AKP ភ្នំពេញ ថ្ងៃទី២៣ ខែមករា ឆ្នាំ២០២៦ -- ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) បានប្រកាសកាលពីថ្ងៃពុធថា លោកកំពុងលុបចោលផែនការពន្ធគយរបស់លោកទៅលើសម្ព័ន្ធមិត្តរបស់អាម៉េរិកនៅអឺរ៉ុប ដោយសារតែការគ្រប់គ្រងរបស់សហរដ្ឋអាមេរិកលើកោះហ្គ្រីនលែនដ៍ បន្ទាប់ពីលោក និងមេដឹកនាំអង្គការណាតូបានយល់ព្រមទៅលើក្របខ័ណ្ឌនៃកិច្ចព្រមព្រៀងនាពេលអនាគត ស្តីពីសន្តិសុខអាកទិក។

ការផ្លាស់ប្ដូរភ្លាមៗនេះបានលេចឡើងនៅប៉ុន្មានម៉ោងប៉ុណ្ណោះបន្ទាប់ពីលោក ត្រាំ បានទទូចថា លោកចង់ទទួលបានកោះហ្គ្រីនលែនដ៍ រួមទាំងសិទ្ធិ កម្មសិទ្ធិ និងភាពជាម្ចាស់» ប៉ុន្តែលោកបាននិយាយថា លោកនឹងមិនប្រើកម្លាំងដើម្បីធ្វើដូច្នេះទេ ខណៈដែលបានចំអកឱ្យសម្ព័ន្ធមិត្តអឺរ៉ុប និងស្បថថា អង្គការណាតូមិនគួរព្យាយាមរារាំងចំពោះការពង្រីកខ្លួនរបស់សហរដ្ឋអាមេរិកឡើយ។

នៅក្នុងសុន្ទរកថាដ៏អស្ចារ្យមួយនៅឯវេទិកាសេដ្ឋកិច្ចពិភពលោក លោកប្រធានាធិបតីអាម៉េរិកបាននិយាយថា លោកកំពុងស្នើសុំទឹកដីដែល «ត្រជាក់ និងមានទីតាំងមិនល្អ» មួយនេះ។ លោកបាននិយាយថា សហរដ្ឋអាមេរិកបានជួយសង្គ្រោះអឺរ៉ុបយ៉ាងមានប្រសិទ្ធភាពក្នុងអំឡុងសង្គ្រាមលោកលើកទី២ ហើយថែមទាំងបានប្រកាសអំពីអង្គការណាតូថា «វាជាការស្នើសុំតិចតួចណាស់ បើប្រៀបធៀបទៅនឹងអ្វីដែលយើងបានផ្តល់ឱ្យពួកគេអស់រយៈពេលជាច្រើនទសវត្សរ៍កន្លងមកនេះ»។

លោក ត្រាំ បាននិយាយថា «យើងប្រហែលជាមិនទទួលបានអ្វីទាំងអស់ លុះត្រាតែខ្ញុំសម្រេចចិត្តប្រើកម្លាំង ដែលយើងមិនអាចបញ្ឈប់បានដោយស្រួលនោះទេ។ ប៉ុន្តែខ្ញុំនឹងមិនធ្វើបែបនោះទេ»៕

ដោយ៖ យា ចិន្ដាខន្ដី (ប្រភព៖ កូរ៉េថាមស៍)