AKP ភ្នំពេញ ថ្ងៃទី២២ ខែមករា ឆ្នាំ២០២៦ -- យោងតាមអគ្គនាយកដ្ឋានគយចិន បានឱ្យដឹងថា ការនាំចេញ-នាំចូលសរុបរបស់ប្រទេសចិនជាមួយអាស៊ានមានលើសពី ១ទ្រីលានដុល្លារអាម៉េរិកនៅក្នុងឆ្នាំ២០២៥។

ក្រុមអ្នកជំនាញចិនបានប្រាប់សេវាកម្មសារព័ត៌មានចិនថា ទំនាក់ទំនងសេដ្ឋកិច្ច-ពាណិជ្ជកម្មចិន-អាស៊ាន ត្រូវបានជំរុញដោយសន្ទុះផ្ទៃក្នុងដ៏រឹងមាំ និងជំរុញវដ្តនៃកំណើនថ្មីមួយ។

លោក ហ៊ូ ជីយ៉ុង (Hu Zhiyong) អ្នកស្រាវជ្រាវនៅវិទ្យាស្ថានសិក្សាអន្តរជាតិនៃបណ្ឌិត្យសភាវិទ្យាសាស្ត្រសង្គមសៀងហៃ បាននិយាយថា បើទោះបីជាមានការជ្រៀតជ្រែកពីមហាអំណាចធំៗពីខាងក្រៅក៏ដោយ ក៏ការនាំចេញរបស់ប្រទេសចិនជាច្រើនទៅកាន់អាស៊ាន គឺមិនអាចជំនួសបានទេ។ ជាលទ្ធផល ពាណិជ្ជកម្មទ្វេភាគីត្រូវបានគេរំពឹងថានឹងបន្តកើនឡើង។

ទន្ទឹមនឹងនេះដែរ លោក ឡី ស៊ាវហួ (Lei Xiaohua) អនុប្រធានវិទ្យាស្ថានសិក្សាអាស៊ីអាគ្នេយ៍នៃបណ្ឌិត្យសភាវិទ្យាសាស្ត្រសង្គមក្វាងស៊ី បាននិយាយថា ការធ្វើឱ្យប្រសើរឡើងនូវឧស្សាហកម្ម និងការវិនិយោគរបស់ប្រទេសចិន នឹងពង្រឹងសមត្ថភាពផលិតកម្មក្នុងស្រុក បង្កើនប្រសិទ្ធភាពរចនាសម្ព័ន្ធ និងគុណភាពនៃការនាំចេញរបស់អាស៊ានទៅកាន់ប្រទេសចិន ព្រមទាំងជំរុញពាណិជ្ជកម្មទ្វេភាគីឱ្យមានតុល្យភាពជាងមុន។

ដោយ​មាន​ទស្សនៈ​ស្រដៀង​គ្នា​នឹង​លោក ហ៊ូ ដែរនោះ លោក ឡី បាន​ព្យាករពណ៍​ថា «សសរស្តម្ភ​ថ្មី» ចំនួន​បី​នៃ​ពាណិជ្ជកម្ម​ចិន-អាស៊ាន​នា​ពេល​អនាគត​អាច​នឹង​លេច​ចេញ​មក ដែលរួម​មាន​សេណារីយ៉ូ​កម្មវិធីបញ្ញាសិប្បនិម្មិត (AI) មនុស្សយន្ត​ដែល​មាន​រូបរាង​ជា​រូបវន្ត និង​ឱសថ​ដ៏​ទំនើប ដែល​នឹង​ជំរុញ​កំណើន​យ៉ាង​ច្រើន​នៃ​បរិមាណ​ពាណិជ្ជកម្ម។

លោក ស៊ូ នីងនីង (Xu Ningning) ប្រធាន​គណៈកម្មាធិការ​សហប្រតិបត្តិការ​ឧស្សាហកម្ម​ភាពជាដៃគូ​សេដ្ឋកិច្ច​គ្រប់ជ្រុងជ្រោយ​ក្នុងតំបន់ (RCEP) ក៏​បាន​ចង្អុល​បង្ហាញ​ផង​ដែរ​ថា ការ​អនុវត្ត​យ៉ាង​ស៊ីជម្រៅ​នៃ​កតិកាសញ្ញា​នេះ​ បាន​ផ្តល់​ផល​ចំណេញ​យ៉ាង​ច្រើន​សម្រាប់​កិច្ច​សហប្រតិបត្តិការ​ក្នុង​តំបន់។ លោក​បាននិយាយ​ថា កិច្ចព្រមព្រៀងពាណិជ្ជកម្ម​សេរី​ចិន-អាស៊ាន ៣.០ នឹង​បង្កើត​ភាព​សហការ​ជាមួយកិច្ចព្រមព្រៀង RCEP ដែល​ជំរុញ​នូវការ​ធ្វើឱ្យ​ប្រសើរ​ឡើង​បន្ថែម​ទៀត​នៃ​ទំនាក់ទំនង៕

ដោយ៖ យា ចិន្ដាខន្ដី (ប្រភព៖ VNA)