AKP ភ្នំពេញ ថ្ងៃទី០៨ ខែមករា ឆ្នាំ២០២៦ -- កាលពីថ្ងៃអង្គារ ប្រទេសកូរ៉េខាងជើងបានរិះគន់យ៉ាងខ្លាំងចំពោះការបែងចែកថវិកាការពារជាតិប្រចាំឆ្នាំដ៏ធំបំផុតរបស់ប្រទេសជប៉ុននៅឆ្នាំនេះ ដោយចោទប្រកាន់ទីក្រុងតូក្យូថាបានរៀបចំផែនការឡើងវិញនូវអតីតកាលយោធានិយមរបស់ខ្លួន។

កាសែត Rodong Sinmun ជាកាសែតដែលមានការចែកចាយយ៉ាងទូលំទូលាយបំផុតរបស់ប្រទេសកូរ៉េខាងជើងបានចេញផ្សាយនៃការរិះគន់នេះ ដោយសំដៅទៅលើការបែងចែកថវិកាចំនួន ៩,០៤ទ្រីលានយ៉េន(៥៧,៧ប៊ីលានដុល្លារអាម៉េរិក) របស់ប្រទេសជប៉ុន សម្រាប់ការចំណាយលើការការពារជាតិនៅឆ្នាំនេះ ដែលជាតួលេខកំណត់ត្រាមួយដែលមានគោលបំណងពង្រឹងសមត្ថភាពវាយប្រហារ និងការពារឆ្នេរសមុទ្រ។

កាសែតនេះបាននិយាយថា រដ្ឋបាលរបស់នាយករដ្ឋមន្ត្រីជប៉ុន លោកស្រី សានេ តាកៃជី     (Sanae Takaichi) កំពុងស្វែងរកការកែប្រែរដ្ឋធម្មនុញ្ញសន្តិភាពនិយមរបស់ប្រទេសជប៉ុន និងប្រែក្លាយកងកម្លាំងការពាររបស់ខ្លួនទៅជាកងទ័ពធម្មតា ដោយថ្កោលទោសទីក្រុងតូក្យូចំពោះការរៀបចំផែនការដើម្បីដាក់ស្ថាប័នសម្រាប់ «ប្រទេសឈ្លានពាន»។

កាសែតនេះក៏បានរិះគន់សមយុទ្ធយោធារួមគ្នារបស់កងកម្លាំងការពារខ្លួនជប៉ុនជាមួយរដ្ឋជាសមាជិកនៃអង្គការសន្ធិសញ្ញាអាត្លង់ទិកខាងជើង និងការពង្រីកវិសាលភាពប្រតិបត្តិការរបស់ពួកគេ ដោយចោទប្រកាន់រដ្ឋាភិបាលថាកំពុងព្យាយាមរស់ឡើងវិញនូវមហិច្ឆតាអតីតកាលរបស់ខ្លួនក្នុងការដឹកនាំអាស៊ីបូព៌ា។

កាសែតនេះបាននិយាយថា «ការកំណត់ថវិកាយោធាដែលមានគោលបំណងជំរុញសមត្ថភាពប្រយុទ្ធសង្គ្រាមរបស់កងកម្លាំងការពារខ្លួនដល់កម្រិតខ្ពស់ជាងនេះ បានបង្ហាញពីមហិច្ឆតារបស់រដ្ឋាភិបាលបច្ចុប្បន្នក្នុងការក្លាយជាមហាអំណាចយោធាក្នុងដំណាក់កាលមិនប្រុងប្រយ័ត្ន» ដោយហៅចលនានេះថាជាសញ្ញាច្បាស់លាស់នៃផែនការរបស់ជប៉ុនដើម្បីរស់ឡើងវិញនូវយោធានិយមពីអតីតកាលរបស់ខ្លួន៕

ដោយ៖ មូល មិនា (ប្រភព៖ យ៉ុនហាប់)