AKP ភ្នំពេញ ថ្ងៃទី១៩ ខែមករា ឆ្នាំ២០២៦ -- លោក មេនហ្រ្វេដ វ៉េប័រ (Manfred Weber) ប្រធានក្រុមការងារគណបក្សប្រជាជនអឺរ៉ុប (EPP) នៅក្នុងសភាអឺរ៉ុប បាននិយាយថា ការគំរាមកំហែងពន្ធរបស់លោក ដូណាល់ ត្រាំ (Donald Trump) ធ្វើឱ្យការអនុម័តកិច្ចព្រមព្រៀងពាណិជ្ជកម្មជាមួយទីក្រុងវ៉ាស៊ីនតោនមិនអាចទៅរួចទេនៅដំណាក់កាលនេះ។

ប្រធានាធិបតីសហរដ្ឋអាមេរិក លោក ដូណាល់ ត្រាំ បានប្រកាសកាលពីថ្ងៃសៅរ៍ថា លោកនឹងដាក់ពន្ធ ១០% នៅក្នុងខែកុម្ភៈ ទៅលើប្រទេសដាណឺម៉ាក ន័រវេស ស៊ុយអែត បារាំង អាល្លឺម៉ង់ ចក្រភពអង់គ្លេស ហូឡង់ និងហ្វាំងឡង់ ដែលក្រោយមកនឹងកើនឡើងដល់ ២៥% ហើយនៅតែមានប្រសិទ្ធភាពរហូតដល់សហរដ្ឋអាមេរិកបញ្ចប់កិច្ចព្រមព្រៀងទិញយកកោះហ្រ្គីនលែនដ៍ (Greenland)។

លោក វ៉េប័រ បាននិយាយនៅលើបណ្តាញសង្គមអ៊ិចថា «គណបក្ស EPP គាំទ្រចំពោះកិច្ចព្រមព្រៀងពាណិជ្ជកម្មសហភាពអឺរ៉ុប-សហរដ្ឋអាមេរិក ប៉ុន្តែដោយសារការគំរាមកំហែងរបស់លោក ដូណាល់ ត្រាំ ទាក់ទងនឹងកោះហ្រ្គីនលែនដ៍ បានធ្វើឱ្យការអនុម័តមិនអាចធ្វើទៅរួចទេនៅដំណាក់កាលនេះ។ ពន្ធគយ ០% ទៅលើផលិតផលអាម៉េរិកត្រូវតែផ្អាក»។

កោះហ្គ្រីនលែនដ៍ គឺជាផ្នែកមួយនៃព្រះរាជាណាចក្រដាណឺម៉ាក។ ទោះជាយ៉ាងណាក៏ដោយ លោក ត្រាំ បាននិយាយម្តងហើយម្តងទៀតថា កោះនេះគួរតែក្លាយជាផ្នែកមួយរបស់សហរដ្ឋអាមេរិក។ អាជ្ញាធរដាណឺម៉ាក និងកោះហ្គ្រីនលែនដ៍ បានព្រមានទីក្រុងវ៉ាស៊ីនតោនកុំឱ្យរឹបអូសកោះនេះ ដោយបានកត់សម្គាល់ថា ពួកគេរំពឹងថា បូរណភាពទឹកដីរបស់ពួកគេនឹងត្រូវបានគោរព៕

ដោយ៖ យា ចិន្ដាខន្ដី (ប្រភព៖ ស្ពុតនីក)