AKP ភ្នំពេញ ថ្ងៃទី១៤ ខែមករា ឆ្នាំ២០២៦ -- ប្រធានាធិបតីសហរដ្ឋអាមេរិកលោក ដូណាល់ ត្រាំ (Donald Trump) បាននិយាយកាលពីពេលថ្មីៗនេះថាប្រទេសណាដែលធ្វើអាជីវកម្មជាមួយអ៊ីរ៉ង់នឹងត្រូវបង់ពន្ធគយ ២៥% ទៅលើអាជីវកម្មណាមួយដែលកំពុងធ្វើជាមួយសហរដ្ឋអាមេរិក ហើយវាមានប្រសិទ្ធភាពភ្លាមៗ ខណៈដែលទីក្រុងវ៉ាស៊ីនតោនកំពុងតាមដានដោយប្រុងប្រយ័ត្នចំពោះការបង្ក្រាបរបស់ទីក្រុងតេអេរ៉ង់ទៅលើក្រុមបាតុករប្រឆាំងរដ្ឋាភិបាល។

លោក ត្រាំ បានធ្វើសេចក្តីប្រកាសនេះនៅក្នុងសារមួយនៅលើប្រព័ន្ធផ្សព្វផ្សាយសង្គម បន្ទាប់ពីលេខាធិការសារព័ត៌មានសេតវិមាន លោកស្រី ការ៉ូលីន លាវីតត៍ (Karoline Leavitt) បានប្រាប់សារព័ត៌មាន Fox News ថាបើទោះបីជាការទូតនៅតែជាជម្រើសដំបូងរបស់លោកប្រធានាធិបតីទាក់ទងនឹងអ៊ីរ៉ង់ក៏ដោយ ក៏ការប្រើប្រាស់កម្លាំងយោធានឹងនៅតែជាជម្រើសក្នុងចំណោមជម្រើសជាច្រើនទៀតសម្រាប់អគ្គមេបញ្ជាការសហរដ្ឋអាមេរិក។

លោកបានសរសេរនៅលើបណ្តាញសង្គម Truth Social ថា «វាមានប្រសិទ្ធភាពភ្លាមៗចំពោះប្រទេសណាដែលធ្វើអាជីវកម្មជាមួយសាធារណរដ្ឋអ៊ីស្លាមអ៊ីរ៉ង់ នឹងត្រូវបង់ពន្ធគយ ២៥% ចំពោះអាជីវកម្មណាមួយ និងទាំងអស់ដែលកំពុងធ្វើជាមួយសហរដ្ឋអាមេរិក»។

លោកបានបន្ថែមថា «បទបញ្ជានេះ គឺជាសេចក្តីសម្រេចចុងក្រោយនិងជាស្ថាពរ»។

យោងតាមរបាយការណ៍ បានឱ្យដឹងថា ក្រុមបាតុកររាប់រយនាក់នៅក្នុងសាធារណរដ្ឋអ៊ីស្លាមត្រូវបានគេគិតថាត្រូវបានសម្លាប់នៅក្នុងបាតុកម្មទូទាំងប្រទេសជាងពីរសប្តាហ៍មកនេះ ដោយសារពួកគេមិនពេញចិត្តនឹងការលំបាកផ្នែកសេដ្ឋកិច្ចនៅក្នុងប្រទេស និងបញ្ហាផ្សេងៗទៀត។

លោក ត្រាំ បាននិយាយកាលពីដើមខែនេះថា ប្រសិនបើអ៊ីរ៉ង់សម្លាប់ក្រុមបាតុករសន្តិវិធីដោយប្រើកម្លាំងហិង្សានោះ សហរដ្ឋអាមេរិកនឹងមកជួយសង្គ្រោះពួកគេ៕

ដោយ៖ យា ចិន្ដាខន្ដី (ប្រភព៖ កូរ៉េថាមស៍)