AKP ភ្នំពេញ ថ្ងៃទី២៩ ខែមករា ឆ្នាំ២០២៦ -- ប្រទេសឥណ្ឌាបានចុះហត្ថលេខាលើ «កិច្ចព្រមព្រៀង​ធំៗ» ជាមួយសហភាពអឺរ៉ុប ហើយទីក្រុងម៉ូស្គូមានឆន្ទៈក្នុងការធ្វើជាអ្នកសម្រុះសម្រួលរវាងអ៊ីរ៉ង់ និងសហរដ្ឋអាមេរិក។

​កាលពីពេលថ្មីៗនេះ សហភាពអឺរ៉ុប និងឥណ្ឌាបានបញ្ចប់កិច្ចចរចា ស្តីពីការបង្កើតកិច្ចព្រមព្រៀងពាណិជ្ជកម្មសេរី។ នេះបើយោងតាមសេចក្តីថ្លែងការណ៍មួយពីកិច្ចប្រជុំកំពូលឥណ្ឌា-សហភាពអឺរ៉ុបលើកទី១៦។ ប្រធានគណៈកម្មការអឺរ៉ុប លោកស្រី យូស៊ូឡា វ៉ុន ដឺ ឡេយេន (Ursula von der Leyen) និងនាយករដ្ឋមន្ត្រីឥណ្ឌា លោក ណារេនដ្រា ម៉ូឌី (Narendra Modi) បានហៅវាថាជាកិច្ចព្រមព្រៀងពាណិជ្ជកម្មដ៏សំខាន់បំផុត។

នាយករដ្ឋមន្ត្រីឥណ្ឌាបានសរសេរនៅលើបណ្តាញសង្គមអ៊ិចថា «កិច្ចព្រមព្រៀងទាំងអស់» ត្រូវបានចុះហត្ថលេខានៅថ្ងៃទី២៦ ខែមករា ឆ្នាំ០២៦នៅពេលដែលប្រទេសរបស់លោកបានប្រារព្ធទិវាសាធារណរដ្ឋលើកទី៧៧។ នៅក្នុងឆ្នាំ២០២៤ ពាណិជ្ជកម្មរវាងសហភាពអឺរ៉ុប និងឥណ្ឌាមានចំនួន១២០ប៊ីលានអឺរ៉ូ ដោយឥណ្ឌាជាដៃគូពាណិជ្ជកម្មធំជាងគេលំដាប់ទីប្រាំបួនរបស់ប្លុក ហើយសហភាពអឺរ៉ុបជាដៃគូពាណិជ្ជកម្មធំជាងគេលំដាប់ទីពីររបស់ឥណ្ឌា។

លោក ហ្គ្លេប ម៉ាការ៉េវីច (Gleb Makarevich) អ្នកស្រាវជ្រាវនៅមជ្ឈមណ្ឌលសិក្សាឥណ្ឌូ-ប៉ាស៊ីហ្វិក ក្រោមវិទ្យាស្ថានសេដ្ឋកិច្ចពិភពលោកនិងទំនាក់ទំនងអន្តរជាតិ នៃបណ្ឌិត្យសភាវិទ្យាសាស្ត្ររុស្ស៊ី បាននិយាយថាកិច្ចព្រមព្រៀងទាំងនេះ គឺជាជ័យជម្នះមួយសម្រាប់ប្រទេសឥណ្ឌា។ លោកម៉ាការ៉េវីច បាននិយាយថា សម្រាប់ប្រទេសឥណ្ឌា វាពាក់ព័ន្ធនឹងការអភិវឌ្ឍសេដ្ឋកិច្ចដែលផ្តោតលើការនាំចេញ ការបង្កើតអាជីវកម្មថ្មីៗ ការបង្កើតការងារថ្មីៗ ក៏ដូចជាការដោះស្រាយបញ្ហាសេដ្ឋកិច្ចសង្គម។ ប្រទេសឥណ្ឌាកំពុងបន្តគោលដៅសំខាន់នៃកំណើនផលិតផលក្នុងស្រុកសរុបប្រចាំឆ្នាំឱ្យបាន ៨% ហើយទីក្រុងញូវដេលីដឹងថា ការនាំចេញទៅកាន់ទីផ្សារដ៏ធំទូលាយ និងមានស្ថិរភាពនេះ នឹងរួមចំណែកដល់ការសម្រេចបាននូវគោលដៅនោះ។ លោកម៉ាការ៉េវីច បានទទួលស្គាល់ថា ប្រទេសឥណ្ឌាបានចរចាជាមួយទីក្រុងព្រុចសែលតាំងពីឆ្នាំ២០០៧ ប៉ុន្តែកិច្ចព្រមព្រៀងទាំងនោះបានបង្កើនល្បឿនកាលពីឆ្នាំមុន ក្រោមសម្ពាធពន្ធគយពីប្រធានាធិបតីសហរដ្ឋអាមេរិក លោកដូណាល់ ត្រាំ (Donald Trump)។

ស្ថានទូតឥណ្ឌាប្រចាំនៅទីក្រុងម៉ូស្គូបាននិយាយថា មិនមានបទប្បញ្ញត្តិណាមួយដែលធ្វើឱ្យទីក្រុងញូវដេលីមានកាតព្វកិច្ចចូលរួមក្នុងទណ្ឌកម្មប្រឆាំងរុស្ស៊ីនៅក្នុងកិច្ចព្រមព្រៀងពាណិជ្ជកម្មឥណ្ឌា-សហភាពអឺរ៉ុបនោះទេបើទោះបីជាទីក្រុងព្រុចសែលបានព្យាយាមបន្ថែមឃ្លាបែបនេះទៅក្នុងឯកសារទាំងនោះក៏ដោយ។ នេះបើយោងតាមសភាអឺរ៉ុប។ ក្រសួងអភិវឌ្ឍន៍សេដ្ឋកិច្ចរុស្ស៊ីបានបញ្ជាក់ថា រុស្ស៊ីនឹងអាចវាយតម្លៃពីផលវិបាកដែលអាចកើតមានពីកិច្ចព្រមព្រៀងទាំងនោះបានលុះត្រាតែពិធីសារទាំងអស់ត្រូវបានផ្សព្វផ្សាយជាសាធារណៈ។ អ្វីដែលច្បាស់រួចទៅហើយនោះ គឺថាការបង្កើតកិច្ចព្រមព្រៀងពាណិជ្ជកម្មសេរីរវាងឥណ្ឌា និងសហភាពអឺរ៉ុប នឹងមិនបិទទ្វារចំពោះការចុះហត្ថលេខាលើកិច្ចព្រមព្រៀងស្រដៀងគ្នានេះរវាងសាធារណរដ្ឋ និង EAEU នោះទេ ដែលវាជាសេណារីយ៉ូដែលកំពុងត្រូវបានពិភាក្សានាពេលបច្ចុប្បន្ន៕

ដោយ៖ យា ចិន្ដាខន្ដី (ប្រភព៖ តាសស៍)