AKP ភ្នំពេញ ថ្ងៃទី២៧ ខែមករា ឆ្នាំ២០២៦ -- អាជ្ញាធរស៊ីរីបាននិយាយនៅក្នុងសេចក្តីថ្លែងការណ៍មួយថា កាលពីថ្ងៃចន្ទ ប្រទេសហ្ស៊កដានីបានចុះហត្ថលេខាលើកិច្ចព្រមព្រៀងមួយដើម្បីផ្គត់ផ្គង់ឧស្ម័នធម្មជាតិដល់ប្រទេសស៊ីរីតាមរយៈទឹកដីហ្ស៊កដានី។

យោងតាមសេចក្តីថ្លែងការណ៍បានឱ្យដឹងថា ការផ្លាស់ប្តូរនេះគឺជាជំហានដ៏សំខាន់មួយក្នុងការធានាប្រេងឥន្ធនៈសម្រាប់រោងចក្រថាមពល ធ្វើពិពិធកម្មប្រភពឧស្ម័ន និងធ្វើឱ្យការផ្គត់ផ្គង់អគ្គិសនីមានស្ថេរភាពនៅក្នុងប្រទេសស៊ីរី។

កិច្ចព្រមព្រៀងនេះត្រូវបានចុះហត្ថលេខានៅទីក្រុងដាម៉ាស់រវាងក្រុមហ៊ុនប្រេងកាតស៊ីរី និងក្រុមហ៊ុនថាមពលអគ្គិសនីជាតិរបស់ប្រទេសហ្ស៊កដានី ដោយមានវត្តមានរបស់រដ្ឋមន្ត្រីក្រសួងថាមពល និងធនធានរ៉ែហ្ស៊កដានី លោក សាឡេហ៍ អាល់ ខារ៉ាប់សេហ៍ (Saleh Al Kharabsheh) និងសមភាគីស៊ីរី គឺលោក ម៉ូហាមម៉ាដ អាល់ បាសៀ (Mohammad al Bashir)។

ក្រោមកិច្ចព្រមព្រៀងនេះ ប្រទេសហ្ស៊កដានីនឹងផ្គត់ផ្គង់ឧស្ម័នធម្មជាតិប្រហែល ៤លានម៉ែត្រគូប (១៤០លានហ្វីតគូប) ក្នុងមួយថ្ងៃដល់ប្រទេសស៊ីរីដើម្បីគាំទ្រដល់បណ្តាញអគ្គិសនីរបស់ប្រទេស។

មន្ត្រីហ្ស៊កដានីបាននិយាយថា ការដឹកជញ្ជូនឧស្ម័នបានចាប់ផ្តើមរួចហើយនៅថ្ងៃទី១ ខែមករា ក្នុងបរិមាណចន្លោះពី ៣០ ទៅ ៩០លានហ្វីតគូបក្នុងមួយថ្ងៃ។

កិច្ចព្រមព្រៀង​នេះ​កើតឡើង​ខណៈ​ពេល​ដែល​អាជ្ញាធរ​ស៊ីរី​ទើប​តែ​បាន​អះអាង​ឡើង​វិញ​នូវ​ការ​គ្រប់គ្រង​លើ​វាល​ប្រេង និង​ឧស្ម័ន​សំខាន់ៗ និង​ហេដ្ឋារចនាសម្ព័ន្ធ​នៅ​ភាគ​ខាងជើង និងភាគ​ខាងកើត បន្ទាប់​ពី​ការ​រៀបចំ​សន្តិសុខ​ជាមួយ​កងកម្លាំង​ប្រជាធិបតេយ្យ​ស៊ីរី​ដឹកនាំ​ដោយ​ជនជាតិ​ឃឺដ៕

ដោយ៖ មូល មិនា (ប្រភព៖ ស៊ីនហួ)