AKP ភ្នំពេញ ថ្ងៃទី២២ ខែមករា ឆ្នាំ២០២៦ -- ប្រព័ន្ធផ្សព្វផ្សាយបានរាយការណ៍កាលពីថ្ងៃពុធ ដោយបានដកស្រង់សម្តីមនុស្សដែលដឹងអំពីស្ថានភាពនេះថា ប្រទេសភាគច្រើននៅអឺរ៉ុបបានបដិសេធការអញ្ជើញរបស់សហរដ្ឋអាមេរិកឱ្យចូលរួមក្នុងក្រុមប្រឹក្សាសន្តិភាពសម្រាប់តំបន់ហ្គាហ្សា។

សារព័ត៌មានទាំងនោះបានរាយការណ៍ថា ប្រទេសជាច្រើននៅអឺរ៉ុបមានការបារម្ភថា គំនិតផ្តួចផ្តើមដែលស្នើឡើងដោយសហរដ្ឋអាមេរិកនេះ មានបំណងដាក់អង្គការសហប្រជាជាតិនៅដោយឡែកពីវេទិកាសម្រាប់ដោះស្រាយជម្លោះសកលលោក។

ការព្រួយបារម្ភរបស់ប្រទេសនានានៅសហភាពអឺរ៉ុប ក៏បណ្តាលមកពីការពិតដែលថា ការអញ្ជើញឱ្យចូលរួមក្នុងក្រុមប្រឹក្សាសន្តិភាពនេះ ក៏ត្រូវបានដាក់ជូនដល់ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) ផងដែរ។

ការិយាល័យនាយករដ្ឋមន្ត្រីអ៊ីស្រាអែល បាននិយាយកាលពីថ្ងៃពុធថា នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) បានប្រកាសថា លោកទទួលយកសំណើរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) ហើយនឹងក្លាយជាសមាជិកក្រុមប្រឹក្សាសន្តិភាពសម្រាប់តំបន់ហ្គាហ្សា។

នៅពាក់កណ្តាលខែវិច្ឆិកា ក្រុមប្រឹក្សាសន្តិសុខអង្គការសហប្រជាជាតិបានអនុម័តសេចក្តីសម្រេចមួយដែលស្នើឡើងដោយសហរដ្ឋអាមេរិក ដើម្បីគាំទ្រផែនការដ៏ទូលំទូលាយរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ ដើម្បីដោះស្រាយស្ថានការណ៍នៅតំបន់ហ្គាហ្សា។ សមាជិកចំនួន ១៣រូបក្នុងចំណោមសមាជិក ១៥រូបរបស់ក្រុមប្រឹក្សានេះបានបោះឆ្នោតគាំទ្រ ខណៈដែលរុស្ស៊ី និងចិនបានបោះឆ្នោតអនុប្បវាទ។ ផែនការរបស់សហរដ្ឋអាមេរិកសម្រាប់តំបន់ហ្គាហ្សា ស្នើឱ្យមានការគ្រប់គ្រងអន្តរជាតិបណ្តោះអាសន្ននៃតំបន់នេះ និងការបង្កើតក្រុមប្រឹក្សាសន្តិភាពដែលមានលោក ត្រាំ ជាប្រធាន ក៏ដូចជាការដាក់ពង្រាយកម្លាំងស្ថិរភាពអន្តរជាតិផងដែរ៕

ដោយ៖ យា ចិន្ដាខន្ដី (ប្រភព៖ ស្ពុតនីក)