AKP ភ្នំពេញ ថ្ងៃទី៣០ ខែមករា ឆ្នាំ២០២៦--មហាសន្និបាតលើកទី ១៤ របស់បក្សកុម្មុយនីស្តវៀតណាម បានបិទបញ្ចាប់ដោយជោគជ័យយ៉ាងត្រចះត្រចង់កាលពីថ្ងៃទី២៣ ខែមករា កន្លងទៅ។ មហាសន្និបាតដែលរៀបចំឡើង ៥ ឆ្នាំ ម្ដងលើកនេះទទួលបានការចាប់អារម្មណ៍យ៉ាងខ្លាំងពី សំណាក់មហាជនជុំវិញមូលបទ «ឯកភាព-ប្រជាធិបតេយ្យ-វិន័យ-ទម្លុះរនាំងឧបសគ្គ-អភិវឌ្ឍន៍»។ ក្នុងស្មារតីនេះ មហាសន្និបាតលើកទី ១៤ របស់បក្សកុម្មុយនីស្តវៀតណាម បានផ្ដោតទៅលើស្មារតីស្វ័យភាពជាយុទ្ធសាស្ត្រ ពឹងផ្អែកលើខ្លួនឯង និង ទំនុកចិត្តក្នុងការបោះជំហានយ៉ាងស្វាហាប់ចូលទៅក្នុងយុគសម័យថ្មីនៃប្រទេសវៀតណាមដែលពោរពេញទៅដោយសន្តិភាព ឯករាជ្យ ប្រជាធិបតេយ្យ សម្បូររុងរឿង វិបុលភាព ស៊ីវិល័យនិងសុភមង្គល តាមទិសដៅសង្គមនិយម។

នៅក្នុងសន្និសីទសារព័ត៌មានជំវិញលទ្ធផលនៃមហាសន្និបាតលើកទី ១៤ របស់បក្សកុម្មុយនីស្តវៀតណាម កាលពីថ្ងៃទី២៣ ខែមករា កន្លងទៅ លោកអគ្គលេខាបក្ស តូ ឡឹម ដែលទើបជាប់ឆ្នោតជាលើកទីពីរបានឆ្លើយតបសំណួររបស់អ្នកសារព័ត៌មាន ជុំវិញចំណុចថ្មីៗ នៃមហាសន្និបាតលើកនេះ ក៏ដូចជាការចូលរួមចំណែកនៃប្រទេសវៀតណាមក្នុងការដោះស្រាយបញ្ហាក្នុងតំបន់ និងពិភពលោក។ លោកអគ្គលេខាបក្ស តូ ឡឹម បានបង្ហើបឱ្យដឹងថា ចំណុចថ្មីៗ ទាំងឡាយនៃមហាសន្និបាតលើកទី ១៤ នេះគឺផ្អែកលើការទទួលមរតកបន្តវេន ការជ្រើសរើសយកដោយសម្រិតសម្រាំង និងការបូកបញ្ចូល ចងក្រងមេរៀន ប្រវត្តិសាស្ត្រពីដំណើរការកសាងប្រទេសជាតិនិងការពារទឹកដីជាង ៤ ០០០ ឆ្នាំ របស់ប្រទេសវៀតណាម ក៏ដូចជាដំណើរការអភិវឌ្ឍន៍ប្រទេសជាតិជិត ១០០ ឆ្នាំ ក្រោមការដឹកនាំរបស់បក្សកុម្មុយនិស្តវៀតណាម ការបន្តនៃដំណើរការធ្វើកំណែទម្រង់ដែលផ្តួចផ្តើមឡើងដោយបក្សនិងដឹកនាំការអនុវត្តដោយបក្ស។

បក្សកុម្មុយនីស្តវៀតណាមបានបូកសរុប ដកស្រង់ សំយោគ និងទាញយកបានមេរៀនជាច្រើនដោយផ្អែកលើបទពិសោធន៍ និងប្រពៃណីជាប្រវត្តិសាស្ត្រទាំងនោះ។ តម្រូវការអភិវឌ្ឍន៍ថ្មីនៃប្រទេសជាតិវៀតណាម ក្នុងដំណាក់កាលថ្មីនៅពេលនេះទាមទារឱ្យមានវិធីសាស្រ្ត របៀបគិតតាមបែបថ្មី និងសកម្មភាពថ្មី។ ឯកសារសម្រាប់មហាសន្និបាតលើកទី ១៤ បានបង្ហាញយ៉ាងច្បាស់លាស់ហេតុផលទាំងអស់ដូចបានលើកឡើង។ ដូច្នេះហើយ មហាសន្និបាតលើកទី ១៤ របស់បក្សកុម្មុយនីស្តវៀតណាមមានភារកិច្ចបូកសរុប សំយោគយកចំណុចថ្មីៗ អំពីដំណើរការនៃការធ្វើកំណែទម្រង់ក្នុងអំឡុងពេល ៤០ ឆ្នាំកន្លងមក។ ដំណើរការកំណែទម្រង់នេះ នឹងបន្តទៅមុខថែមទៀត ពីព្រោះវាគឺជាបុព្វហេតុរបស់បក្ស។ 

លោកអគ្គលេខាបក្សកុម្មុយនីស្តវៀតណាម មានប្រសាសន៍បន្ថែមថា៖ "ប្រសិនបើប្រទេសជាតិចង់អភិវឌ្ឍន៍ ប្រសិនបើបក្សចង់រក្សាបានតួនាទីដឹកនាំរបស់ខ្លួន នាំយកភាពសម្បូរ សប្បាយ សុភមង្គលមកជូនប្រជាជននោះ គឺត្រូវតែបន្តការធ្វើកំណែទម្រង់ប្រកបដោយភាពច្នៃប្រឌិត"។

យោងតាមលោក តូ ឡឹម ចំណុចថ្មីសំខាន់ដំបូងគេបង្អស់ ហើយងាយយល់ និងស្រួលកត់សម្គាល់ជាងគេនោះ គឺការផ្លាស់ប្ដូររបៀបគិតតាមបែបថ្មីក្នុងកិច្ចការរៀបចំ ចងក្រងឯកសារសម្រាប់មហាសន្និបាតនោះឯង។ តាមស្មារតីនេះ របាយការណ៍នយោបាយមានការច្របាច់បញ្ចូលរបាយការណ៍ចំនួនបីប្រភេទ គឺរបាយការណ៍នយោបាយ របាយការណ៍សេដ្ឋកិច្ច សង្គម និង របាយការណ៍បូកសរុបការរងារកសាងបក្ស ដែលជាធម្មតាត្រូវបានផ្តាច់ចេញដោយឡែកនៅរៀងរាល់ពេលមហាសន្និបាតមុនៗ ពេលនេះ បានក្លាយឯកសាររួមច្បាប់ មានលក្ខណៈឯកភាព សង្គតិភាព គ្រប់ជ្រុងជ្រោយ បង្ហាញយ៉ាងច្បាស់ចំណុចស្នូល ចំណុចគោលដៅសំខាន់ៗ សង្ខេបខ្លីៗ ងាយយល់ ងាយចងចាំ ហើយមានភាពងាយស្រួលអនុវត្តទៀតផង។ នេះគឺជាវិធីគិតថ្មី និងជាចំណុចលេចធ្លោមួយគួរឱ្យកត់សម្គាល់នៃមហាសន្និបាតលើកនេះ។

ចំណុចថ្មីទីពីរគឺថា មហាសន្និបាតលើកទី ១៤ ប្រព្រឹត្តទៅក្នុងកាលៈទេសៈជាប្រវត្តិសាស្ត្រដ៏សំខាន់មួយ។ បរិបទថ្មីពេលនេះ ទាមទារឱ្យមានចក្ខុវិស័យថ្មីមួយដែលមិនត្រឹមតែសម្រាប់អាណត្តិទី ១៤ ពីឆ្នាំ២០២៦ ដល់ឆ្នាំ ២០៣១ ប៉ុណ្ណោះទេ គឺថែមទាំងជាចក្ខុវិស័យឆ្ពោះទៅដល់ឆ្នាំ២០៤៥ ទៀតផង។ គណៈកម្មាធិការមជ្ឈិមបក្សអាណត្តិទី ១៤ នៃបក្សកុម្មុយនីស្តវៀតណាម មានភារកិច្ចបូកសរុបដំណើរការ ៤០ ឆ្នាំ នៃការអនុវត្តកម្មវិធីនយោបាយស្ដីអំពីការកសាងប្រទេសជាតិក្នុងដំណាក់កាលអន្តរកាល នៃការឈានឡើងតាមទិសដៅសង្គមនិយមដែលធ្លាប់បានបំពេញបន្ថែមនិងធ្វើឱ្យល្អប្រើសើរបន្ថែមទៀតកាលពីឆ្នាំ ២០១១។ 

យោងតាមលោកអគ្គលេខាបក្ស តូ ឡឹម ផ្លូវដែលបានធ្វើដំណើរក្នុងរយៈពេល ១០០ ឆ្នាំ កន្លងមក ដោយអនុវត្តន៍តាមមាគ៌ាដែល បានគូសវាសដោយបក្សកុម្មុយនីស្តវៀតណាមចាប់តាំងពីឆ្នាំ១៩៣០ នោះ សម្រេចបានលទ្ធផលធំធេងដ៏អស្ចារ្យជាច្រើន។ ដូច្នេះហើយ ការងារបូកសរុបនេះ មិនគ្រាន់តែជាការក្រឡេកមើលប្រវត្តិសាស្ត្រឡើងវិញប៉ុណ្ណោះទេ ប៉ុន្តែត្រូវកសាងចក្ខុវិស័យ សម្រាប់រយៈពេល ១០០ ឆ្នាំ ខាងមុខទៀត ពោលគឺដល់ឆ្នាំ ២១៣០ ប្រទេសវៀតណាម នឹងក្លាយទៅជាយ៉ាងណាក្រោមការដឹកនាំរបស់បក្សកុម្មុយនីស្តវៀតណាម។

តាមតាមលោកអគ្គលេខាបក្សកុម្មុយនិស្តវៀតណាម ចំណុចថ្មីបន្ទាប់គឺថាការអភិវឌ្ឍរបស់ប្រទេសវៀតណាមក្នុងដំណាក់កាលថ្មីនេះ ត្រូវតែលឿនប្រកបដោយប្រសិទ្ធភាព និងសកម្ម ដូច្នេះហើយគំរូម៉ូដែលអភិវឌ្ឍន៍សមស្របមួយត្រូវតែបង្កើតឡើង។ រីឯក្នុងវិស័យសេដ្ឋកិច្ច វៀតណាម ត្រូវកសាងគំរូម៉ូដែលអភិវឌ្ឍន៍ថ្មីដើម្បីឱ្យទទួលបានកំណើនពីរខ្ទង់ គឺបានសេចក្ដីថា ត្រូវធ្វើយ៉ាងណាដើម្បីសម្រេចឱ្យបានកំណើនសេដ្ឋកិច្ចចាប់ពី ១០% ឡើងទៅក្នុងមួយឆ្នាំ។ លោកអគ្គលេខាបក្ស តូ ឡឹម បានសង្កត់ធ្ងន់ថា៖ "ការអភិវឌ្ឍត្រូវសម្រេចបានកំណើនពីរខ្ទង់ ទើបសម្រេចបានគោលដៅទាំងឡាយដែលបានដាក់ចេញ ដូច្នេះហើយត្រូវតែផ្លាស់ប្តូរគំរូម៉ូដែលកំណើន"។

ឆ្លើយតបសំណួររបស់អ្នកយកព័ត៌មានមកពីទូរទស្សន៍ NHK (ជប៉ុន) ទាក់ទងនឹងការធ្វើយ៉ាងណាដើម្បីសម្រេចបានសមាហរណកម្មអន្តរជាតិដ៏ទូលំទូលាយ និង ប្រកបដោយប្រសិទ្ធភាពក្នុងបរិបទពិភពលោកកំពុងមាននិន្នាការឆ្ពោះទៅរកកាបែកបាក់ បំបែកជាបំណែកតូចៗ លោកអគ្គលេខាបក្សកុម្មុយនីស្តវៀតណាម មានប្រសាសន៍ថា សមាហរណកម្មអន្តរជាតិជាកិច្ចការមានសារៈសំខាន់សម្រាប់ការអភិវឌ្ឍប្រទេសជាតិ។ "យើងជឿជាក់ថា សមាហរណកម្មអន្តរជាតិគួរតែត្រូវបានឱ្យតម្លៃ និងលើកកម្ពស់ដល់កម្រិតថ្មីមួយទៀត។ ត្រូវចាត់ទុកការធ្វើសមាហរណកម្មអន្តរជាតិមិនត្រឹមតែជាកម្លាំងចលករ ដ៏សំខាន់សម្រាប់ការអភិវឌ្ឍប៉ុណ្ណោះទេ ប៉ុន្តែវាជាវិធីសាស្ត្រចម្បងៗ ដើម្បីសម្រេចបាននូវគោលដៅយុទ្ធសាស្ត្ររបស់ប្រទេសជាតិផងដែរ"។ នេះបើតាមប្រសាសន៍របស់លោក តូ ឡាំ។

នៅក្នុងដំណាក់កាលថ្មីនេះ ប្រទេសវៀតណាម បានដាក់ចេញគោលការណ៍បន្តជំរុញឱ្យបានខ្លាំងក្លានូវកិច្ចការសមាហរណកម្មអន្តរជាតិតាមទិសដៅបង្វែរពី "ទទួល” ទៅជា “ចូលរួមចំណែក" បង្វែរពី "សមាហរណកម្មស៊ីជម្រៅ” ទៅជា “សមាហរណកម្មយ៉ាងពេញលេញ" ហើយបង្វែរពី  "ជំហរនៃប្រទេសដើរតាមក្រោយគេដើម្បីសមាហរណកម្មពិភពលោក” ទៅជា “ប្រទេសឈានមុខមួយដែលនាំមុខគេក្នុងវិស័យថ្មីៗ"។

លោកអគ្គលេខាបក្សកុម្មុយនីស្តវៀតណាម តូ ឡឹម ក៏បានលើកឡើងពីអាទិភាពមួយចំនួនក្នុងការធ្វើសមាហរណកម្មអន្តរជាតិ។ តាមប្រសាសន៍របស់លោក ដើម្បីសម្រេចបានកំណើនពីរខ្ទង់ ប្រទេសវៀតណាមបានកំណត់យកការធ្វើសមាហរណកម្មសេដ្ឋកិច្ចជាចំណុចស្នូល បានសេចក្ដីថាការធ្វើសមាហរណកម្មក្នុងវិស័យផ្សេងៗត្រូវតែជួយសម្រួលដល់ការធ្វើសមាហរណកម្ម សេដ្ឋកិច្ច។

ជាមួយគ្នានេះដែរ ប្រទេសវៀតណាម ក៏ត្រូវការចាំបាច់ការធ្វើសមាហរណកម្មទាំងខាងនយោបាយ សន្តិសុខ និងការពារជាតិ ក្នុងគោលបំណងឆ្ពោះទៅរកគោលដៅពង្រឹងសក្តានុពល ជំហរ និងកិត្យានុភាពនៃប្រទេសជាតិ ដើរទន្ទឹមជាមួយនឹងការពង្រឹងស្វ័យភាពជាយុទ្ធសាស្ត្រ ការពឹងផ្អែកលើខ្លួនឯង ភាពធន់ និងរីកចម្រើនដោយពឹងផ្អែកលើខ្លួនឯង៕

ដោយ៖ សុខ សន្តិភាព, រូបថត៖ VNA