AKP ភ្នំពេញ ថ្ងៃទី២០ ខែមករា ឆ្នាំ២០២៦ -- ក្រុមប្រឹក្សាអឺរ៉ុបនឹងបើកកិច្ចប្រជុំវិសាមញ្ញមួយក្នុងរយៈពេលប៉ុន្មានថ្ងៃខាងមុខនេះ ដើម្បីពិភាក្សាអំពីផែនការរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) ក្នុងការដាក់ពន្ធគយដែលទាក់ទងនឹងកោះហ្គ្រីនលែនដ៍។ នេះបើយោងតាមប្រធានស្ថាប័ននេះបាននិយាយកាលពីថ្ងៃអាទិត្យ។

លោក អេនតូនីញ៉ូ កូស្តា (Antonio Costa) បានបង្ហោះតាមរយៈបណ្តាញសង្គមអ៊ិចរបស់សហរដ្ឋអាមេរិកថា «ដោយសារសារៈសំខាន់នៃការវិវឌ្ឍថ្មីៗ និងដើម្បីសម្របសម្រួលបន្ថែមទៀត ខ្ញុំបានសម្រេចចិត្តកោះប្រជុំវិសាមញ្ញមួយរបស់ក្រុមប្រឹក្សាអឺរ៉ុបក្នុងរយៈពេលប៉ុន្មានថ្ងៃខាងមុខនេះ»។

លោកបាននិយាយថា រដ្ឋជាសមាជិកសហភាពអឺរ៉ុប បន្ទាប់ពីការពិគ្រោះយោបល់ បានបញ្ជាក់ឡើងវិញនូវការប្តេជ្ញាចិត្តយ៉ាងមុតមាំរបស់យើងចំពោះឯកភាព ច្បាប់អន្តរជាតិ បូរណភាពទឹកដី និងអធិបតេយ្យភាពជាតិ ក៏ដូចជាសាមគ្គីភាពជាមួយប្រទេសដាណឺម៉ាក និងកោះហ្គ្រីនលែនដ៍ និងផលប្រយោជន៍រួមអន្តរអាត្លង់ទិកក្នុងសន្តិភាព និងសន្តិសុខនៅតំបន់អាកទិកជាពិសេសតាមរយៈអង្គការណាតូ។

លោក កូស្តា បានបន្ថែមថា សមាជិកក៏បានបញ្ជាក់ជាថ្មីនូវការវាយតម្លៃរួមគ្នារបស់ពួកគេថា ពន្ធគយនឹងធ្វើឱ្យខូចទំនាក់ទំនងអន្តរអាត្លង់ទិក និងមិនស្របគ្នាជាមួយកិច្ចព្រមព្រៀងពាណិជ្ជកម្ម EU-US ក៏ដូចជាការត្រៀមខ្លួនរបស់ពួកគេក្នុងការការពារប្រឆាំងនឹងការបង្ខិតបង្ខំណាមួយ និងបន្តចូលរួមប្រកបដោយស្ថាបនាជាមួយសហរដ្ឋអាមេរិកទៅលើបញ្ហាដែលមានផលប្រយោជន៍រួម។

រឿងនេះបានកើតឡើងបន្ទាប់ពីប្រធានាធិបតីសហរដ្ឋអាមេរិក លោកដូណាល់ ត្រាំ បាននិយាយកាលពីថ្ងៃសៅរ៍ថា ទីក្រុងវ៉ាស៊ីនតោននឹងដាក់ពន្ធ១០% លើទំនិញពីប្រទេសដាណឺម៉ាក ន័រវេស ស៊ុយអែត បារាំង អាល្លឺម៉ង់ចក្រភពអង់គ្លេស ហូឡង់ និងហ្វាំងឡង់ ចាប់ពីថ្ងៃទី០១ ខែកុម្ភៈ ឆ្នាំ២០២៦ហើយនឹងកើនឡើងដល់ ២៥% នៅក្នុងខែមិថុនា លុះត្រាតែមានកិច្ចព្រមព្រៀងមួយត្រូវបានធ្វើឡើងសម្រាប់អ្វីដែលលោកហៅថា«ការទិញយកកោះហ្រ្គីនលែនដ៍ទាំងស្រុង» ដោយសហរដ្ឋអាមេរិក។

ដោយ៖ យា ចិន្ដាខន្ដី (ប្រភព៖ AA-AKP)