AKP ភ្នំពេញ ថ្ងៃទី០៨ ខែមករា ឆ្នាំ២០២៦ -- លោក សេទីចាឌី (Setijadi)ស្ថាបនិក និងជានាយកប្រតិបត្តិនៃក្រុមហ៊ុន Supply Chain Indonesia (SCI) បានជំរុញឱ្យមានការប្រុងប្រយ័ត្នចំពោះផលប៉ះពាល់ដែលអាចកើតមានដោយសារភាពតានតឹងកាន់តែខ្លាំងឡើងរវាងសហរដ្ឋអាមេរិក និងវេណេស៊ុយអេឡា ដោយលោកបានព្រមានថា អស្ថិរភាពភូមិសាស្ត្រនយោបាយនៅក្នុងប្រទេសផលិតថាមពលមួយនេះអាចរំខានដល់ការដឹកជញ្ជូនសកលលោក បើទោះបីជាមិនមានផលប៉ះពាល់ភ្លាមៗទៅលើផ្លូវពាណិជ្ជកម្មរបស់ឥណ្ឌូណេស៊ីទៅកាន់អាម៉េរិកខាងត្បូងក៏ដោយ។

លោក សេទីចាឌី បាននិយាយថា ការភ្ញាក់ផ្អើលផ្នែកភូមិសាស្ត្រនយោបាយនៅក្នុងប្រទេសផលិតប្រេងមួយនេះកំពុងប្រឈមនឹងហានិភ័យនៃការឡើងចុះនៃតម្លៃប្រេងឆៅសកលលោក ដែលនៅទីបំផុតនឹងបង្កើនថ្លៃប្រេងឥន្ធនៈ និងការចំណាយទៅលើការដឹកជញ្ជូនអន្តរជាតិ។ នេះបើយោងតាមការចេញផ្សាយរបស់ក្រុមហ៊ុន ​​Tempo.co។

លោកបានកត់សម្គាល់ថា សក្ដានុពលបែបនេះអាចបង្កើតសម្ពាធថ្មីទៅលើសន្តិសុខផ្គត់ផ្គង់ថាមពល និងប្រសិទ្ធភាពខ្សែសង្វាក់ផ្គត់ផ្គង់សកលលោក នៅពេលដែលប្រទេសឥណ្ឌូណេស៊ីកំពុងស្វែងរកការធ្វើពិពិធកម្មទីផ្សារនាំចេញរបស់ខ្លួន ជាពិសេសនៅអាម៉េរិកខាងត្បូង។

លោកបានព្រមានថា ថ្លៃដឹកជញ្ជូនអាចកើនឡើងនៅលើផ្លូវឆ្លងកាត់តំបន់ប៉ាស៊ីហ្វិក ក៏ដូចជាផ្លូវឆ្លងកាត់មជ្ឈមណ្ឌលដឹកជញ្ជូនជាសកលសំខាន់ៗដែលជំរុញដោយតម្លៃប្រេងឥន្ធនៈក្នុងឃ្លាំងខ្ពស់ និងការគិតថ្លៃបន្ថែមដែលដាក់ចេញដោយខ្សែសង្វាក់ដឹកជញ្ជូន។

ការកើនឡើងថ្លៃដើមទាំងនេះអាចធ្វើឱ្យប៉ះពាល់ដល់ការប្រកួតប្រជែងផ្នែកតម្លៃនៃការនាំចេញរបស់ឥណ្ឌូណេស៊ី ជាពិសេសទំនិញផលិត និងផលិតផលដែលមានតម្លៃបន្ថែមមធ្យម ដែលងាយនឹងរងផលប៉ះពាល់ខ្លាំងចំពោះការចំណាយលើការដឹកជញ្ជូន។

លោក សេទីចាឌី ក៏បានគូសបញ្ជាក់ផងដែរអំពីហានិភ័យនៃការធ្លាក់ចុះនៃភាពជឿជាក់នៃការដឹកជញ្ជូន ចំពេលដែលមានភាពតានតឹងទូទាំងពិភពលោកកាន់តែខ្លាំងឡើង។ ការកែតម្រូវផ្លូវដឹកជញ្ជូន ការអនុវត្តការបង្រួបបង្រួមទំនិញ និងការចូលទៅកំពង់ផែដោយក្រុមហ៊ុនដឹកជញ្ជូនអាចពន្យារពេលវេលាដឹកជញ្ជូន និងបង្កើនភាពមិនប្រាកដប្រជានៃការផ្គត់ផ្គង់សម្រាប់គោលដៅអាម៉េរិកខាងត្បូង ដូចជាប្រេស៊ីល និងប៉េរូ ក៏ដូចជាទីផ្សារផ្សេងៗទៀតជាដើម៕

ដោយ៖ យា ចិន្ដាខន្ដី (ប្រភព៖ VNA)