AKP ភ្នំពេញ ថ្ងៃទី០៨ ខែមករា ឆ្នាំ២០២៦ -- រដ្ឋមន្ត្រីក្រសួងការពារជាតិកូរ៉េខាងត្បូង លោក អាញ គ្យីយុ-បាកក៍ (Ahn Gyu-back) បាននិយាយកាលពីថ្ងៃពុធថា ការរៀបចំសម្រាប់សមយុទ្ធរួមគ្នាប្រចាំឆ្នាំរវាងកូរ៉េខាងត្បូង និងសហរដ្ឋអាមេរិក កំពុងដំណើរការទៅតាមផែនការ ដោយបានហៅសមយុទ្ធបែបនេះថា ជា «ខ្សែជីវិត» សម្រាប់យោធា។

លោក អាញ បានធ្វើការកត់សម្គាល់ខាងលើនេះក្នុងអំឡុងពេលនៃការបង្ហាញខ្លួនតាមទូរទស្សន៍ ចំពេលដែលមានការអំពាវនាវឱ្យមានតម្រូវការក្នុងការកែសម្រួលសមយុទ្ធយោធាឡើងវិញ ដើម្បីជួយស្តារកិច្ចសន្ទនារវាងសហរដ្ឋអាមេរិក និងកូរ៉េខាងជើង ខណៈដែលទាំងទីក្រុងសេអ៊ូល និងទីក្រុងវ៉ាស៊ីនតោន កំពុងស្វែងរកការភ្ជាប់ទំនាក់ទំនងជាមួយទីក្រុងព្យុងយ៉ាងឡើងវិញ។

លោក អាញ បាននិយាយនៅក្នុងបទសម្ភាសន៍មួយតាមទូរទស្សន៍Yonhap News TV ថា «សមយុទ្ធ គឺជាខ្សែជីវិតសម្រាប់ទាហាន។ ទាំងកូរ៉េខាងត្បូង និងសហរដ្ឋអាមេរិក កំពុងរៀបចំយ៉ាងហ្មត់ចត់សម្រាប់សមយុទ្ធនេះ ក្រោមផែនទីបង្ហាញផ្លូវដោយគ្មានការផ្លាស់ប្តូរគួរឱ្យកត់សម្គាល់ណាមួយទេរហូតមកដល់ពេលនេះ»។

យោធាកូរ៉េខាងត្បូង និងសហរដ្ឋអាមេរិកធ្វើសមយុទ្ធទ្រង់ទ្រាយធំពីរដងក្នុងមួយឆ្នាំ គឺសមយុទ្ធ Freedom Shield និទាឃរដូវ និងសមយុទ្ធ Ulchi Freedom Shield រដូវក្តៅ។ យោធាទាំងពីរសង្កត់ធ្ងន់ថា សមយុទ្ធនេះមានលក្ខណៈការពារខ្លួន ប៉ុន្តែកូរ៉េខាងជើងបានថ្កោលទោសសមយុទ្ធទាំងនោះថាជាការហាត់សមសម្រាប់ការឈ្លានពាន។

លោក អាញ នៅតែបើកចំហចំពោះលទ្ធភាពនៃការកែសម្រួលសមយុទ្ធឡើងវិញ ដោយលោកបាននិយាយថា ស្ថានភាពនយោបាយអាចត្រូវបានយកមកពិចារណា ប្រសិនបើកិច្ចចរចារវាងកូរ៉េខាងជើង និងសហរដ្ឋអាមេរិកកើតឡើង។

ដោយលើកឡើងអំពីការជំរុញរបស់កូរ៉េខាងត្បូងក្នុងការសាងសង់នាវាមុជទឹកដើរដោយថាមពលនុយក្លេអ៊ែរ លោក អាញ បាននិយាយថា នាវាដែលគ្រោងទុកនេះអាចនឹងត្រូវបានដាក់ពង្រាយនៅដើមទសវត្សរ៍ឆ្នាំ២០៣០ ប្រសិនបើផែនការដំណើរការទៅដោយរលូន៕

ដោយ៖ យា ចិន្ដាខន្ដី (ប្រភព៖ កូរ៉េថាមស៍)