AKP ភ្នំពេញ ថ្ងៃទី២៣ ខែមករា ឆ្នាំ២០២៦ -- អ្នកនាំពាក្យក្រសួងការបរទេសបានប្រកាសកាលពីថ្ងៃព្រហស្បតិ៍ថា លោក ផេតទឺរី អរផូ (Petteri Orpo) នាយករដ្ឋមន្ត្រីហ្វាំងឡង់នឹងមកបំពេញទស្សនកិច្ចជាផ្លូវការនៅប្រទេសចិនចាប់ពីថ្ងៃទី២៥ ដល់ថ្ងៃទី២៨ ខែមករា តាមការអញ្ជើញរបស់នាយករដ្ឋមន្ត្រីចិន លោក លី ឈាង (Li Qiang) ។

ក្នុងអំឡុងពេលទស្សនកិច្ចនេះ ប្រធានាធិបតីចិន លោក ស៊ី ជីនពីង (Xi Jinping) នឹងជួបជាមួយនាយករដ្ឋមន្ត្រីហ្វាំងឡង់ ខណៈដែលនាយករដ្ឋមន្ត្រីចិន លោក លី និងប្រធានគណៈកម្មាធិការអចិន្ត្រៃយ៍នៃសភាប្រជាជនចិន លោក ហ្សៅ ឡេជី (Zhao Leji) នឹងធ្វើកិច្ចចរចា និងជួបជាមួយលោក អរផូ ដើម្បីធ្វើការផ្លាស់ប្តូរទស្សនៈស៊ីជម្រៅលើទំនាក់ទំនងទ្វេភាគី និងបញ្ហាដែលជាកង្វល់រួម។

ដោយកត់សម្គាល់ថា ប្រទេសហ្វាំងឡង់គឺជាប្រទេសមួយក្នុងចំណោមប្រទេសលោកខាងលិចដំបូងគេដែលទទួលស្គាល់ និងបង្កើតទំនាក់ទំនងការទូតជាមួយសាធារណរដ្ឋប្រជាមានិតចិន លោក ហ្គូវ បាននិយាយថា ក្រោមការណែនាំជាយុទ្ធសាស្ត្ររបស់ប្រមុខរដ្ឋទាំងពីរក្នុងប៉ុន្មានឆ្នាំថ្មីៗនេះ ភាពជាដៃគូសហប្រតិបត្តិការប្រភេទថ្មីដែលផ្តោតលើអនាគតរវាងប្រទេសទាំងពីរត្រូវបានពង្រឹង និងកិច្ចសហប្រតិបត្តិការក្នុងវិស័យផ្សេងៗត្រូវបានជំរុញជាបន្តបន្ទាប់។

លោក ហ្គូវ បាននិយាយថា ប្រទេសចិនយកចិត្តទុកដាក់យ៉ាងខ្លាំងចំពោះការអភិវឌ្ឍទំនាក់ទំនងចិន-ហ្វាំងឡង់ ហើយត្រៀមខ្លួនរួចជាស្រេចដើម្បីធ្វើការជាមួយប្រទេសហ្វាំងឡង់ ដើម្បីរក្សាការផ្លាស់ប្តូរកម្រិតកំពូលយ៉ាងជិតស្និទ្ធ ពង្រឹងទំនុកចិត្តគ្នាទៅវិញទៅមកខាងនយោបាយ ពង្រឹងកិច្ចសហប្រតិបត្តិការសេដ្ឋកិច្ច និងពាណិជ្ជកម្ម លើកកម្ពស់ការផ្លាស់ប្តូរប្រជាជន និងវប្បធម៌ លើកកម្ពស់ការយោគយល់គ្នាទៅវិញទៅមក និងកិច្ចសហការក្នុងកិច្ចការពហុភាគី និងរួមគ្នាលើកកម្ពស់ទំនាក់ទំនងទ្វេភាគីដល់កម្ពស់ថ្មីមួយ៕

ដោយ៖ មូល មិនា (ប្រភព៖ ភីបផលដេលី)