AKP ភ្នំពេញ ថ្ងៃទី១៩ ខែមករា ឆ្នាំ២០២៦ -- រដ្ឋបាលរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) ចង់ឱ្យប្រទេសនានាចូលរួមចំណែកយ៉ាងហោចណាស់ ១ប៊ីលានដុល្លារអាម៉េរិកសម្រាប់អាសនៈអចិន្ត្រៃយ៍នៅក្នុងក្រុមប្រឹក្សាសន្តិភាពសម្រាប់តំបន់ហ្គាហ្សា។ នេះបើយោងតាមការចុះផ្សាយរបស់សារព័ត៌មាន Bloomberg ដោយដកស្រង់សេចក្តីព្រាងធម្មនុញ្ញរបស់ក្រុមប្រឹក្សា។

សារព័ត៌មាន Bloomberg បានដកស្រង់ព័ត៌មានពីឯកសារព្រាងនោះថា «រដ្ឋជាសមាជិកនីមួយៗនឹងបម្រើការងារនៅក្នុងក្រុមប្រឹក្សានោះមិនលើសពីបីឆ្នាំទេគិតចាប់ពីពេលចុះហត្ថលេខា ដោយស្ថិតនៅក្រោមការយល់ព្រមពីប្រធាន។ រយៈពេលសមាជិកភាពបីឆ្នាំនេះនឹងមិនអនុវត្តចំពោះប្រទេសដែលចូលរួមចំណែកជាសាច់ប្រាក់ជាង ១ប៊ីលានដុល្លារអាម៉េរិកដល់ក្រុមប្រឹក្សាសន្តិភាពនេះនៅក្នុងឆ្នាំដំបូងបន្ទាប់ពីកិច្ចព្រមព្រៀងចូលជាធរមាននោះទេ»។

វាក៏បានបញ្ជាក់ផងដែរថា លោក ត្រាំ នឹងសម្រេចចិត្តថា អ្នកណាពិតប្រាកដដែលត្រូវអញ្ជើញឱ្យចូលរួមក្នុងក្រុមប្រឹក្សាសន្តិភាពនេះ។ សេចក្តីសម្រេចនោះនឹងត្រូវបានធ្វើឡើងដោយការបោះឆ្នោតភាគច្រើន ដោយប្រទេសនីមួយៗមានសំឡេងឆ្នោតមួយ។ ទោះជាយ៉ាងណាក៏ដោយ សេចក្តីសម្រេចទាំងអស់ត្រូវតែត្រូវបានអនុម័តដោយប្រធាន៕

ដោយ៖ យា ចិន្ដាខន្ដី (ប្រភព៖ តាសស៍)