AKP ភ្នំពេញ ថ្ងៃទី១៦ ខែមករា ឆ្នាំ២០២៦ -- យោងតាមប្រភពព័ត៌មានប៉ាឡេស្ទីនកាលពីថ្ងៃព្រហស្បតិ៍ បានឱ្យដឹងថា អាជ្ញាធរអ៊ីស្រាអែលបានចាប់ខ្លួនជនជាតិប៉ាឡេស្ទីនចំនួន ៨០នាក់ វាយកម្ទេចផ្ទះមួយខ្នង និងហាមឃាត់រដ្ឋមន្ត្រីកិច្ចការទីក្រុងហ្សេរុយសាឡឹមរបស់អាជ្ញាធរប៉ាឡេស្ទីនមិនឱ្យចូលទៅក្នុងតំបន់វេសប៊ែង។

ក្លឹបអ្នកទោសប៉ាឡេស្ទីនដែលជាអង្គការមិនមែនរដ្ឋាភិបាលមួយ បាននិយាយនៅក្នុងសេចក្តីថ្លែងការណ៍សារព័ត៌មានមួយថា កងទ័ពអ៊ីស្រាអែលបានបើកប្រតិបត្តិការចាប់ខ្លួន និងសួរចម្លើយយ៉ាងទូលំទូលាយកាលពីល្ងាចថ្ងៃពុធរហូតដល់ព្រឹកថ្ងៃព្រហស្បតិ៍ ដោយកំណត់គោលដៅលើជនជាតិប៉ាឡេស្ទីនចំនួន ៨០នាក់ រួមទាំងស្ត្រីម្នាក់ កុមារ ២នាក់ និងអតីតអ្នកជាប់ឃុំឃាំង។

កងទ័ពអ៊ីស្រាអែលធ្វើយុទ្ធនាការចាប់ខ្លួន និងវាយឆ្មក់ស្ទើរតែរាល់ថ្ងៃនៅក្នុងតំបន់វេសប៊ែង ដោយកំណត់គោលដៅលើជនជាតិប៉ាឡេស្ទីនថាជា «ការចង់បាន» ខណៈដែលប្រជាជនប៉ាឡេស្ទីននិយាយថា ប្រតិបត្តិការនេះច្រើនតែកំណត់គោលដៅលើជនស៊ីវិល។

ប្រភពព័ត៌មានបានប្រាប់សារព័ត៌មាន Xinhua ថា កងកម្លាំងអ៊ីស្រាអែលបានវាយលុកតំបន់ Khallat Nafisa នៃទីក្រុងហេប្រុន ហើយបានវាយឆ្មក់ផ្ទះមួយជាន់របស់គ្រួសារអាល់ អាត្រាស (al-Atrash) ដោយបង្ខំឱ្យក្រុមគ្រួសារនេះត្រូវជម្លៀសចេញ មុនពេលវាយកម្ទេចវាដោយរថយន្ត bulldozers។

អ៊ីស្រាអែលតែងតែវាយកម្ទេចផ្ទះរបស់ជនជាតិប៉ាឡេស្ទីនដែលត្រូវបានចោទប្រកាន់ពីបទវាយប្រហារ ដោយពណ៌នាអំពីការអនុវត្តនេះថាជាការរារាំង។ អង្គការសិទ្ធិមនុស្សប៉ាឡេស្ទីន និងអ៊ីស្រាអែលថ្កោលទោសគោលនយោបាយនេះ ដោយចាត់ទុកថានេះជាទម្រង់នៃការដាក់ទណ្ឌកម្មរួមគ្នា។

លើសពីនេះ អាជ្ញាធរអ៊ីស្រាអែលបានហាមឃាត់រដ្ឋមន្ត្រីប៉ាឡេស្ទីនទទួលបន្ទុកកិច្ចការទីក្រុងហ្សេរុយសាឡឹម លោក អាសហ៍រ៉ាហ្វ អាល់ អាវ៉ា (Ashraf al-Awar) មិនឱ្យចូលទៅក្នុងតំបន់វេសប៊ែងរយៈពេល ៦ខែ។ នេះបើយោងតាមសេចក្តីថ្លែងការណ៍សារព័ត៌មានដែលចេញដោយក្រសួងរបស់លោក៕

ដោយ៖ មូល មិនា (ប្រភព៖ ស៊ីនហួ)