AKP ភ្នំពេញ ថ្ងៃទី២៣ ខែមករា ឆ្នាំ២០២៦ -- ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) បានប្រកាសជាផ្លូវការនូវក្រុមប្រឹក្សាសន្តិភាពរបស់លោកកាលពីថ្ងៃព្រហស្បតិ៍ ដោយលោកបាននិយាយថា ក្រុមដែលលោកកំពុងបម្រើការជាប្រធាននឹងធ្វើការរួមគ្នាជាមួយអង្គការសហប្រជាជាតិ ដើម្បីដោះស្រាយវិបត្តិនានាហួសពីតំបន់ហ្គាហ្សាស្រ្ទីប។

លោក ត្រាំ បាននិយាយថា «យើងប្តេជ្ញាធានាថា តំបន់ហ្គាហ្សាត្រូវបានរំសាយយោធា គ្រប់គ្រងបានត្រឹមត្រូវ និងកសាងឡើងវិញយ៉ាងស្រស់ស្អាត។ វានឹងក្លាយជាផែនការដ៏អស្ចារ្យមួយ ហើយនោះជាកន្លែងដែលក្រុមប្រឹក្សាសន្តិភាពពិតជាបានចាប់ផ្តើម។ ហើយខ្ញុំគិតថា យើងអាចផ្សព្វផ្សាយវាទៅកាន់រឿងផ្សេងៗទៀត នៅពេលដែលយើងទទួលបានជោគជ័យជាមួយតំបន់ហ្គាហ្សា» ខណៈដែលលោកបានធ្វើជាម្ចាស់ផ្ទះទទួលមេដឹកនាំពិភពលោកប្រមាណជិត ២៤នាក់នៅខាងក្រៅវេទិកាសេដ្ឋកិច្ចពិភពលោកសម្រាប់ពិធីចុះហត្ថលេខា។

លោកបាននិយាយបន្ថែមថា «វានឹងក្លាយជារឿងដ៏អស្ចារ្យមួយដែលត្រូវបានមើលឃើញ។ ហើយយើងអាចធ្វើរឿងផ្សេងៗទៀតបាន។ យើងអាចធ្វើរឿងជាច្រើនទៀត។ នៅពេលដែលក្រុមប្រឹក្សានេះត្រូវបានបង្កើតឡើងទាំងស្រុង យើងអាចធ្វើអ្វីៗដែលយើងចង់ធ្វើ ហើយយើងនឹងធ្វើរួមគ្នាជាមួយអង្គការសហប្រជាជាតិ»។

អ្នកតំណាងមកពីប្រទេសជាច្រើនបានចុះហត្ថលេខាលើឯកសារបង្កើតក្រុមប្រឹក្សានេះ។ ព័ត៌មានលម្អិតអំពីអាណត្តិរបស់ក្រុមប្រឹក្សា ក៏ដូចជាធម្មនុញ្ញរបស់ខ្លួន មិនទាន់មានភ្លាមៗនៅឡើយទេ។

សំណួរជាច្រើនបានអូសបន្លាយពេលជាយូរមកហើយអំពីវិសាលភាពនៃអាណត្តិរបស់ក្រុមប្រឹក្សានេះ ប៉ុន្តែការអត្ថាធិប្បាយរបស់លោក ត្រាំ ហាក់ដូចជាបានបញ្ជាក់ថា វានឹងចូលរួមក្នុងកិច្ចការសកលលោកហួសពីតំបន់ហ្គាហ្សា ខណៈដែលលោកបន្តរិះគន់អ្វីដែលលោកនិយាយថា ជាការបរាជ័យរបស់អង្គការសហប្រជាជាតិក្នុងការប្រើប្រាស់សក្តានុពលដ៏ធំសម្បើមរបស់ខ្លួន។

លោកបាននិយាយថា «មានសក្តានុពលដ៏ធំសម្បើមជាមួយអង្គការសហប្រជាជាតិ។ ហើយខ្ញុំគិតថា ការរួមបញ្ចូលគ្នារវាងក្រុមប្រឹក្សាសន្តិភាពជាមួយអង្គការសហប្រជាជាតិ យើងអាចជាអ្វីដែលពិសេសបំផុតសម្រាប់ពិភពលោក»៕

ដោយ៖ យា ចិន្ដាខន្ដី (ប្រភព៖ AA-AKP)