AKP ភ្នំពេញ ថ្ងៃទី២១ ខែមករា ឆ្នាំ២០២៦ -- លោក ហ្សៅ ឡេជី (Zhao Leji) ប្រធានគណៈកម្មាធិការអចិន្ត្រៃយ៍នៃសភាប្រជាជនចិន (NPC) បានជួបពិភាក្សាជាមួយ លោក សារដារ អាយ៉ាហ្ស សាឌីក (Sardar Ayaz Sadiq) ប្រធានរដ្ឋសភាប៉ាគីស្ថាន នៅទីក្រុងប៉េកាំងកាលពីថ្ងៃចន្ទ។

ដោយកត់សម្គាល់ថា ឆ្នាំនេះគឺជាខួបលើកទី៧៥ នៃការបង្កើតទំនាក់ទំនងការទូតរវាងប្រទេសទាំងពីរ លោក ហ្សៅ បាននិយាយថា ប្រទេសចិនត្រៀមខ្លួនរួចជាស្រេចក្នុងការធ្វើការជាមួយប្រទេសប៉ាគីស្ថាន ដើម្បីអនុវត្តន៍ការឯកភាពគ្នាដ៏សំខាន់ដែលសម្រេចបានដោយមេដឹកនាំនៃប្រទេសទាំងពីរ ពន្លឿនការអភិវឌ្ឍសហគមន៍ចិន-ប៉ាគីស្ថាន កាន់តែជិតស្និទ្ធជាមួយនឹងអនាគតរួមគ្នានៅក្នុងយុគសម័យថ្មី និងនាំមកនូវអត្ថប្រយោជន៍កាន់តែច្រើនដល់ប្រជាជនទាំងពីរ។

លោក ហ្សៅ បានបន្ថែមថា ប្រទេសចិនត្រៀមខ្លួនរួចជាស្រេចដើម្បីជំរុញការសាងសង់កំណែ ២.០ ដែលបានធ្វើឱ្យប្រសើរឡើងនៃច្រករបៀងសេដ្ឋកិច្ចចិន-ប៉ាគីស្ថាន (CPEC) និងដើម្បីសម្រេចបាននូវសមិទ្ធផលបន្ថែមទៀតនៅក្នុងវិស័យសំខាន់ៗដូចជា ឧស្សាហកម្ម កសិកម្ម រ៉ែ ការដឹកជញ្ជូន និងជីវភាពរស់នៅរបស់ប្រជាជន។ លោកក៏បានមានប្រសាសន៍ផងដែរថា ប្រទេសចិនគាំទ្រកិច្ចខិតខំប្រឹងប្រែងយ៉ាងម៉ឺងម៉ាត់របស់ប្រទេសប៉ាគីស្ថានក្នុងការប្រយុទ្ធប្រឆាំងនឹងអំពើភេរវកម្ម។

លោក ហ្សៅ បាននិយាយថា សភាប្រជាជនចិន (NPC) មានឆន្ទៈក្នុងការពង្រឹងការផ្លាស់ប្តូរបទពិសោធន៍ជាមួយរដ្ឋសភាប៉ាគីស្ថានលើអភិបាលកិច្ចច្បាប់ ការត្រួតពិនិត្យ និងវិស័យពាក់ព័ន្ធផ្សេងទៀត ដោយផ្តោតលើប្រធានបទដូចជាការរស់ឡើងវិញនៃជនបទ និងការអភិវឌ្ឍបៃតង។

លោក សាឌីក បាននិយាយថា ប្រទេសប៉ាគីស្ថានគាំទ្រយ៉ាងមុតមាំចំពោះជំហររបស់ប្រទេសចិនលើផលប្រយោជន៍ស្នូល និងកង្វល់ធំៗរបស់ខ្លួន រួមទាំងបញ្ហាទាក់ទងនឹងកោះតៃវ៉ាន់ ខេត្តស៊ីនជាំង និងខេត្តស៊ីចាង។

លោកបានកត់សម្គាល់ថា ប្រទេសប៉ាគីស្ថានសង្ឃឹមថានឹងពង្រឹងកិច្ចសហប្រតិបត្តិការជាមួយប្រទេសចិនក្នុងវិស័យដូចជា សេដ្ឋកិច្ច ពាណិជ្ជកម្ម ការវិនិយោគ ការអភិវឌ្ឍហេដ្ឋារចនាសម្ព័ន្ធ ការផ្លាស់ប្ដូរប្រជាជន និងការបណ្តុះបណ្តាលមន្ដ្រី។ លោកបានបន្ថែមថា រដ្ឋសភាប៉ាគីស្ថានមានឆន្ទៈក្នុងការពង្រឹងការផ្លាស់ប្តូរ និងកិច្ចសហប្រតិបត្តិការជាមួយសភាប្រជាជនចិន៕

ដោយ៖ មូល មិនា (ប្រភព៖ ភីបផលដេលី)