AKP ភ្នំពេញ ថ្ងៃទី២១ ខែមករា ឆ្នាំ២០២៦ -- ក្រសួងការបរទេសបាននិយាយកាលពីថ្ងៃអង្គារថា ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) បានអញ្ជើញប្រទេសកូរ៉េខាងត្បូងឱ្យចូលរួមជាមួយក្រុមប្រឹក្សាសន្តិភាពដែលបានស្នើឡើងសម្រាប់តំបន់ហ្គាហ្សា ហើយការចូលរួមដែលអាចកើតមានរបស់ទីក្រុងសេអ៊ូលកំពុង «ស្ថិតក្រោមការពិនិត្យ»។

ក្រសួងបានបញ្ជាក់ពីការអញ្ជើញឱ្យចូលរួមក្នុងគំនិតផ្តួចផ្តើមនេះ ដែលលោក ត្រាំ បាននិយាយថាមានគោលបំណងកសាងសន្តិភាព និងកសាងតំបន់ដែលរងការបំផ្លិចបំផ្លាញដោយសង្គ្រាមឡើងវិញ។ លោក ត្រាំ បានធ្វើការអញ្ជើញដល់ប្រទេសប្រហែល ៦០ រួមមានប្រទេសកាណាដា បារាំង តួកគី ចិន និងអ៊ីស្រាអែល ក៏ដូចជាសហភាពអឺរ៉ុបផងដែរ។ ការអញ្ជើញនេះក៏ត្រូវបានផ្តល់ជូនដល់ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) ផងដែរ។

មន្ត្រីក្រសួងការបរទេសម្នាក់បាននិយាយថា «ការអញ្ជើញត្រូវបានទទួលថ្មីៗនេះ ហើយការសម្រេចចិត្តលើការចូលរួមនឹងត្រូវបានធ្វើឡើងបន្ទាប់ពីការគិតគូរដល់ប្រទេសដែលនឹងចូលរួម»។ «នេះនឹងត្រូវការពេលវេលាដើម្បីពិនិត្យឡើងវិញ»។

នាយករដ្ឋមន្ត្រីអ៊ីស្រាអែល លោក ប៊ែនចាមីន នេតាន់យ៉ាហ៊ូ (Benjamin Netanyahu) បានសម្តែងការជំទាស់នឹងសំណើដែលលោកបាននិយាយថាមិនត្រូវបានសម្របសម្រួលជាមួយប្រទេសរបស់លោកដែលជាភាគីនៃសង្គ្រាមដ៏សាហាវនៅក្នុងទឹកដីប៉ាឡេស្ទីន៕

ដោយ៖ មូល មិនា (ប្រភព៖ យ៉ុនហាប់)