AKP ភ្នំពេញ ថ្ងៃទី៣០ ខែមករា ឆ្នាំ២០២៦ -- ប្រធានាធិបតីកូរ៉េខាងត្បូង លោក លី ជេម្យុង (Lee Jae Myung) កាលពីថ្ងៃព្រហស្បតិ៍ បានអំពាវនាវឱ្យមានកិច្ចខិតខំប្រឹងប្រែងដើម្បីពង្រឹងសុវត្ថិភាពសង្គម និងបន្ធូរបន្ថយផលប៉ះពាល់ពីការប្រើប្រាស់បច្ចេកវិទ្យាបញ្ញាសិប្បនិម្មិត (AI) ដោយសង្កត់ធ្ងន់ទៅលើការរៀបចំយ៉ាងហ្មត់ចត់សម្រាប់ការផ្លាស់ប្តូរ AI។

លោក លី បានដោះស្រាយកង្វល់ដែលមានការកើនឡើងកាន់តែខ្លាំងទៅលើការផ្លាស់ប្តូរនៅក្នុងទីផ្សារការងារក្នុងយុគសម័យ AI ដោយលើកឡើងពីការជំទាស់របស់សហជីពកម្មករនៅក្នុងក្រុមហ៊ុន Hyundai Motor ចំពោះការដាក់ពង្រាយមនុស្សយន្តដែលដំណើរការដោយ AI នៅលើខ្សែសង្វាក់ផលិតកម្ម ដែលធ្វើឱ្យមានការបារម្ភកើនឡើង។

លោក លី បាននិយាយក្នុងអំឡុងពេលជួបជាមួយជំនួយការជាន់ខ្ពស់នៅការិយាល័យចឹងវ៉ាដេថា «យើងមិនអាចជៀសវាងកង់ដ៏ធំដែលរំកិលមករកយើងបានទេ។ នៅទីបញ្ចប់ យើងត្រូវសម្របខ្លួនឱ្យបានឆាប់រហ័ស»។

លោកបានកត់សម្គាល់ថា ការសន្យាពីមុនរបស់លោកក្នុងការពង្រីកបណ្តាញសុវត្ថិភាពសង្គមក្នុងអំឡុងពេលកាន់តំណែងជាអភិបាលក្រុងសឹងណាម ក្នុងខេត្តគ្យឹងគី ទទួលបានការគាំទ្រយ៉ាងខ្លាំង ចំពេលដែលមានការរីករាលដាលយ៉ាងឆាប់រហ័សនៃបច្ចេកវិទ្យា AI។

លោកបាននិយាយថា «ហាក់ដូចជាមានការឯកភាពគ្នាកាន់តែខ្លាំងឡើងទៅលើតម្រូវការសម្រាប់គោលនយោបាយសង្គមជាមូលដ្ឋាន ដើម្បីត្រៀមខ្លួនសម្រាប់ការបែកបាក់ខ្លាំងនៅក្នុងសង្គមដែលជំរុញដោយ AI»៕

ដោយ៖ យា ចិន្ដាខន្ដី (ប្រភព៖ កូរ៉េថាមស៍)