AKP ភ្នំពេញ ថ្ងៃទី២០ ខែមករា ឆ្នាំ២០២៦ -- ប្រទេសចិន និងកាណាដា បានសន្យាកាលពីពេលថ្មីៗនេះថានឹងរួមគ្នាគាំទ្រប្រព័ន្ធពាណិជ្ជកម្មពហុភាគី និងតួនាទីស្នូលរបស់អង្គការសហប្រជាជាតិក្នុងកិច្ចការអន្តរជាតិ ខណៈដែលព្រមព្រៀងគ្នាពង្រឹងកិច្ចសន្ទនា និងលើកកម្ពស់កិច្ចសហប្រតិបត្តិការក្នុងវិស័យផ្សេងៗ។

នាយករដ្ឋមន្ត្រីចិន លោក លី ឈៀង (Li Qiang) និងនាយករដ្ឋមន្ត្រីកាណាដា លក ម៉ាក ខានី (Mark Carney) ដែលកំពុងបំពេញទស្សនកិច្ចនៅទីក្រុងប៉េកាំង បានសម្តែងការប្តេជ្ញាចិត្តរបស់ប្រទេសទាំងពីរក្នុងការបង្កើនទំនាក់ទំនងទ្វេភាគី និងការពារពហុភាគីនិយម ក្នុងអំឡុងពេលនៃកិច្ចពិភាក្សារបស់ពួកគេនៅសាលប្រជុំប្រជាជនក្នុងទីក្រុងប៉េកាំង។

លោក ខានី បានទៅដល់ទីក្រុងប៉េកាំងសម្រាប់ដំណើរទស្សនកិច្ចផ្លូវការរយៈពេលបួនថ្ងៃទៅកាន់ប្រទេសចិន ដែលជាដំណើរទស្សនកិច្ចលើកដំបូងទៅកាន់ប្រទេសនេះដោយនាយករដ្ឋមន្ត្រីកាណាដាក្នុងរយៈពេលប្រាំបីឆ្នាំកន្លងមក ដោយបានបញ្ជាក់ពីភាពកក់ក្តៅនៃទំនាក់ទំនងទ្វេភាគីថ្មីៗនេះ។

លោក លី បាននិយាយថា តាមរយៈកិច្ចខិតខំប្រឹងប្រែងរួមគ្នាទំនាក់ទំនងចិន-កាណាដា បានឃើញនូវការផ្លាស់ប្តូរ ដែលត្រូវបានស្វាគមន៍យ៉ាងទូលំទូលាយដោយវិស័យផ្សេងៗនៅក្នុងប្រទេសទាំងពីរ។

លោកបានបន្ថែមថា ការរក្សាការអភិវឌ្ឍដែលមានស្ថានភាពល្អ និងស្ថិរភាពនៃទំនាក់ទំនងចិន-កាណាដា គឺស្របតាមផលប្រយោជន៍រួមរបស់ប្រទេសទាំងពីរ។

លោក លី បាននិយាយថា ដោយឈរនៅចំណុចចាប់ផ្តើមថ្មីមួយប្រទេសចិនមានឆន្ទៈក្នុងការធ្វើការងារជាមួយប្រទេសកាណាដា ដើម្បីរក្សាភាពជាដៃគូយុទ្ធសាស្ត្រ ពង្រឹងកិច្ចសន្ទនា និងការទំនាក់ទំនង បង្កើនទំនុកចិត្តគ្នាទៅវិញទៅមកខាងនយោបាយ គោរពផលប្រយោជន៍ស្នូលរបស់គ្នាទៅវិញទៅមក និងស្វែងរកចំណុចរួម ខណៈដែលរក្សាភាពខុសគ្នា ព្រមទាំងពង្រីកកិច្ចសហប្រតិបត្តិការជាក់ស្តែងជាបន្តបន្ទាប់ ដើម្បីបន្ថែមសន្ទុះកាន់តែខ្លាំងដល់ការអភិវឌ្ឍរបស់ប្រទេសទាំងពីរ។ លោកបានគូសបញ្ជាក់អំពីតម្រូវការសម្រាប់ប្រទេសទាំងពីរ ក្នុងការលើកកម្ពស់កំណើនស្ថិរភាពនៃពាណិជ្ជកម្មទ្វេភាគី៕

ដោយ៖ យា ចិន្ដាខន្ដី (ប្រភព៖ ឆាយណាដេលី)