AKP ភ្នំពេញ ថ្ងៃទី២០ ខែមករា ឆ្នាំ២០២៦ -- ប្រធានាធិបតីសហរដ្ឋអាមេរិកលោក ដូណាល់ ត្រាំ​(Donald Trump) បានប្រកាសកាលពីថ្ងៃចន្ទថាទីក្រុងវ៉ាស៊ីនតោននឹងចាត់វិធានការយ៉ាងម៉ឺងម៉ាត់ ដើម្បីលុបបំបាត់ចោលនូវការគំរាមកំហែងរបស់រុស្ស៊ីនៅក្នុងកោះហ្រ្គីនលែនដ៍ (Greenland)។

លោក ត្រាំ បាននិយាយនៅលើបណ្តាញសង្គមរបស់អាមេរិក Truth Social ថា «អង្គការណាតូបានប្រាប់ប្រទេសដាណឺម៉ាកអស់រយៈពេល២០ឆ្នាំមកហើយថា អ្នកត្រូវតែយកការគំរាមកំហែងរបស់រុស្ស៊ីចេញពីកោះហ្រ្គីនលែនដ៍។ ជាអកុសល ប្រទេសដាណឺម៉ាកមិនអាចធ្វើអ្វីវាបានទេ។ឥឡូវនេះដល់ពេលហើយ ហើយវានឹងត្រូវបានធ្វើ!!!»។

កាលពីថ្ងៃអាទិត្យ លោក ម៉ាក រុតតេ (Mark Rutte) អគ្គលេខាធិការអង្គការណាតូ និងលោក ត្រាំ បានពិភាក្សាគ្នាអំពីស្ថានភាពសន្តិសុខនៅកោះហ្រ្គីនលែនដ៍ និងតំបន់អាកទិក នៅក្នុងការសន្ទនាគ្នាតាមទូរស័ព្ទមួយ។ លោករុតតេ បាននិយាយថា អ្នកទាំងពីរ «នឹងបន្តធ្វើការងារទៅលើរឿងនេះ»ហើយលោកបានបន្ថែមថា «ខ្ញុំទន្ទឹងរង់ចាំជួបគាត់ (លោក ត្រាំ) នៅទីក្រុងដាវ៉ូស នៅចុងសប្តាហ៍នេះ»។

កោះហ្រ្គីនលែនដ៍ ដែលជាទឹកដីគ្រប់គ្រងដោយខ្លួនឯងនៅក្នុងព្រះរាជាណាចក្រដាណឺម៉ាក បានទាក់ទាញចំណាប់អារម្មណ៍របស់សហរដ្ឋអាមេរិកជាយូរមកហើយ ដោយសារតែទីតាំងយុទ្ធសាស្ត្រ និងធនធានរ៉ែដ៏ច្រើនសន្ធឹកសន្ធាប់ ក៏ដូចជាការព្រួយបារម្ភអំពីសកម្មភាពរបស់រុស្ស៊ី និងចិនដែលកំពុងកើនឡើង។

នៅក្នុង​ចលនា​ថ្មីមួយ លោក ត្រាំ បាននិយាយកាលពីថ្ងៃសៅរ៍សប្តាហ៍មុនថា ទីក្រុងវ៉ាស៊ីនតោននឹងដាក់ពន្ធគយ ១០% ទៅលើទំនិញពីប្រទេសចំនួនប្រាំបីនៅអឺរ៉ុប ដែលរួមមានប្រទេសដាណឺម៉ាក ន័រវែស ស៊ុយអែតបារាំង អាល្លឺម៉ង់ ចក្រភពអង់គ្លេស ហូឡង់ និងហ្វាំងឡង់ ចាប់ពីថ្ងៃទី០១ខែកុម្ភៈ​ ឆ្នាំ២០២៦ ដោយកើនឡើងដល់ ២៥% នៅក្នុងខែមិថុនាដោយសារតែការជំទាស់របស់ពួកគេចំពោះការគ្រប់គ្រងរបស់សហរដ្ឋអាមេរិកលើកោះហ្រ្គីនលែនដ៍៕

ដោយ៖ យា ចិន្ដាខន្ដី (ប្រភព៖ AA-AKP)