AKP ភ្នំពេញ ថ្ងៃទី០៨ ខែមករា ឆ្នាំ២០២៦ -- ប្រទេសកូរ៉េខាងត្បូងកំពុងចាប់ផ្តើមការបង្ក្រាបទូទាំងប្រទេសទៅលើការកេងប្រវ័ញ្ចន៍ពលករទេសន្តរប្រវេសន៍តាមរដូវ ដែលជាការអនុវត្តមួយដែលបណ្តាលមកពីករណីដ៏លេចធ្លោមួយនៅចុងឆ្នាំមុន ដោយពលករហ្វីលីពីននៅកសិដ្ឋានមួយត្រូវបានរាយការណ៍ពីការប្រព្រឹត្តខុសធ្ងន់ធ្ងរ។

ចាប់ពីថ្ងៃព្រហស្បតិ៍នេះដល់ថ្ងៃទី៣១ ខែមីនា ក្រសួងការងារ និងពលកម្ម និងក្រសួងយុត្តិធម៌ នឹងធ្វើការងារត្រួតពិនិត្យរួមគ្នាជាមួយរដ្ឋាភិបាលមូលដ្ឋាន ដោយផ្តោតសំខាន់ទៅលើកន្លែងធ្វើការកសិកម្ម និងនេសាទ ដែលជួលពលករបរទេសតាមរដូវកាល។ នេះបើយោងតាមមន្ត្រីកូរ៉េខាងត្បូងបាននិយាយកាលពីថ្ងៃពុធ។

នេះជាលើកដំបូងដែលក្រសួងទាំងពីរបានធ្វើការត្រួតពិនិត្យរួមគ្នាដែលមានគោលបំណងការពារពលករបរទេសពីការរំលោភបំពានដែលទាក់ទងនឹងការជួញដូរមនុស្ស។

ករណីនេះកើតឡើងចំពេលដែលមានការកើនឡើងនៃករណីជួញដូរមនុស្ស ដែលភាគច្រើនពាក់ព័ន្ធនឹងការងារដោយបង្ខំ។ យោងតាមមន្ត្រីជាន់ខ្ពស់ម្នាក់នៅក្រសួងសមភាពយេនឌ័រ និងគ្រួសារ បានឱ្យដឹងថា ចំនួនករណីដែលបានបញ្ជាក់បានកើនឡើងពីត្រឹមតែ ០៣ករណីក្នុងឆ្នាំ២០២៣ដល់ ១២ករណីក្នុងឆ្នាំ២០២៤ និង ៤២ករណីក្នុងឆ្នាំ២០២៥។

ជនរងគ្រោះទាំងអស់ គឺជាជនបរទេស។ ក្នុងចំណោមករណីទាំងអស់ការកេងប្រវ័ញ្ចកម្លាំងពលកម្ម គឺជាប្រភេទនៃការរំលោភបំពានទូទៅបំផុតដែលមានជនរងគ្រោះចំនួន ៤៣នាក់ បន្ទាប់មក គឺករណីកេងប្រវ័ញ្ចផ្លូវភេទចំនួន ១០ករណី។

ក្នុងករណីជួញដូរដែលកេងប្រវ័ញ្ចទាំងនោះ មេខ្យល់ដែលមិនបានចុះបញ្ជីបានដាក់កម្រៃជើងសារ និងថ្លៃសេវាខុសច្បាប់ ដែលធ្វើឱ្យពលករជំពាក់បំណុលគេយ៉ាងខ្លាំង សូម្បីតែមុនពេលពួកគេចាប់ផ្តើមធ្វើការងារក៏ដោយ។ អន្តរការី និងនិយោជកទាំងនេះក៏ចូលរួមក្នុងការលួចប្រាក់ឈ្នួល ឬមិនបើកប្រាក់ឈ្នួលផងដែរ ដោយប្រើប្រាស់ប្រាក់ឈ្នួលដែលមិនទាន់បានបង់ជាកម្លាំងដើម្បីរារាំងពលករពីការរាយការណ៍អំពីការរំលោភបំពាន។ ក្នុងករណីជាច្រើន លិខិតឆ្លងដែន និងលិខិតអនុញ្ញាតស្នាក់នៅត្រូវបានរឹបអូស៕

ដោយ៖ យា ចិន្ដាខន្ដី (ប្រភព៖ កូរ៉េថាមស៍)