AKP ភ្នំពេញ ថ្ងៃទី០៨ ខែមករា ឆ្នាំ២០២៦ -- លោក ហ្វាហ្សាល់ រ៉ាហ៊ីម មូស្គីនយ៉ារ (Fazal Rahim Muskinyar) អ្នកនាំពាក្យនគរបាលខេត្ត បាននិយាយកាលពីថ្ងៃពុធថា ប៉ូលីសបានរកឃើញ និងរឹបអូសអាវុធចំនួន ២១ដើមនិងបានចាប់ខ្លួនមនុស្ស ១៨នាក់ពីបទរក្សាទុក និងយកតាមខ្លួនដោយខុសច្បាប់នៅភាគខាងកើតនៃខេត្តប៉ារវ៉ាន់ ក្នុងរយៈពេលបីខែកន្លងមកនេះ។

មន្ត្រីរូបនោះបានបន្ថែមថា អាវុធទាំងនោះ រួមមានកាំភ្លើងKalashnikov ចំនួន ៨ដើម កាំភ្លើង M16 មួយដើម កាំភ្លើងខ្លីចំនួន ៧ដើមកាំភ្លើងបរបាញ់ចំនួន ៥ដើម គ្រាប់កាំភ្លើង និងគ្រាប់រំសេវរាប់រយដើមត្រូវបានរកឃើញក្នុងអំឡុងពេលប្រតិបត្តិការជាបន្តបន្ទាប់ ហើយមនុស្ស ១៨នាក់ត្រូវបានចាប់ខ្លួន។

មន្ត្រីរូបនោះបានបន្តថា ប៉ូលីសនឹងមិនអនុញ្ញាតឱ្យនរណាម្នាក់រំខានដល់ច្បាប់ និងសណ្តាប់ធ្នាប់ដោយរក្សាទុក និងយកតាមខ្លួនដោយអាវុធដែលគ្មានការអនុញ្ញាតនៅក្នុងខេត្តនោះទេ។

ជាផ្នែកមួយនៃកិច្ចខិតខំប្រឹងប្រែងដើម្បីធានាច្បាប់ និងសណ្តាប់ធ្នាប់នៅក្នុងប្រទេសអាហ្វហ្គានីស្ថានក្រោយសង្គ្រាម រដ្ឋាភិបាលអាហ្វហ្គានីស្ថានបានសន្យាថានឹងប្រមូលអាវុធ និងគ្រាប់រំសេវពីអ្នកណាដែលរស់នៅខាងក្រៅស្ថាប័នសន្តិសុខរបស់រដ្ឋាភិបាល៕

ដោយ៖ មូល មិនា (ប្រភព៖ ស៊ីនហួ)