AKP ភ្នំពេញ ថ្ងៃទី២៩ ខែមករា ឆ្នាំ២០២៦ -- ក្រសួងការពារជនស៊ីវិល(DCP) បាននិយាយថា ប្រទេសហ្ស៊ីមបាវ៉េបានកត់ត្រាការផ្ទុះឡើងនៃជំងឺអាសន្នរោគនៅក្នុងស្រុករូស៊ីនហ្គា នៃខេត្តម៉ាសូណាលែនដ៍ សេនត្រាល់ដែលបណ្តាលឱ្យមានអ្នកស្លាប់ម្នាក់។

ក្រសួងបាននិយាយថា ករណីជំងឺអាសន្នរោគចំនួន ៣ករណី និងមានអ្នកស្លាប់ម្នាក់ត្រូវបានកត់ត្រានៅក្នុងស្រុកតាមបណ្តោយព្រំដែនជាមួយប្រទេសជិតខាងម៉ូសំប៊ិក។

ក្រសួងបាននិយាយថា មជ្ឈមណ្ឌលព្យាបាលជំងឺអាសន្នរោគមួយត្រូវបានបង្កើតឡើងនៅក្នុងតំបន់នោះ ខណៈពេលដែលប្រព័ន្ធតាមដាន និងឃ្លាំមើលទំនាក់ទំនងត្រូវបានពង្រឹង។

ក្រសួងសុខាភិបាល និងថែទាំកុមាររបស់ប្រទេសហ្ស៊ីមបាវ៉េបានព្រមានសាធារណជនអំពីហានិភ័យកើនឡើងនៃជំងឺអាសន្នរោគដោយសារតែភ្លៀងធ្លាក់ខ្លាំង និងទឹកជំនន់នៅក្នុងតំបន់ភាគច្រើននៃប្រទេស។

ក្រសួងបានជំរុញឱ្យសាធារណជនអនុវត្តន៍តាមវិធានការបង្ការគ្រប់ពេលវេលា បន្តប្រុងប្រយ័ត្ន និងស្វែងរកការព្យាបាលភ្លាមៗនៅពេលដែលមានរោគសញ្ញាកើតឡើង៕

ដោយ៖ មូល មិនា (ប្រភព៖ ស៊ីនហួ)