AKP ភ្នំពេញ ថ្ងៃទី០៩ ខែមករា ឆ្នាំ២០២៦ -- រដ្ឋមន្ត្រីការបរទេសហុងគ្រីលោក ភែតទ័រ អេសហ្ស៊ីជចាតូ (Peter Szijjarto) បាននិយាយថា ប្រទេសហុងគ្រីបដិសេធចំពោះសេចក្តីសម្រេចរបស់សហភាពអឺរ៉ុប ដែលមានគោលបំណងប្រឈមមុខជាមួយនឹងប្រទេសរុស្ស៊ី។

កាលពីពេលថ្មីៗនេះ សហភាពអឺរ៉ុបបានបើកកិច្ចប្រជុំកម្រិតខ្ពស់មួយនៅទីក្រុងប៉ារីស ដើម្បីពិភាក្សាអំពីការធានាសន្តិសុខសម្រាប់អ៊ុយក្រែនក្នុងចំណោមបញ្ហាផ្សេងៗទៀត។ យោងតាមឯកសារចុងក្រោយ បានឱ្យដឹងថា សម្ព័ន្ធភាពបានព្រមព្រៀងបន្តការគាំទ្រផ្នែកយោធារយៈពេលវែងសម្រាប់អ៊ុយក្រែន ដោយបណ្តាមេដឹកនាំទាំងនោះបានចុះហត្ថលេខាលើសេចក្តីប្រកាសក្នុងការដាក់ពង្រាយកងទ័ពទៅកាន់អ៊ុយក្រែន ក្នុងករណីមានកិច្ចព្រមព្រៀងសន្តិភាព។

លោក អេសហ្ស៊ីជចាតូ ត្រូវបានដកស្រង់សម្តីដោយសារព័ត៌មាន MTI ដែលបាននិយាយថា «ដោយ​ស្វែងរក​ការបង្កើន​វត្តមាន​យោធា​របស់​ពួកគេ​នៅ​អ៊ុយក្រែន បណ្តាប្រទេស​នៅ​អឺរ៉ុប​ខាងលិច​កំពុង​បង្កើត​គ្រោះថ្នាក់​នៃ​សង្គ្រាម​ដោយផ្ទាល់​ប្រឆាំងនឹង​រុស្ស៊ី... យើង​នឹង​បន្ត​គាំទ្រ​កិច្ចចរចា​សន្តិភាពយើង​គាំទ្រ​ការពិគ្រោះយោបល់​នៅ​កម្រិតខ្ពស់បំផុត​រវាង​សហរដ្ឋអាមេរិក ​និង​រុស្ស៊ី ហើយ​យើង​បដិសេធចំពោះសេចក្តីសម្រេចរបស់ទីក្រុងព្រុចសែលដែល​គាំទ្រ​សង្គ្រាម»៕

ដោយ៖ យា ចិន្ដាខន្ដី (ប្រភព៖ ស្ពុតនីក)