AKP ភ្នំពេញ ថ្ងៃទី៣០ ខែមករា ឆ្នាំ២០២៦ -- លោក គីម យុនឌុក (Kim Yun-duk) រដ្ឋមន្ត្រីក្រសួងដែនដីរបស់ប្រទេសកូរ៉េខាងត្បូងបាននិយាយកាលពីថ្ងៃព្រហស្បតិ៍ថា រដ្ឋាភិបាលនឹងពង្រីកការផ្គត់ផ្គង់លំនៅដ្ឋានឱ្យបានយ៉ាងឆាប់រហ័សសម្រាប់យុវជន និងគូស្វាមីភរិយាថ្មីថ្មោងនៅក្នុងតំបន់ទីប្រជុំជននៃទីក្រុងសេអ៊ូល ដែលជាផ្នែកមួយនៃកិច្ចខិតខំប្រឹងប្រែងដើម្បីធ្វើឱ្យទីផ្សារអចលនទ្រព្យដែលមានការកើនឡើងខ្លាំងឡើងៗមានស្ថេរភាព។

លោក គីម បានធ្វើការកត់សម្គាល់នេះក្នុងអំឡុងពេលនៃកិច្ចពិគ្រោះយោបល់រវាងគណបក្សប្រជាធិបតេយ្យកូរ៉េ (DPK) ដែលកំពុងកាន់អំណាចនិងរដ្ឋាភិបាលនៅឯរដ្ឋសភា ជាកន្លែងដែលភាគីទាំងពីរបានពិភាក្សាគ្នាអំពីវិធីជំរុញការផ្គត់ផ្គង់លំនៅដ្ឋាននៅក្នុងតំបន់ទីក្រុង ចំពេលដែលមានការព្រួយបារម្ភអំពីការកើនឡើងនៃតម្លៃផ្ទះ។

លោក គីម បាននិយាយថា «រដ្ឋាភិបាលនឹងចាត់វិធានការយ៉ាងឆាប់រហ័សដើម្បីផ្តល់លំនៅដ្ឋានសម្រាប់យុវជន និងគូស្វាមីភរិយាថ្មីថ្មោងនៅក្នុងតំបន់ទីប្រជុំជននៃទីក្រុងសេអ៊ូល។ រដ្ឋាភិបាលនឹងខិតខំប្រឹងប្រែងឱ្យអស់ពីសមត្ថភាព ដើម្បីផ្តល់លំនៅដ្ឋានដែលមានស្ថេរភាពសម្រាប់អ្នកដែលរស់នៅក្នុងបរិយាកាសលំនៅដ្ឋានមិនល្អ និងមានការព្រួយបារម្ភអំពីតម្លៃផ្ទះថ្លៃ»។

រដ្ឋាភិបាលមានគម្រោងប្រកាសវិធានការផ្គត់ផ្គង់លំនៅដ្ឋានបន្ថែមសម្រាប់ទីក្រុងសេអ៊ូល និងជុំវិញខេត្តគ្យឹងគី បន្ទាប់ពីការសន្យាពីមុនរបស់ខ្លួននៅក្នុងខែកញ្ញា ដើម្បីចាប់ផ្តើមការសាងសង់ផ្ទះជាង ១,៣៥លានខ្នងនៅទូទាំងប្រទេសត្រឹមឆ្នាំ២០៣០។

លោក គីម បាននិយាយថា រដ្ឋាភិបាលបានផ្តោតការយកចិត្តទុកដាក់ទៅលើការកែសម្រួលបទប្បញ្ញត្តិកាលពីឆ្នាំមុន ដើម្បីដាក់ជាមូលដ្ឋានគ្រឹះសម្រាប់ការពង្រីកការផ្គត់ផ្គង់ ហើយបានសន្យាថានឹងអនុវត្តវិធានការទាំងនោះនៅក្នុងឆ្នាំនេះ ដោយលោកបានកត់សម្គាល់ថា ការប្រកាសបន្ថែមទៀតនឹងត្រូវធ្វើឡើងដោយសម្របសម្រួលយ៉ាងជិតស្និទ្ធជាមួយគណបក្សកាន់អំណាច។

លោក ហាន ជុងអេ (Han Jeoung-ae) ប្រធានគណៈកម្មាធិការគោលនយោបាយរបស់គណបក្សប្រជាធិបតេយ្យកូរ៉េ (DPK) បាននិយាយថា វិធានការនាពេលខាងមុខនេះមានគោលបំណងបំពេញបន្ថែមផែនការផ្គត់ផ្គង់លំនៅដ្ឋានពីមុនរបស់រដ្ឋាភិបាល៕

ដោយ៖ យា ចិន្ដាខន្ដី (ប្រភព៖ កូរ៉េថាមស៍)