AKP ភ្នំពេញ ថ្ងៃទី២៩ ខែមករា ឆ្នាំ២០២៦ -- អ្នកជំនាញផ្នែកវេជ្ជសាស្ត្រមកពីប្រទេសចិន និងបុតស្វាណា កាលពីថ្ងៃអង្គារ បានរៀបចំកិច្ចប្រជុំពិភាក្សាតាមប្រព័ន្ធអ៊ីនធឺណិត។

សមាជិកនៃក្រុមគ្រូពេទ្យចិនក្រុមទី១៧ ទៅកាន់ប្រទេសបុតស្វាណានិងសមភាគីក្នុងស្រុករបស់ពួកគេដែលមានជំនាញខាងវេជ្ជសាស្ត្រប្រព័ន្ធទឹកនោមនៅមន្ទីរពេទ្យនានាក្នុងប្រទេសអាហ្វ្រិកខាងត្បូង បានចែករំលែកបទពិសោធន៍ក្នុងអំឡុងពេលកិច្ចប្រជុំតាមប្រព័ន្ធអ៊ីនធឺណិតជាមួយសហការីមកពីមន្ទីរពេទ្យខេត្តហ្វូហ្ស៊ូ ក្នុងខេត្តហ្វូចៀន ភាគអាគ្នេយ៍ប្រទេសចិន។

ពួកគេបានពិភាក្សាអំពីករណីវេជ្ជសាស្ត្រចំនួន ៣ករណីដើម្បីស្វែងរកមតិទីពីរលើការព្យាបាលអ្នកជំងឺដែលមានភាពស្មុគស្មាញ។

លោក អ៊ីវ៉ាន់ ហ្គេតសេ (Ivan Kgetse) អគ្គនាយកមន្ទីរពេទ្យបង្អែកNyangabgwe បានសរសើរគំនិតផ្តួចផ្តើមនេះ ដោយលោកបាននិយាយថាការពិភាក្សាប្រព័ន្ធតាមអ៊ីនធឺណិតនឹងជួយយ៉ាងច្រើនដល់ការកែលម្អការផ្តល់ការថែទាំសុខភាព និងជំរុញប្រព័ន្ធថែទាំសុខភាពរបស់ប្រទេសបុតស្វាណា។

លោក ហ្គេតសេ បានមានប្រសាសន៍ថា «យើងមានឱកាសកាន់តែប្រសើរឡើងក្នុងការប្រៀបធៀបពីរបៀបដែលក្រុមផ្សេងទៀតព្យាបាលអ្នកជំងឺរបស់ពួកគេ ហើយបន្ទាប់មករកវិធីកាន់តែប្រសើរឡើងដើម្បីជួយអ្នកដែលស្វែងរកការយកចិត្តទុកដាក់ផ្នែកវេជ្ជសាស្ត្រជាមួយនឹងធនធានដែលយើងមាន»។

ចំពោះលោក ចេន ហ្គាង (Chen Gang) ប្រធានមន្ទីរពេទ្យខេត្តហ្វូហ្ស៊ូបាននិយាយថា ការពិភាក្សាតាមអ៊ីនធឺណិតនឹងជួយពង្រឹងចំណងមិត្តភាពរវាងមន្ទីរពេទ្យនានា។

លោក ចេន បាននិយាយតាមរយៈតំណភ្ជាប់វីដេអូថា «យើងសង្ឃឹមថាយើងអាចជួយអ្នកជំងឺជាច្រើនតាមរយៈកិច្ចប្រជុំបែបនេះនាពេលអនាគត»ដោយលោកបានបន្ថែមថា លោករំពឹងថាបុគ្គលិកពេទ្យបុតស្វាណានឹងទៅទស្សនាមន្ទីរពេទ្យខេត្ដហ្វូហ្ស៊ូសម្រាប់ការផ្លាស់ប្តូរផ្ទាល់បន្ថែមទៀត។

ចាប់តាំងពីឆ្នាំ១៩៨១ មក ក្រុមគ្រូពេទ្យ និងគិលានុបដ្ឋាយិកាចិនចំនួន១៧ក្រុមត្រូវបានបញ្ជូនទៅធ្វើការនៅក្នុងមន្ទីរពេទ្យនានាក្នុងទីក្រុងហ្គាបូរូននិងទីក្រុងហ្រ្វាន់ស៊ីសថោន ដែលមានចំនួនសរុបជាង ៥០០នាក់ជាអ្នកជំនាញផ្នែកវេជ្ជសាស្ត្រ៕

ដោយ៖ មូល មិនា (ប្រភព៖ ស៊ីនហួ)