AKP ភ្នំពេញ ថ្ងៃទី២៣ ខែមករា ឆ្នាំ២០២៦ -- ការិយាល័យរបស់នាយករដ្ឋមន្ត្រីកូរ៉េខាងត្បូងបាននិយាយកាលពីថ្ងៃពុធថា លោក គីម មីនសុក (Kim Min-seok) នឹងទៅបំពេញទស្សនកិច្ចនៅសហរដ្ឋអាមេរិកក្នុងសប្តាហ៍នេះ ដើម្បីជួបជាមួយមន្ត្រីជាន់ខ្ពស់ និងអ្នកតាក់តែងច្បាប់អាមេរិក រួមទាំងកិច្ចប្រជុំដែលអាចធ្វើទៅបានជាមួយអនុប្រធានាធិបតីសហរដ្ឋអាមេរិក លោក ជេ.ឌី. វ៉ានស៍ (J.D. Vance) ។

លោក គីម នឹងទៅបំពេញទស្សនកិច្ចនៅទីក្រុងវ៉ាស៊ីនតោន និងទីក្រុងញូវយ៉ក ចាប់ពីថ្ងៃព្រហស្បតិ៍ដល់ថ្ងៃចន្ទ ក្នុងដំណើរទស្សនកិច្ចក្រៅប្រទេសលើកដំបូងរបស់លោកក្នុងនាមជានាយករដ្ឋមន្ត្រី ព្រមទាំងជួបជាមួយប្រជាជនកូរ៉េនៅក្នុងប្រទេសផងដែរ។

ការិយាល័យបាននិយាយនៅក្នុងសេចក្តីប្រកាសព័ត៌មានមួយថា «ដំណើរទស្សនកិច្ចនេះត្រូវបានគេរំពឹងថានឹងរួមចំណែកជាវិជ្ជមានដល់ការថែរក្សា និងពង្រឹងទំនាក់ទំនងកូរ៉េខាងត្បូង-សហរដ្ឋអាមេរិក ប្រកបដោយស្ថិរភាព»។

ប្រភពព័ត៌មានបាននិយាយថា កិច្ចប្រជុំជាមួយលោក វ៉ានស៍ កំពុងត្រូវបានរៀបចំឡើង ដែលនឹងអនុញ្ញាតឱ្យភាគីទាំងពីរពិភាក្សាអំពីបញ្ហាពន្ធគយ និងពាណិជ្ជកម្មដែលកំពុងបន្ត៕

ដោយ៖ មូល មិនា (ប្រភព៖ យ៉ុនហាប់)