AKP ភ្នំពេញ ថ្ងៃទី០៨ ខែមករា ឆ្នាំ២០២៦ -- នាយករដ្ឋមន្ត្រីចិន លោក លីឈាង (Li Qiang) បានជួបជាមួយប្រធានាធិបតីសាធារណរដ្ឋកូរ៉េ (ROK) លោក លី ជេម្យុង (Lee Jae Myung) នៅទីក្រុងប៉េកាំង កាលពីថ្ងៃអង្គារ។

ដោយកត់សម្គាល់ថា ទំនាក់ទំនងទ្វេភាគីបានផ្លាស់ប្តូរក្រោមការណែនាំជាយុទ្ធសាស្ត្ររបស់ប្រមុខរដ្ឋទាំងពីរ លោក លី បាននិយាយថាប្រទេសចិនតែងតែដាក់ទំនាក់ទំនងរបស់ខ្លួនជាមួយសាធារណរដ្ឋកូរ៉េនៅក្នុងតំណែងសំខាន់មួយនៃការទូតរបស់ខ្លួន។ លោកក៏បានកត់សម្គាល់ផងដែរថា ប្រទេសនេះមានឆន្ទៈក្នុងការធ្វើការជាមួយសាធារណរដ្ឋកូរ៉េ ដើម្បីរក្សាភាពជាអ្នកជិតខាងល្អ និងមិត្តភាព បង្កើនការទំនាក់ទំនងជាយុទ្ធសាស្ត្រពង្រឹងទំនុកចិត្តគ្នាទៅវិញទៅមកខាងនយោបាយ ស្វែងរកចំណុចរួម ហើយរក្សាភាពខុសគ្នា និងលើកកម្ពស់ការអភិវឌ្ឍជាបន្តបន្ទាប់នៃទំនាក់ទំនងទ្វេភាគីតាមផ្លូវត្រូវ និងផ្តល់ផលប្រយោជន៍កាន់តែប្រសើរដល់ប្រជាជនទាំងពីរ។

លោក លី បានចង្អុលបង្ហាញថា ប្រទេសចិន និងសាធារណរដ្ឋកូរ៉េគឺជាដៃគូសេដ្ឋកិច្ច និងពាណិជ្ជកម្មដ៏សំខាន់សម្រាប់គ្នាទៅវិញទៅមក ហើយក្នុងរយៈពេលជាង ៣០ឆ្នាំកន្លងមកនេះ ចាប់តាំងពីការបង្កើតទំនាក់ទំនងការទូតរវាងប្រទេសទាំងពីរ ប្រទេសចិន និងសាធារណរដ្ឋកូរ៉េ សម្រេចបានលទ្ធផលសហប្រតិបត្តិការប្រកបដោយផ្លែផ្កា និងលើកកម្ពស់ការអភិវឌ្ឍរួមប្រកបដោយប្រសិទ្ធភាព។

លោកក៏បានមានប្រសាសន៍ថា ប្រទេសចិនស្វាគមន៍សហគ្រាសមកពីសាធារណរដ្ឋកូរ៉េឱ្យពង្រីកការវិនិយោគរបស់ពួកគេនៅក្នុងប្រទេសចិននិងបានសម្តែងក្តីសង្ឃឹមថា ភាគីសាធារណរដ្ឋកូរ៉េនឹងផ្តល់ភាពងាយស្រួលកាន់តែច្រើនសម្រាប់សហគ្រាសចិនក្នុងការវិនិយោគនៅក្នុងសាធារណរដ្ឋកូរ៉េ។

លោកបានបន្ថែមថា ប្រទេសចិន និងសាធារណរដ្ឋកូរ៉េគួរតែធ្វើការរួមគ្នាដើម្បីលើកកម្ពស់ពហុភាគីនិយម និងពាណិជ្ជកម្មសេរី និងការពារយុត្តិធម៌អន្តរជាតិ ដើម្បីរួមចំណែកដល់ការលើកកម្ពស់សន្តិភាព ស្ថិរភាព និងការអភិវឌ្ឍនៅក្នុងតំបន់ និងពិភពលោកទាំងមូល។

ចំពោះលោក លី បាននិយាយថា សាធារណរដ្ឋកូរ៉េយកចិត្តទុកដាក់យ៉ាងខ្លាំងចំពោះទំនាក់ទំនងជាមួយប្រទេសចិន ហើយមានឆន្ទៈក្នុងការគោរពផលប្រយោជន៍ស្នូលរបស់គ្នាទៅវិញទៅមក បង្កើនការសន្ទនា និងការផ្លាស់ប្តូរទ្វេភាគី និងធ្វើឱ្យកិច្ចសហប្រតិបត្តិការដែលផ្តល់ផលប្រយោជន៍ទៅវិញទៅមកកាន់តែស៊ីជម្រៅនៅក្នុងវិស័យផ្សេងៗដូចជា សេដ្ឋកិច្ច និងពាណិជ្ជកម្ម។

លោក លី បាននិយាយថា ភាគីសាធារណរដ្ឋកូរ៉េលើកទឹកចិត្តយ៉ាងសកម្មដល់សហគ្រាសរបស់ខ្លួនឱ្យពង្រីកកិច្ចសហប្រតិបត្តិការជាមួយប្រទេសចិន និងស្វាគមន៍សហគ្រាសចិនឱ្យវិនិយោគ និងចាប់ផ្តើមអាជីវកម្មនៅក្នុងសាធារណរដ្ឋកូរ៉េ។ សាធារណរដ្ឋកូរ៉េមានឆន្ទៈក្នុងការបង្កើនការទំនាក់ទំនង និងការសម្របសម្រួលពហុភាគីជាមួយប្រទេសចិន រួមគ្នាការពារពាណិជ្ជកម្មសេរី និងលើកកម្ពស់សន្តិភាព និងស្ថិរភាពក្នុងតំបន់ និងអន្តរជាតិ៕

ដោយ៖ មូល មិនា (ប្រភព៖ ភីបផលដេលី)