AKP ភ្នំពេញ ថ្ងៃទី២៩ ខែមករា ឆ្នាំ២០២៦ -- រដ្ឋមន្ត្រីក្រសួងការពារជាតិលោក អាន យូប៊ែក (Ahn Gyu-back) និងសមភាគីជប៉ុន លោក ស៊ីនជីរ៉ូ កូអ៊ីហ្ស៊ូមី (Shinjiro Koizumi) នឹងជួបគ្នានៅទីក្រុងយ៉ូគូស៊ូកា របស់ប្រទេសជប៉ុននៅសប្តាហ៍នេះ ដើម្បីពិភាក្សាអំពីបញ្ហាសន្តិសុខក្នុងតំបន់ រួមជាមួយនឹងវិធីដើម្បីពង្រឹងកិច្ចសហប្រតិបត្តិការការពារជាតិរបស់ពួកគេ។

យោងតាមក្រសួងបានឱ្យដឹងថា លោក អាន នឹងចាកចេញទៅកាន់ប្រទេសជប៉ុននៅថ្ងៃព្រហស្បតិ៍ ដើម្បីចូលរួមកិច្ចពិភាក្សារដ្ឋមន្ត្រីការពារជាតិដែលគ្រោងនឹងធ្វើឡើងនៅថ្ងៃបន្ទាប់ នៅទីក្រុងយ៉ូគូស៊ូកា ប្រទេសជប៉ុន ជាកន្លែងដែលកងនាវាទី៧ របស់សហរដ្ឋអាមេរិកមានមូលដ្ឋាននៅទីនោះ។

ក្នុងអំឡុងពេលនៃដំណើរទស្សនកិច្ចរយៈពេល ៣ថ្ងៃរបស់លោកលោក អាន ក៏នឹងទៅទស្សនាកងនាវាទី៧ របស់សហរដ្ឋអាមេរិក និងបណ្ឌិត្យសភាការពារជាតិជប៉ុនផងដែរ។

ដំណើរទស្សនកិច្ចនេះបានកើតឡើង បន្ទាប់ពីប្រធានាធិបតីកូរ៉េខាងត្បូង លោក លី ជេម្យុង (Lee Jae Myung) និងនាយករដ្ឋមន្ត្រីជប៉ុនលោកស្រី សានេ តាកៃជី (Sanae Takaichi) បានជួបគ្នានៅស្រុកកំណើតរបស់លោកស្រី គឺទីក្រុងណារ៉ា កាលពីដើមខែនេះ និងបានពិភាក្សាអំពីវិធីដើម្បីពង្រឹងចំណងមិត្តភាពទ្វេភាគីរបស់ពួកគេ។

លោក អាន និងលោក កូអ៊ីស៊ូមី បានធ្វើកិច្ចពិភាក្សាទ្វេភាគីចុងក្រោយនាដើមខែវិច្ឆិកា នៅខាងក្រៅកិច្ចប្រជុំរដ្ឋមន្ត្រីការពារជាតិអាស៊ានបូកក្នុងទីក្រុងគូឡាឡាំពួ ជាកន្លែងដែលពួកគេបានបញ្ជាក់ជាថ្មីអំពីសារៈសំខាន់នៃកិច្ចសហប្រតិបត្តិការសន្តិសុខត្រីភាគីរបស់ពួកគេជាមួយសហរដ្ឋអាមេរិក ក្នុងការប្រឈមមុខនឹងការគំរាមកំហែងនុយក្លេអ៊ែរ និងមីស៊ីលរបស់ប្រទេសកូរ៉េខាងជើងដែលកំពុងកើនឡើង។

ដំណើរទស្សនកិច្ចរបស់លោក អាន គឺជាដំណើរទស្សនកិច្ចលើកដំបូងរបស់ប្រមុខការពារជាតិទីក្រុងសេអ៊ូលទៅកាន់ប្រទេសជប៉ុន ក្នុងរយៈពេលប្រហែលមួយឆ្នាំកន្លះ ចាប់តាំងពីអតីតរដ្ឋមន្ត្រីការពារជាតិ លោក ស៊ីន វ៉ុនស៊ីក (Shin Won-sik) បានទៅទស្សនកិច្ចទីក្រុងតូក្យូសម្រាប់កិច្ចពិភាក្សាថ្នាក់រដ្ឋមន្ត្រី ក្នុងខែកក្កដា ឆ្នាំ២០២៤៕

ដោយ៖ មូល មិនា (ប្រភព៖ យ៉ុនហាប់)