AKP ភ្នំពេញ ថ្ងៃទី២៣ ខែមករា ឆ្នាំ២០២៦ -- ប្រភពការទូតស៊ីរីមួយបានចោទប្រកាន់កងកម្លាំង SDF កាលពីថ្ងៃពុធ ថាបានរំលោភលើកិច្ចព្រមព្រៀងបទឈប់បាញ់ ដោយបញ្ជាក់សារជាថ្មីអំពីសិទ្ធិពេញលេញរបស់រដ្ឋាភិបាលក្នុងការការពារអធិបតេយ្យភាព និងសន្តិសុខជាតិ។

ប្រភពពីក្រសួងការបរទេស បានប្រាប់ទីភ្នាក់ងារសារព័ត៌មានអារ៉ាប់ស៊ីរី (SANA) ថា ការអភិវឌ្ឍនៅភាគខាងកើតទន្លេអឺប្រាតបានកើតឡើងពីគោលនយោបាយរបស់កងកម្លាំង SDF ក្នុងការដាក់ចេញនូវអ្វីដែលបានសម្រេចនៅខាងក្រៅអាជ្ញាធររដ្ឋ។

លោកបាននិយាយថា «អាទិភាពរបស់ទីក្រុងដាម៉ាសនៅតែជាការស្តារនីតិរដ្ឋឡើងវិញ ការការពារជនស៊ីវិល និងការបញ្ចប់វត្តមាននៃសព្វាវុធដែលគ្មានការអនុញ្ញាតទាំងអស់»។

ប្រភពនោះបាននិយាយថា កិច្ចព្រមព្រៀងថ្ងៃទី១០ ខែមីនា ឆ្នាំ២០២៥ ជាមួយកងកម្លាំង SDF បានបរាជ័យដោយសារតែការខ្វះភាពគោរពយ៉ាងម៉ឺងម៉ាត់ និងការប៉ុនប៉ងដាក់ចេញនូវការពិតនៃការបំបែកខ្លួន»។

យោងតាមប្រភពនោះ បានឱ្យដឹងថា កិច្ចព្រមព្រៀងថ្មីមួយដែលសម្រេចបាននៅថ្ងៃទី១៨ ខែមករា ឆ្នាំ២០២៦ បានកើតឡើងបន្ទាប់ពីមធ្យោបាយនយោបាយត្រូវបានចុះខ្សោយ ហើយរដ្ឋបានធ្វើអន្តរាគមន៍ដើម្បីដាក់ចេញនូវស្ថិរភាពឡើងវិញ»។

លោក​បាននិយាយ​ថា «ហានិភ័យ​សន្តិសុខ​កាន់តែ​កើនឡើង ហើយការបរាជ័យ​របស់​រដ្ឋបាល​ខុសច្បាប់បាន​ជំរុញឱ្យ​មាន​កិច្ចព្រមព្រៀង​ចុងក្រោយ​នេះ»។

ប្រភព​ដដែល​បាន​សង្កត់ធ្ងន់​ថា ការ​ដាក់ពង្រាយ​កងកម្លាំង​សន្តិសុខ​ស៊ីរី​ទៅកាន់​តំបន់ចាហ្ស៊ីរ៉ា មាន​គោលបំណង​រក្សា​ការឯកភាព​ជាតិ និង​ទប់ស្កាត់​ការ​បង្ហូរឈាម។

ភាគ​ឦសាន​នៃ​ប្រទេស​ស៊ីរី ដែល​ត្រូវ​បាន​គេ​ស្គាល់​ជាទូទៅ​ថា​ជា​តំបន់ចាហ្ស៊ីរ៉ា រួម​បញ្ចូល​ទឹកដី​របស់​ប្រទេស​នៅ​ភាគ​ខាងកើត និង​ខាងជើង​នៃ​ទន្លេអឺប្រាត។ តំបន់​នេះ ​គឺជា​តំបន់​មួយ​ក្នុងចំណោម​តំបន់​សម្បូរ​ធនធាន​បំផុត​របស់​ប្រទេស​ស៊ីរី ដែល​មាន​ប្រេង និង​ឧស្ម័ន​ជាច្រើន​ ក៏ដូចជា​ធនធាន​ក្រោមដី​ផ្សេងទៀត​។

ប្រភព​ដដែល​បាន​និយាយ​ថា «កិច្ចព្រមព្រៀង​នេះ​តម្រូវឱ្យ​ប្រគល់​អាវុធ​ធុនធ្ងន់ និង​មធ្យម​ទាំងអស់​ទៅ​ឱ្យ​រដ្ឋ​ស៊ីរី ដែល​ជា​អាជ្ញាធរ​តែមួយគត់​ដែល​មាន​សិទ្ធិ​គ្រប់គ្រង​សព្វាវុធ»៕

ដោយ៖ យា ចិន្ដាខន្ដី (ប្រភព៖ AA-AKP)