AKP ភ្នំពេញ ថ្ងៃទី១២ ខែមករា ឆ្នាំ២០២៦ -- រដ្ឋមន្ត្រីការបរទេសចិនលោក វ៉ាង យី (Wang Yi) បានជួបពិភាក្សាជាមួយសមភាគីអេត្យូពី លោកហ្គេឌីអុន ទីម៉ូថេវូស (Gedion Timothewos) ដោយភាគីទាំងពីរបានសន្យាថានឹងជំរុញភាពជាដៃគូយុទ្ធសាស្ត្រគ្រប់ជ្រុងជ្រោយ។

លោក វ៉ាង បាននិយាយថា ប្រទេសអេត្យូពីត្រូវបានជ្រើសរើសជាចំណតដំបូងនៃដំណើរទស្សនកិច្ចនៅឆ្នាំនេះ ពីព្រោះប្រទេសទាំងពីរជាដៃគូយុទ្ធសាស្ត្រគ្រប់ជ្រុងជ្រោយ ហើយគួរតែរក្សាការទំនាក់ទំនងយុទ្ធសាស្ត្រជាប្រចាំ និងពង្រឹងកិច្ចសហប្រតិបត្តិការ។

លោក វ៉ាង បាននិយាយថា ប្រទេសចិនពេញចិត្តដែលប្រទេសអេត្យូពីបានគោរពការប្តេជ្ញាចិត្តរបស់ខ្លួនចំពោះគោលការណ៍ចិនតែមួយ ហើយគាំទ្រប្រទេសអេត្យូពីឱ្យដើរតួនាទីកាន់តែធំនៅក្នុងស្ថាប័នពហុភាគី។

លោក វ៉ាង បាននិយាយថា ប្រទេសចិនត្រៀមខ្លួនរួចជាស្រេចដើម្បីធ្វើការជាមួយប្រទេសអេត្យូពី ដើម្បីអនុវត្តន៍គំនិតផ្តួចផ្តើមសកលសំខាន់ៗចំនួនបួនដែលស្នើឡើងដោយប្រធានាធិបតីចិន លោក ស៊ី ជីនពីង (Xi Jinping) បន្តដើរតួនាទីវិជ្ជមានក្នុងការជំរុញទំនាក់ទំនងចិន-អាហ្វ្រិក ការពារផលប្រយោជន៍របស់សកលលោកខាងត្បូងក្នុងកិច្ចការអន្តរជាតិ និងលើកកម្ពស់ពហុប៉ូល។

លោកបានមានប្រសាសន៍ថា ប្រទេសចិននឹងបន្តពង្រីកកិច្ចសហប្រតិបត្តិការជាក់ស្តែងជាមួយប្រទេសអេត្យូពី ផ្ដល់ផលប្រយោជន៍ទៅវិញទៅមក និងកិច្ចសហប្រតិបត្តិការខាងត្បូង-ខាងត្បូង រួមគ្នាពង្រឹងគម្រោងធំៗដូចជា ផ្លូវដែកអាឌីសអាបាបា-ជីប៊ូទី និងដើរតួនាទីយ៉ាងសំខាន់ក្នុងការលើកកម្ពស់វិបុលភាព និងការអភិវឌ្ឍរបស់ប្រទេសអេត្យូពី ក៏ដូចជាការតភ្ជាប់ក្នុងតំបន់។

លោកបានបន្ថែមថា ភាគីទាំងពីរគួរតែប្រើប្រាស់គោលនយោបាយពន្ធគយសូន្យរបស់ប្រទេសចិនសម្រាប់ប្រទេសអាហ្វ្រិកដែលមានទំនាក់ទំនងការទូតជាមួយប្រទេសចិន ពង្រីកកិច្ចសហប្រតិបត្តិការឧស្សាហកម្ម និងឈានទៅមុខជាមួយគ្នាលើមាគ៌ាឆ្ពោះទៅរកទំនើបកម្ម។

ចំពោះលោក ហ្គេឌីអុន បាននិយាយថា ភាពជាដៃគូយុទ្ធសាស្ត្ររបស់ប្រទេសអេត្យូពីជាមួយប្រទេសចិនគឺមានលក្ខណៈទូលំទូលាយ និងរឹងមាំ។

លោកបានសម្តែងការដឹងគុណចំពោះប្រទេសចិនចំពោះការគាំទ្រយ៉ាងមុតមាំរបស់ខ្លួនលើបញ្ហាទាក់ទងនឹងផលប្រយោជន៍ស្នូលរបស់ប្រទេសអេត្យូពី ក៏ដូចជាសម្រាប់ជំនួយដ៏មានតម្លៃដែលខ្លួនបានផ្តល់ជូនដល់ការអភិវឌ្ឍ និងសន្តិភាពរបស់ទ្វីបអាហ្វ្រិក។

លោក ហ្គេឌីអុន បានមានប្រសាសន៍ថា ប្រទេសអេត្យូពីពេញចិត្តយ៉ាងខ្លាំង ហើយត្រៀមខ្លួនរួចជាស្រេចដើម្បីបន្តធ្វើការជាមួយប្រទេសចិន ដើម្បីធានាថាភាពជាដៃគូយុទ្ធសាស្ត្រគ្រប់ជ្រុងជ្រោយរវាងប្រទេសទាំងពីរផ្តល់អត្ថប្រយោជន៍កាន់តែច្រើនដល់ប្រជាជនរបស់ពួកគេ៕

ដោយ៖ មូល មិនា (ប្រភព៖ ភីបផលដេលី)