបស់ពួកគេ។ ការក្រឡេកមើលឱ្យកាន់តែជិតបានបង្ហាញថា ឧបករណ៍ទាំងនេះភាគច្រើនមកពីម៉ាករបស់ចិន។

នៅក្នុងហាងលក់រាយមួយ ដែលដំណើរការដោយក្រុមហ៊ុនទូរគមនាគមន៍អង់គ្លេស អតិថិជនជាច្រើនកំពុងសម្លឹងមើលបញ្ជរទូរសព្ទឆ្លាតវៃម៉ាក HONOR របស់ចិន។ ម៉ូដែលនេះត្រូវបានដាក់ឱ្យដំណើរការកាលពីក្នុងខែឧសភា ឆ្នាំមុន។ វាមានមុខងារបញ្ញាសិប្បនិម្មិត (AI)កម្រិតខ្ពស់ និងដំណើរការបានល្អក្នុងការថតរូប និងវីដេអូ ហើយវាមានប្រជាប្រិយភាពខ្លាំងជាមួយអ្នកប្រើប្រាស់។ នេះបើយោងតាមជំនួយការអ្នកគ្រប់គ្រងផ្នែកលក់ដែលមាននាមត្រកូល Kevin នៅហាងនោះ។

ដោយមានបទពិសោធន៍ជិតបួនឆ្នាំក្នុងការលក់ទូរសព្ទចល័ត លោក Kevin បានក្លាយជាសាក្សីនៃការអភិវឌ្ឍម៉ាក HONOR នៅក្នុងចក្រភពអង់គ្លេស។ លោកបាននិយាយថា «កាលពីអតីតកាល អតិថិជនបានសួរថា តើHONOR តំណាងឱ្យអ្វី។ ឥឡូវនេះ ទូរសព្ទរបស់យើងបានក្លាយជាជម្រើសដំបូងសម្រាប់អ្នកទិញជាច្រើន»។

ចាប់តាំងពីចូលទីផ្សារចក្រភពអង់គ្លេសនៅចុងឆ្នាំ២០២១ មក ម៉ាក HONOR បានដាក់ឱ្យដំណើរការម៉ូដែលលំដាប់ខ្ពស់ជាច្រើនដែលមានតម្លៃចន្លោះពី ៧០០ផោន (៩៤៥ដុល្លារអាម៉េរិក) ដល់ ១.៧០០ផោន ដែលទាំងអស់សុទ្ធតែផ្តោតសំខាន់ទៅលើផ្នែកកម្រិតខ្ពស់។

យោងតាមលោក ចាង ពីង (Zhang Bin) នាយកប្រតិបត្តិក្រុមហ៊ុនHONOR UK បានឱ្យដឹងថា ទីផ្សារបានបង្ហាញពីលក្ខណៈពីរយ៉ាង គឺម៉ូដែលលំដាប់ខ្ពស់មានចំនួន ៧០% នៃទីផ្សារ និងបណ្តាញក្រុមហ៊ុនផ្តល់សេវាទូរស័ព្ទរួមចំណែកដល់ ៧០% ទៀត។ លោក ចាង បានបន្ថែមថា ទីផ្សារនេះក៏មានលក្ខណៈពិសេសនៃភក្ដីភាពចំពោះម៉ាកយីហោដ៏រឹងមាំ តម្រូវការលំដាប់ខ្ពស់ដ៏រឹងមាំ និងបណ្តាញចែកចាយខ្ពស់៕

ដោយ៖ យា ចិន្ដាខន្ដី (ប្រភព៖ BRNN)