AKP ភ្នំពេញ ថ្ងៃទី២០ ខែមករា ឆ្នាំ២០២៦ -- យោងតាមសារព័ត៌មានFinancial Times បានឱ្យដឹងថា សហភាពអឺរ៉ុបកំពុងពិចារណាវាយប្រហារទីក្រុងវ៉ាស៊ីនតោនជាមួយនឹងពន្ធគយចំនួន ៩៣ប៊ីលានអឺរ៉ូ (១០៧,៦៨ប៊ីលានដុល្លារអាម៉េរិក) ឬរឹតត្បិតក្រុមហ៊ុនអាម៉េរិកមួយចំនួនពីទីផ្សាររបស់ប្លុកនេះដើម្បីឆ្លើយតបទៅនឹងការគំរាមកំហែងពន្ធគយរបស់ប្រធានាធិបតីអាម៉េរិកលោក ដូណាល់ ត្រាំ (Donald Trump) ជុំវិញបញ្ហាកោះហ្គ្រីនលែនដ៍ (Greenland)។

ដោយបានដកស្រង់សម្តីមន្ត្រីដែលពាក់ព័ន្ធនឹងការរៀបចំនេះសារព័ត៌មាន Financial Times បាននិយាយថា វិធានការសងសឹកនេះកំពុងត្រូវបានរៀបចំឡើងដើម្បីផ្តល់អំណាចដល់មេដឹកនាំអឺរ៉ុបមុនពេលនៃកិច្ចប្រជុំសំខាន់ៗជាមួយលោក ដូណាល់ ត្រាំ នៅឯវេទិកាសេដ្ឋកិច្ចពិភពលោកនៅទីក្រុងដាវ៉ូសនៅក្នុងសប្តាហ៍នេះ។

ការរាយការណ៍នេះបាននិយាយថា សហភាពអឺរ៉ុបបានរៀបចំបញ្ជីពន្ធគយចាប់តាំងពីឆ្នាំមុនមក ប៉ុន្តែបានផ្អាកវារហូតដល់ថ្ងៃទី០៦ ខែកុម្ភៈ ដើម្បីជៀសវាងសង្គ្រាមពាណិជ្ជកម្ម។ បើទោះជាយ៉ាងណាក៏ដោយ ក្នុងចំណោមការកើនឡើងនៃការបែកបាក់អន្តរអាត្លង់ទិកជុំវិញបញ្ហាកោះហ្គ្រីនលែនដ៍នេះតំណាងសមាជិកសហភាពអឺរ៉ុបបានពិភាក្សាគ្នាអំពីការធ្វើឱ្យសកម្មឡើងវិញកាលពីថ្ងៃអាទិត្យ រួមជាមួយនឹងកិច្ចពិភាក្សាអំពីការប្រើប្រាស់ឧបករណ៍ប្រឆាំងការបង្ខិតបង្ខំ ដែលអាចរារាំងដល់ការចូលទៅប្រើប្រាស់របស់ក្រុមហ៊ុនអាម៉េរិកនៅក្នុងទីផ្សាររបស់ប្លុក។

ការរាយការណ៍នេះបានកើតឡើងបន្ទាប់ពីប្រទេសចំនួនប្រាំបី ដែលត្រូវបានកំណត់គោលដៅដោយផ្ទាល់ដោយពន្ធគយ ដែលបានស្នើឡើងដោយសហរដ្ឋអាមេរិក ដែលរួមមានប្រទេសដាណឺម៉ាក ហ្វាំងឡង់ បារាំងអាល្លឺម៉ង់ ហូឡង់ ន័រវេស ស៊ុយអែត និងចក្រភពអង់គ្លេស បានចេញសេចក្តីថ្លែងការណ៍រួមមួយកាលពីថ្ងៃអាទិត្យ ដោយប្រកាសពី «សាមគ្គីភាពពេញលេញ» ជាមួយប្រទេសដាណឺម៉ាក និងកោះហ្គ្រីនលែនដ៍។

នៅក្នុងការបង្ហោះនៅលើបណ្តាញសង្គមកាលពីថ្ងៃសៅរ៍សប្តាហ៍មុនលោក ត្រាំ បាននិយាយថា សហរដ្ឋអាមេរិកនឹងយកពន្ធគយ ១០% ចាប់ពីថ្ងៃទី០១ ខែកុម្ភៈ ឆ្នាំ២០២៦ ទៅលើទំនិញពីប្រទេសទាំងប្រាំបីដែលបានរៀបរាប់ខាងលើ។ លោកបានព្រមានថា អត្រាពន្ធនេះនឹងកើនឡើងដល់២៥% នៅថ្ងៃទី០១ ខែមិថុនា ឆ្នាំ២០២៦ ហើយនឹងនៅតែមានសុពលភាពរហូតដល់កិច្ចព្រមព្រៀងមួយត្រូវបានសម្រេចសម្រាប់ «ការទិញពេញលេញ និងទាំងស្រុង» នូវកោះហ្រ្គីនលែនដ៍៕

ដោយ៖ យា ចិន្ដាខន្ដី (ប្រភព៖ ឆាយណាដេលី)