AKP ភ្នំពេញ ថ្ងៃទី០៦ ខែមករា ឆ្នាំ២០២៦ -- ក្រុមគ្រូពេទ្យចិនទី២៦ បានធ្វើដំណើរទៅកាន់ប្រទេសសៀរ៉ាឡេអូនដើម្បីបរិច្ចាគសម្ភារៈមួយចំនួនដល់វិទ្យាស្ថានសុខុមាលភាពមួយក្នុងទីក្រុងហ្វ្រីថោន ដែលជារដ្ឋធានីរបស់ប្រទេស។

សម្ភារៈទាំងនោះ រួមមានអង្ករ នំប៉័ង អាហារសម្រន់ និងសម្ភារៈចាំបាច់ប្រចាំថ្ងៃ ត្រូវបានប្រគល់ជូនវិទ្យាស្ថានសុខុមាលភាពកុមារនៃមូលនិធិ Saint George ដែលជាផ្នែកមួយនៃកិច្ចខិតខំប្រឹងប្រែងរបស់ក្រុមក្នុងការកែលម្អសុខភាព និងជីវិតប្រចាំថ្ងៃរបស់កុមារងាយរងគ្រោះនៅក្នុងប្រទេសនេះ។

ក្នុងអំឡុងពេលទស្សនកិច្ចរបស់លោក លោក លីវ ឡុងហ្វី (Liu Longfei) ប្រធានក្រុមគ្រូពេទ្យ បានសម្តែងក្តីសង្ឃឹមសម្រាប់កុមារ ដោយលោកបាននិយាយថា ពួកគេនឹងក្លាយជាអ្នកស្នងតំណែងក្នុងការកសាងប្រទេសសៀរ៉ាឡេអូន និងជាអ្នកស្នងមរតកមិត្តភាពចិន-សៀរ៉ាឡេអូន។

យោងតាមលោក លីវ ក្រុមគ្រូពេទ្យតែងតែផ្តល់ការថែទាំសុខភាពដោយឥតគិតថ្លៃដល់កុមារនៅវិទ្យាស្ថានសុខុមាលភាពជាមួយនឹងបច្ចេកទេសវេជ្ជសាស្ត្រប្រពៃណីចិន និងនាំយកសម្ភារៈដើម្បីកែលម្អជីវភាពរស់នៅរបស់ពួកគេ។

លោកស្រី ចាស្ទីណា ហ្សៃណាប់ កុនតេហ៍ (Justina Zainab Conteh) នាយកប្រតិបត្តិនៃមូលនិធិ Saint George បានសម្តែងការកោតសរសើរចំពោះការគាំទ្ររបស់ក្រុមគ្រូពេទ្យ និងរដ្ឋាភិបាលចិន៕

ដោយ៖ មូល មិនា (ប្រភព៖ ស៊ីនហួ)