AKP ភ្នំពេញ ថ្ងៃទី១៤ ខែមករា ឆ្នាំ២០២៦ -- ក្រសួងការពារជាតិបាននិយាយថា មន្ត្រីការពារជាតិជាន់ខ្ពស់កូរ៉េខាងត្បូង និងហូឡង់បានជួបពិភាក្សាគ្នានៅទីក្រុងសេអ៊ូលកាលពីថ្ងៃអង្គារ អំពីវិធីពង្រីកកិច្ចសហប្រតិបត្តិការរបស់ពួកគេនៅក្នុងឧស្សាហកម្មអាវុធ និងវិស័យពាក់ព័ន្ធនឹងសន្តិសុខ។

ក្រសួងបាននិយាយថា នៅក្នុងកិច្ចពិភាក្សារបស់ពួកគេ អនុរដ្ឋមន្ត្រីក្រសួងការពារជាតិ លោក លី ដូហេ (Lee Doo-hee) និងរដ្ឋមន្ត្រីក្រសួងទទួលបន្ទុកការផ្គត់ផ្គង់អាវុធ និងបុគ្គលិកហូឡង់ លោក ជីស៍ ទូនមេន (Gijs Tuinman) បានគូសបញ្ជាក់ពីតម្រូវការក្នុងការពង្រឹងកិច្ចសហប្រតិបត្តិការនៅក្នុងវិស័យជាច្រើន រួមទាំងការផ្លាស់ប្តូរកម្រិតកំពូល ឧស្សាហកម្មអាវុធក៏ដូចជាបញ្ញាសិប្បនិម្មិត អវកាស និងអ៊ីនធឺណិត។

លោក លី បានថ្លែងអំណរគុណដល់លោក ទូនមេន ចំពោះការរួមចំណែកជាបន្តបន្ទាប់របស់ប្រទេសលោកសម្រាប់សន្តិភាព និងស្ថិរភាពនៅលើឧបទ្វីបកូរ៉េ។ លោកក៏បានកត់សម្គាល់ពីរបៀបដែលការគំរាមកំហែងនុយក្លេអ៊ែរ និងមីស៊ីលរបស់ប្រទេសកូរ៉េខាងជើងដែលកំពុងរីកចម្រើនគឺជាការគំរាមកំហែងយ៉ាងធ្ងន់ធ្ងរសម្រាប់សហគមន៍អន្តរជាតិ និងបានស្នើសុំការគាំទ្រពីប្រទេសហូឡង់ចំពោះកិច្ចខិតខំប្រឹងប្រែងរបស់ទីក្រុងសេអ៊ូលក្នុងការបង្កើតសន្តិភាពនៅលើឧបទ្វីប។

លោក ទូនមេន បាននិយាយថា កិច្ចសហប្រតិបត្តិការទ្វេភាគីគឺមានសារៈសំខាន់ជាងពេលណាៗទាំងអស់ក្នុងការតភ្ជាប់សន្តិសុខកាន់តែខ្លាំងឡើងក្នុងចំណោមប្រទេសនានា ហើយបានអំពាវនាវឱ្យពង្រីកកិច្ចសហប្រតិបត្តិការជាក់ស្តែងរវាងប្រទេសកូរ៉េខាងត្បូង និងហូឡង់។ នេះបើយោងតាមក្រសួង។

ប្រទេសហូឡង់គឺស្ថិតក្នុងចំណោមប្រទេសចំនួន ២២ដែលបានបញ្ជូនកងទ័ព ឬការគាំទ្រផ្សេងៗទៀតដើម្បីគាំទ្រប្រទេសកូរ៉េខាងត្បូងក្នុងអំឡុងពេលមានសង្គ្រាម និងក្រោយសង្គ្រាមកូរ៉េឆ្នាំ១៩៥០-៥៣៕

ដោយ៖ មូល មិនា (ប្រភព៖ យ៉ុនហាប់)